افتتاح أول مول ماركات عالمية في دمشق!

دمشق اللي منحبّها، بسحر حاراتها القديمة وأسواقها العريقة، عم تستقبل وجهات عصرية بتضيف لمسة جديدة على أجوائها المميزة. وهالمرة، الموعد مع فاشن غيت مول في بوليفارد دمشق. فتح أبوابه لعشّاق الموضة والماركات العالمية، ليقدّم تجربة بتجمع بين الأناقة والتسوّق والترفيه. من الأزياء والمجوهرات للعطور ومستحضرات التجميل، وصولاً للمطاعم والمقاهي الراقية، في تفاصيل كتيرة بتستحق الاكتشاف. فخلّونا ناخدكن بجولة ونتعرّف سوا على أبرز الأشياء اللي بتميّز هالوجهة الجديدة!

فاشن غيت مول… عنوان جديد للفخامة بدمشق

بتاريخ 27 أيلول 2026، شهدت العاصمة دمشق الافتتاح الرسمي لفاشن غيت مول. كان الافتتاح بحضور عدد من الوزراء والسفراء ورجال الأعمال، ليكون أول متجر عالمي فاخر متعدد الأقسام في سوريا. المشروع، اللي طوّرته شركة أنليميتد، بيقدّم مفهوم متكامل للتسوّق، من خلال مجموعة متنوعة من العلامات التجارية والخدمات، ضمن تصميم معماري عصري ومساحات أنيقة بتضيف لمسة خاصة على تجربة الزوار.

أشهر الماركات العالمية صارت بقلب دمشق!

تخيّلوا تلاقوا أكتر من 22 علامة تجارية عالمية بمكان واحد، من بينها غوتشي، فالينتينو، بول آند شارك، كالفن كلاين، برادا، كارتييه، كلوي، جورجيو أرماني، وبوما، وغيرها من الأسماء المعروفة بعالم الموضة. والتشكيلات مختارة بعناية لتناسب السيدات والرجال والشباب، مع خيارات بتتنوع بين الأزياء الفاخرة والملابس الكاجوال والمجوهرات والإكسسوارات، لتلبّي مختلف الأذواق. يعني سواء كنتوا بتحبّوا الستايل الكلاسيكي أو العصري، فيكن تتعرّفوا على أحدث المجموعات والتصاميم خلال جولتكن.

عالم من الجمال والعطور والتفاصيل الراقية

ولأنّه الإطلالة الحلوة بتكمل بتفاصيلها، بيخصّص فاشن غيت مول مساحة لعالم العطور ومستحضرات التجميل والعناية بالبشرة، مع مجموعة من البراندات العالمية والمنتجات المختارة.

فإذا كنتوا بتحبّوا تكتشفوا عطور جديدة أو تتابعوا أحدث صيحات الجمال، رح تلاقوا خيارات متنوعة خلال الزيارة.

مو بس تسوّق… مطاعم ومقاهي بتكمّل حلاوة الطلعة!

وبعد جولة بين المحلات، فيكن تاخدوا استراحة وتستمتعوا بأكلة طيبة أو فنجان قهوة، مع خيارات مميزة من المطاعم والمقاهي. من بينها مطعم ومقهى سيرا، اللي بيقدّم أطباق مستوحاة من المطبخ الإيطالي، مثل الباستا والبيتزا ووجبات الإفطار، ضمن أجواء دافئة وأنيقة. أما عشّاق القهوة المختصة، فبيلاقوا ذا إسبريسو لاب، اللي بيهتم بجودة حبوب البن وطرق تحضير القهوة، إلى جانب تشكيلة من المخبوزات المميزة. وهيك فيكن تجمعوا بين جولة تسوّق واستراحة لطيفة مع الأهل أو الرفقات.

خدمات مميزة لتجربة تسوّق أكثر راحة

ولحتى تكون الزيارة أسهل وأكتر خصوصية، بيقدّم فاشن غيت مول خدمات مثل التسوّق الشخصي، والمساعدة بتنسيق الإطلالات، وإمكانية حجز صالات خاصة لكبار الشخصيات. وهي الخدمات بتساعد الزوار يختاروا القطع اللي بتناسب أذواقهم، وبتوفّر تجربة أكثر راحة وخصوصية للي بيحبّوا التسوّق بمساعدة مختصّين.

مشروع استثماري جديد بيفتح فرص للشباب السوري

وما بتوقف أهمية فاشن غيت مول عند كونه وجهة للتسوّق، لأنّه كمان بيشكّل خطوة جديدة بعالم الاستثمار والتجارة بدمشق. فالمشروع بيوفّر حوالي 200 فرصة عمل مباشرة للشباب السوري، وهالشي بيساهم بتحسين دخل العاملين وتنشيط الحركة الاقتصادية والتجارية بالشام.

العنوان: بوليفارد دمشق، جانب الفورسيزونز، شارع الأرجنتين.

وبالنهاية، إذا كنتوا حابين تغيّروا جو وتستمتعوا بطلعة بتجمع بين الموضة والتسوّق وقعدة حلوة، حطّوا فاشن غيت مول على قائمة أماكنكم الجاية بدمشق. زوروه، اكتشفوا أجواءه عن قرب، وخبرونا شو أكتر شي عجبكن فيه!

المزيد

وايت هيلز بدمشق: المكان يلي صار يجمع كل شي بتحبوه بطلعة وحدة 

م يقدّم فكرة مختلفة شوي ؛ مساحة كبيرة بتجمع الأكل والمشروبات، الفعاليات، التجارب الفنية، والجلسات الحلوة بمكان واحد