أفضل أماكن الدراسة بدمشق: هدوء، إنترنت، وخيارات مجانية

مو كل يوم بتزبط الدراسة بالبيت، وأوقات تغيير المكان لحاله بيساعد عالتركيز والإنجاز. بدمشق في أكتر من خيار للطلاب ولـ يلي بيشتغلوا عاللابتوب، من مكتبات ومراكز مخصصة للدراسة، لكافيهات هادية وحتى مساحات عامة مجانية. جمعنالكم مجموعة من أفضل أماكن الدراسة بدمشق، بين خيارات مجانية وأماكن مجهزة للجلوس لساعات طويلة والدراسة براحة.

1. المكتبة الوطنية

إذا بدكم مكان هادي ومجاني للدراسة، المكتبة الوطنية بساحة الأمويين من أول الخيارات اللي ممكن تفكروا فيها. فيها قاعات للدراسة، كهربا وإنترنت مجاني، وفيكن تدخلوا اللابتوب معكم وتدرسوا أو تشتغلوا براحتكم. والميزة كمان إنكن إذا احتجتوا كتاب أو مرجع خلال الدراسة، فيكن تستفيدوا من الكتب والمراجع الموجودة بالمكتبة، فبتكون مناسبة بشكل خاص للطلاب والباحثين.

المكان: ساحة الأمويين
الدوام: من الساعة 9 صباحاً حتى 2:30 ظهراً
الدخول: بالهوية الشخصية
المتوفر: قاعات، كهربا، إنترنت، كتب ومراجع
التكلفة: مجاناً

2. ريتش تو إنفينيتي

إذا عندكم ساعات دراسة طويلة وبدكم مكان بعيد عن الضجة، ريتش تو إنفينيتي من الأماكن المناسبة للدراسة والشغل. الجو فيه هادي، مع توفر إنترنت سريع وكهربا على مدار الساعة، فبيزبط للطلاب، لإنجاز المشاريع، أو للشغل عاللابتوب لما بدكم مكان يساعدكم عالتركيز.

العنوان: دمشق – شارع خالد بن الوليد
الهاتف:963995928551

3. هومي هون

إذا بتحبوا مكان مريح وأجواؤه قريبة من قعدة البيت، هومي هون من الخيارات المناسبة للدراسة والشغل. فيه إنترنت، ومساحات بتناسب القعدة لساعات، فممكن تروحوا عليه للدراسة الفردية أو لإنجاز شغلكن ومشاريعكن بعيداً عن ضجة البيت.

العنوان: الروضة – ساحة نوري باشا – مؤسسة الأبجدية – الطابق الخامس
الهاتف: 963956464405

4. مركز ستدي زون

للي بيفضلوا مكان مخصص أساساً للدراسة، مركز ستدي زون من الخيارات المعروفة بدمشق، وعنده فرعين بباب شرقي وباب توما. المكان مهيأ للطلاب وفيه مساحات بدرجات مختلفة من الهدوء، بالإضافة للإنترنت وبعض الخدمات والتجهيزات اللي بتفيد طلاب الاختصاصات العملية.

الفروع: باب شرقي – باب توما
الهاتف: 963989162120

5. كافيه كارما

إذا بتحبوا تدرسوا بجو كافيه، كافيه كارما بأبو رمانة من الخيارات المناسبة. المكان هادي ومريح، وفيه إنترنت، فبيزبط للدراسة الفردية أو الشغل عاللابتوب، وخصوصاً إذا بتحبوا يكون معكن قهوة أو مشروب خلال ساعات الدراسة.

العنوان: دمشق – أبو رمانة – مقابل حديقة المدفع
الهاتف: 963994913060

6. تشابترز بزنس كافيه

إذا بدكم مكان معمول من الأساس للشغل والدراسة، تشابترز بزنس كافيه من الخيارات المميزة بدمشق. فيه صالة أساسية مناسبة للدراسة والشغل، وقاعة مجهزة لطلاب العمارة والمشاريع، بالإضافة لقاعة اجتماعات فيها شاشة ذكية، فبيخدم الدراسة الفردية والجماعية وحتى اجتماعات العمل. وفيه إنترنت فايبر، مع إمكانية اختيار باقات إضافية عند الحاجة لسرعة أعلى. نظام الحساب بيكون حسب عدد الساعات، وبتتوفر بالمكان مشروبات وحلويات وخيارات للأكل، فبيكون مناسب للي ناوي يقضي عدة ساعات بين دراسة وشغل.

العنوان: الجسر الأبيض – نزلة الطلياني
للحجز والاستفسار: 0987002688

7. ألباتشينو كافيه

إذا بتحبوا تدرسوا أو تشتغلوا بجو كافيه هادي ومرتب، ألباتشينو من الخيارات المناسبة بأبو رمانة. المكان فيه إنترنت فايبر سريع ومجاني، فبيزبط للدراسة، الشغل عاللابتوب أو حتى اجتماع صغير. الجلسات مريحة، وفي تشكيلة من المشروبات والحلويات، فممكن تقضوا فيه أكتر من ساعة من دون ما تحسوا إنكن بمكان مخصص للدراسة بشكل رسمي. 

العنوان: أبو رمانة – ساحة المطاعم
الهاتف: 0945464363

8. مركز آسيا للتدريب

ومن الخيارات المجانية كمان مركز آسيا للتدريب، اللي بيوفر مساحة هادية للدراسة أو الشغل مع إنترنت سريع. بيكون خيار مناسب خصوصاً للطلاب اللي بدهم مكان برا البيت يساعدهم عالتركيز من دون ما يضطروا يدفعوا مقابل كل ساعة دراسة.

العنوان: البرامكة – حلبوني – جادة الربيعي – دمشق
الهاتف: 963933544293
التكلفة: مجاناً

9. عيادات العمل بكلية الهندسة المدنية

وفي خيار ممكن ما يكون معروف عند الكل، وهو عيادات العمل بكلية الهندسة المدنية. بحسب تجربة أحد الطلاب، المكان هادي ومناسب للدراسة والشغل، والدخول مجاني، وممكن تقعدوا فيه من حوالي الساعة 9 الصبح للساعة 5 المسا تقريباً. وبجانب المكان في مساحة باسم مؤسسة إدراك، لكنها مأجورة، لذلك إذا بدكم الخيار المجاني فالمقصود هون عيادات العمل الموجودة جنبها.

المكان: كلية الهندسة المدنية، البرامكة
الدوام التقريبي: من الساعة 9 صباحاً حتى 5 مساءً
التكلفة: مجاناً

10. الحديقة الفرنسية بالمزة

وإذا بتحبوا الدراسة بالهوا الطلق، في الحديقة الفرنسية بالمزة بطريق الفيلات قبل مبنى الاتصالات. فيها طاولة وكراسي حجر، وبحسب تجارب الزوار في إمكانية للاستفادة من تغطية إنترنت مجانية بالمنطقة. هالخيار ممكن يناسب القراءة أو الدراسة الخفيفة لما يكون الجو حلو، بس بما إنها حديقة عامة، مستوى الهدوء وجودة الإنترنت ممكن يتغيروا من وقت للتاني.

المكان: المزة – طريق الفيلات – قبل مبنى الاتصالات
التكلفة: مجاناً

وإنت، وين مكانك المفضل للدراسة بدمشق؟

المزيد

قبة المعرفة: أول سينما تفاعلية متنقلة بدمشق.. تجربة جديدة ما بتشبه أي سينما

الفترة الأخيرة انطلقت بدمشق مبادرة “قبة المعرفة“، وهي أول سينما تفاعلية متنقلة بتقدم عروضاً بزاوية 360 درجة