أغرب أسماء النباتات باللهجة الشامية: أسماء رح تسمعوها لأول مرة

أهل الشام ما اكتفوا يزرعوا الورد والياسمين ببيوتهم وشرفاتهم، حتى أسماء النباتات عطوها من خفة دمهم وخيالهم. بعض هالأسماء مستوحى من شكل النبتة، وبعضها من طريقة تفتح زهورها أو حركة أوراقها، وفي أسماء وراها تشبيهات وقصص بتضحك. جمعنالكم هون أغرب أسماء النباتات باللهجة الشامية، واللي يمكن تكونوا شفتوها من قبل بس ما كنتوا بتعرفوا شو بيسموها أهل الشام.

المستحية

اسمها لحاله بيشرح كل شي. أول ما تلمسوا أوراقها الناعمة، بتسكر وبتنكمش بسرعة وكأنها استحت منكن، وبعد فترة بترجع بتفتح أوراقها من جديد.

شبٌ ظريف

نبتة بتطلع عليها زهور جذابة بألوان قوية، ومن أشهرها الفوشي والأصفر. بتتفتح زهورها عادة بآخر النهار، ولهيك بتنعرف بمناطق تانية باسم شب الليل أو زهرة الساعة الرابعة.

زهرة الضراير

من أطرف الأسماء الشامية. بتطلع زهورها على الغصن بشكل متقابل و متباعد، وكأن كل وردة عاطية التانية ظهرها، فشبهوها بالضراير اللي ما بيتفقوا مع بعض.

لسان حماتي

في نوع من الصباريات بيسموه بالشام لسان حماتي. أوراقه طويلة وممتدة متل اللسان، ويبدو إنو التسمية إجت من الشكل الحاد والطويل للنبتة.

المجنونة

المجنونة أو الجهنمية من النباتات اللي بتنتشر زهورها وألوانها بشكل كثيف جداً، وبتغطي الجدران والشرفات بطريقة بتخليها تبين وكأنها مزهرة بجنون.

الكولونيا

من النباتات العطرية المرتبطة ببيوت الشام القديمة. بتقوى ريحتها بالليل، ولما تزهر بتعبي الحديقة أو أرض الديار بعطرها الفواح، ولهيك بيطلقوا عليها كمان اسم عطر الليل أو ملكة الليل.

خراطة بنت الملك

واحد من أغرب الأسماء المتداولة للنباتات. زهورها بتشبه البوق أو التنورة، بس بتكون طبقاتها مضاعفة ومتداخلة، وكأنها قطعة مزخرفة ومصنوعة بعناية.

حلق الست أو حلق المحبوب

هي نبتة الفوشيا المعروفة بزهورها المتدلية وألوانها القوية. شكل الزهرة بيشبه الحلق الطويل المعلق، ولهيك أخدت اسم حلق الست.

راخي شعره

من النباتات المنزلية القديمة، أوراقها طويلة ورفيعة ونازلة من الأصيص متل خصل الشعر، ومن هون إجا اسم راخي شعره. بتنعرف كمان باسم نبات العنكبوت أو الشريطة.

المحكمة

بتفتح زهورها الصغيرة والملونة بالصباح، ومع مرور النهار بتبلش تسكر، فشبهوها بدوام المحكمة اللي بيبدأ بكير وبيخلص بعد الضهر. وتعرف بمناطق تانية باسم ورد الصباح.

العقربة

نوع من الصباريات، أفرعها أو أوراقها المفصلية بتشبه ذيل العقرب، ولما تزهر بتطلع عليها ورود كتيرة بألوان مثل الأحمر والفوشي. وتعرف كمان باسم صبار عيد الميلاد.

السجادة

تميزها الحقيقي مو بزهورها، وإنما بأوراقها المزركشة اللي بتجمع أكتر من لون ونقشة. ولما تنزرع مجموعة منها جنب بعض، بتشبه سجادة ملونة ومفروشة بالحديقة.

زهرة الساعة

زهرة مميزة بتتوزع أجزاؤها وخيوطها بشكل قريب من عقارب الساعة، ولهيك أخدت هالاسم البسيط.

فم السمكة

لما تضغطوا على طرف الزهرة، شكلها بيتحرك وبيفتح كأنو فم سمكة صغيرة. أزهارها بتطلع بألوان متعددة، وبتنعرف كمان باسم حنك السبع أو فم التنين.

الياسمينة العراتلية

نوع مميز من الياسمين، وزهورها بتتميز بريحة عطرية قوية وأخّاذة. كانت من النباتات الأساسية بأرض الديار والبيوت الدمشقية، جنب الياسمين البلدي والجوري والكولونيا.

المكحلة

نبتة ورقية ملفتة بأوراقها الأرجوانية أو المخططة بالبنفسجي والأخضر والفضي. ألوانها الغامقة والقوية وشكل رسمة أوراقها الرفيعة جدا من الأعلى يشبه الكحل القديم ولهيك تسمت المكحلة.

أم كلثوم

نبتة اللانتانا، وبتطلع زهورها الصغيرة على شكل عناقيد ملونة، منها الأصفر والبرتقالي والزهري. بعض أنواعها بتجمع أكتر من لون بنفس العنقود، وبتضل مزهرة لفترات طويلة.

المخملية

اسم بيطلق على نوع من الورد الجوري الأحمر، لأن شكل بتلاته ولونها الغامق بيعطوا إحساس قريب من قماش المخمل الناعم.

بالنهاية الأسماء الشعبية للنباتات بالشام مو مجرد تسميات عشوائية، وإنما جزء من ذاكرة البيوت القديمة وطريقة أهل الشام بوصف الأشياء من حولهم. وأكيد في أسماء تانية بتختلف من حارة لحارة ومن محافظة للتانية.

شو أغرب اسم نبتة سمعتوا فيه من أهاليكن أو جداتكن؟

المزيد في قسم حكي شامي على موقعنا!