دليل مهضوم لأشهر أسماء الألوان باللهجة الشامية 

إذا سمعت حدا بالشام عم يقول: “بدي بلوزة سيرقوني مو قرميدي “، أو “عندك شنطة سماوي؟”، وما فهمت عن شو عم يحكي، فاعرف إنك دخلت عالم الألوان الشامية! الشوام مو بس عندهم أسماء خاصة للأكلات والحارات، حتى الألوان إلها قاموس كامل من الكلمات اللطيفة والمميزة. والأجمل إن أغلب هالأسماء جاية من أشياء منشوفها كل يوم: فواكه، خضار، أكلات، أحجار، معادن، وحتى ألوان البشرة والشعر. فتعوا نتعرف على أشهرها:

ألوان مستوحاة من الفواكه والخضار والأكلات

المخللي: زهري مائل للبنفسجي، متل لون مخلل اللفت الشامي.

البيتنجاني: بنفسجي غامق متل قشرة الباذنجان.

المشمشي: برتقالي متل لون المشمش الناضج.

خملة الدراق: لون ناعم مزيج بين الأحمر والبيج مستوحى من فاكهة الدراق.

التفاحي: برتقالي مزهرعلى بيج متل قشرة التفاح.

الفستقي: أخضر مستوحى من لون الفستق الحلبي.

الكموني: بيج ذهبي مائل للبني، من لون حبوب الكمون.

العسلي: بني ذهبي فاتح متل العسل.

قمر الديني: برتقالي ذهبي مستوحى من قمر الدين.

الموزي: أصفر فاتح متل لون الموز.

الليموني: أصفر زاهي متل الليمون.

النبيتي: أحمر غامق مائل للخمري، واسمه جاية من لون النبيذ.

البطيخي: زهري محمر متل لون لب البطيخ.

حبة الرمان: أحمر غني مستوحى من حب الرمان.

الفلفلي: نسبة للفليفلة، وبيكون أحمر.

ألوان من الطبيعة والنباتات

مصدر الصورة

السماوي: أزرق فاتح متل لون السما الصافية.

النيلي: أزرق غامق، واسمه جاي من صبغة النيلة المعروفة قديماً.

الدخاني: رمادي فاتح مائل للأزرق، متل لون الدخان.

الفحمي: أسود مائل للرمادي الغامق، متل لون الفحم.

الحشيشي: أخضر غامق متل لون العشب.

الخضيري: أخضر متوسط، واسمه مشتق من كلمة أخضر.

الزيتي: أخضر غامق مائل للبني، مستوحى من لون الزيت.

الزيتوني: أخضر متل لون حبة الزيتون.

زهرة العطرة: بنفسجي فاتح مستوحى من لون زهرة العطرة.

العفني: رغم اسمه الغريب، فهو أخضر باهت مائل للصفار، وبيشبه لون الأوراق القديمة أو الذابلة.

الجوزي: نسبة إلى لون كان يُستخرج من قشر الجوز

ألوان مرتبطة بالشعر والبشرة

الحنطي: لون البشرة السمراء الفاتحة، نسبة إلى لون القمح.

الخرنوبي: من أكثر الألوان المستخدمة لوصف الشعر البني المائل للأحمر، مستوحى من لون نبات الخرنوب.

شهل: يستخدم لوصف لون العيون يلي بيجمع بين العسلي و الأخضر والبني الفاتح ويشبه لون قشرة البندق.

ألوان مستوحاة من الأحجار والمعادن

الألماسي: فضي فاتح ولامع، متل بريق الألماس.

السيرقوني: أحمر قرمزي قوي، نسبة إلى حجر الزيرقون.

الرصاصي: رمادي مستوحى من لون معدن الرصاص.

الحديدي: رمادي معدني متل لون الحديد.

الزنجاري: أخضر مزرق مستوحى من لون الزنجار يلي بيتشكل على النحاس مع الزمن.

ألوان شامية خاصة

السكني: الرمادي الغامق، ومن أشهر التسميات المستخدمة بالشام.

السكلما: بنفسجي مائل للزهري، من الأسماء القديمة المحببة ومستوحى من زهرة السيكلما(بخور مريم).

الفوشي: زهري قوي وفاقع.

الفريزي: زهري مائل للبنفسجي، قريب من لون زهرة الفريزيا.

البترولي: لون بين الأزرق والأخضر، مع ميل أوضح للأزرق.

الجنزيري: قريب من البترولي، لكن أقرب للأخضر.

التركوازي: أزرق مخضر فاتح مستوحى من لون الفيروز.

البصلي: بيج مائل للوردي، من لون قشرة البصل.

الحطبي: بني طبيعي مستوحى من لون الخشب والحطب.

القرميدي: بني محمر متل لون القرميد.

البريك: قريب من القرميدي، واسمه مأخوذ من لون الطوب أو الآجر.

وبهيك بتكتشفوا إنو الألوان بالشام مو مجرد درجات، هي كلمات طالعة من الذاكرة والبيت والسفرة والحكي اليومي. وكل ما تسمعوا اسم لون جديد، تذكّروا إنو وراه قصة صغيرة بتشبه الشام وناسها.

المزيد

أمثال ما بتسمعها إلا بالشام 

بيقولوا أهل أول ما تركوا شي ما متّلو عليه من النصايح والحكم، للوصف والمدح والذم كل موضوع وكل موقف الو متل وبيعبر عنه