قبة المعرفة: أول سينما تفاعلية متنقلة بدمشق.. تجربة جديدة ما بتشبه أي سينما

مو كل يوم منشوف فكرة جديدة بتوصل لعالم الأطفال بهالطريقة. بالفترة الأخيرة انطلقت بدمشق مبادرة “قبة المعرفة“، وهي أول سينما تفاعلية متنقلة بتقدم عروضاً بزاوية 360 درجة، لتاخد الزوار برحلة بصرية بين الفضاء، الكواكب، والعوالم العلمية ضمن تجربة مختلفة عن أي سينما تقليدية.

شو هي “قبة المعرفة”؟

“قبة المعرفة” عبارة عن قبة سينمائية متنقلة بتتنقل بين الحدائق، المدارس، والمولات، وبتقدم أفلاماً تفاعلية بتقنية 360 درجة، ليعيش الزائر التجربة وكأنه جزء من المشهد. المشروع أطلقه مجموعة من الشباب السوريين العائدين من الاغتراب، بإدارة وصاحب فكرة المشروع سعيد الخولي، يلي استوحى الفكرة من تجارب شافها خارج سوريا، وعمل على تنفيذها لتكون أول تجربة من نوعها بالبلد.

شو الفرق بينها وبين السينما العادية؟

بعكس صالات السينما التقليدية، بتعتمد “قبة المعرفة” على شاشة بتغطي كامل مساحة القبة من الداخل، مع نظام صوتي محيطي، ليحس الزائر إنه موجود داخل المشهد، مو عم يتفرج عليه من بعيد.

رصد السماء بالتلسكوب

ما بتوقف التجربة عند العروض التفاعلية فقط، لأن “قبة المعرفة” بتوفر كمان فرصة لرصد السماء عبر تلسكوب مخصص، ليعيش الزوار تجربة أقرب لعالم الفلك. وبتتيح هالفقرة للمهتمين يشوفوا الأجرام السماوية ويتعرفوا عليها بشكل عملي، لتكون الزيارة مزيج بين المشاهدة داخل القبة والاستكشاف المباشر خارجها.

تعليم وترفيه بنفس الوقت

المشروع ما بيقتصر على عرض أفلام ترفيهية، وإنما بيركز على تبسيط علوم الفلك والفضاء للأطفال بطريقة ممتعة وسهلة. ومن خلال المؤثرات البصرية والصوت المحيطي، بتتحول مشاهدة الفيلم لرحلة تفاعلية بتشد انتباه الأطفال وتخلي المعلومة أقرب لإلهم.

مو بس للأطفال

رغم إن أغلب العروض الحالية مخصصة للأطفال وبتقدم محتوى تعليمي وترفيهي عن الفضاء والعلوم، إلا إن “قبة المعرفة” ما رح تقتصر عليهم. الفريق عم يشتغل على إضافة عروض فلكية وأفلام وثائقية وتجارب بصرية مخصصة للكبار. هيك بتصير القبة وجهة تناسب مختلف الفئات العمرية، سواء للعائلات أو لمحبي الفلك والعلوم.

وين ممكن تشوفها؟

الجولات الأولى انطلقت من دمشق، مع خطة لزيارة مختلف المحافظات خلال الفترة القادمة. وما رح تقتصر العروض على الحدائق فقط. رح تشمل المدارس، المولات، والفعاليات الخاصة، بالإضافة لإمكانية حجز القبة للمناسبات والأنشطة التعليمية.

ليش لفتت الأنظار؟

الفكرة لاقت تفاعل كبير من الأهالي، خاصة لأنها بتقدم محتوى يجمع بين التسلية والفائدة، وبيعطي الأطفال فرصة يعيشوا تجربة مختلفة بعيداً عن الشاشات وألعاب الفيديو، ضمن أجواء بتحفز الفضول والاستكشاف.

الحجز والتواصل

لزيارة قبة المعرفة فيك تتواصل مع فريق المشروع عبر صفحتهم على إنستغرام أو من خلال الرقم: 0998313135 ونظراً للإقبال على العروض، يُنصح بالحجز مسبقاً لضمان توفر المقاعد.

بالنهاية من خلال فكرة بسيطة وتقنيات حديثة، قدرت “قبة المعرفة” تقدم تجربة مختلفة عن أي سينما تقليدية. وبين العروض التفاعلية والبرامج التعليمية، عم تثبت إن الترفيه ممكن يكون بنفس الوقت وسيلة للتعلم والاستكشاف.

المزيد

وايت هيلز بدمشق: المكان يلي صار يجمع كل شي بتحبوه بطلعة وحدة 

م يقدّم فكرة مختلفة شوي ؛ مساحة كبيرة بتجمع الأكل والمشروبات، الفعاليات، التجارب الفنية، والجلسات الحلوة بمكان واحد