أحلى مطاعم و كافيهات بالشعلان لطلعة مرتبة

الشعلان من المناطق يلي صعب تروحوا عليها وما تلاقوا شي على مزاجكم. من الفطور الشامي والمناقيش، للمأكولات البحرية والسندويشات، وصولاً للقهوة والحلويات والبوظة والعشا الشرقي، الخيارات قريبة من بعضها ومتنوعة بشكل بيخلي كل طلعة إلها طعم مختلف. جمعنالكم مجموعة من مطاعم و كافيهات بالشعلان بدمشق لتعرفوا وين ممكن تكون محطتكم الجاية.

1. بوز الجدي

إذا عبالكم أكل شامي على أصوله، بوز الجدي من الخيارات المحبوبة بالشعلان. فتة وأصناف فطور شعبي وسفرة مليانة نكهات شامية مألوفة، بتناسب اللمة مع العيلة أو الرفقات، خصوصاً إذا بتحبوا الأكل الدسم يلي بيشهي من أول لقمة.

الموقع: سوق الشعلان

2. الفرن اللبناني

ريحة المناقيش السخنة لحالها كفيلة تخليكم توقفوا عند الفرن اللبناني. عندهم تشكيلة من المعجنات والمناقيش عالطريقة اللبنانية، مثل الزعتر والخضرة والفلافل، بالإضافة للصفيحة الشامية والمجرمشة والبعلبكية. خيار حلو لما يكون عبالكم أكلة سريعة ومباشرة من الفرن. التوصيل عبر بي أوردر، يلا غو وموفو

الموقع: الشعلان – حبوبي رابع – جانب جلديات النجار

3. تارتار

لمحبي السمك والمأكولات البحرية، تارتار بيعطيكم خيار مختلف عن الوجبات المعتادة. القائمة فيها أصناف بحرية متنوعة، مع قعدة مريحة بتناسب العيلة والرفقات إذا بدكم وجبة مرتبة ونكهات بحرية واضحة.

الموقع: الشعلان – مقابل معهد رايزر هب

4. غرين آبل

غرين آبل من الخيارات المناسبة إذا بدكم أكلة سريعة ومتنوعة. بالقائمة سندويشات وبيتزا ومعجنات ووجبات مختلفة، بتناسب كل الأذواق.

الموقع: الشعلان – دخلة السبكي

5. مايوركا كافيه

إذا كان مزاجكم قهوة وقعدة على رواق، مايوركا بيجمع بين الأجواء المريحة والجلسات الداخلية والخارجية. مناسب للقاء مع الرفقات، قهوة هادية أو استراحة صغيرة خلال لفتكم بالشعلان.

الموقع: الشعلان – موقف نورا

6. نورا كافيه

نورا كافيه مناسب للي بدهم أكتر من مجرد مشروب. المكان بيجمع أجواء الكافيه مع خيارات للأكل، وخصوصاً الأطباق الإيطالية والبيتزا، فبيحل مشكلة المجموعة يلي نصها عباله قهوة والنص التاني جوعان.

الموقع: الشعلان – موقف نورا

7. فروت كاب

إذا عبالكم شي خفيف، فريش وحلو بنفس الوقت، فروت كاب من الخيارات اللطيفة بالشعلان. عندهم تشكيلة من الحلويات، الشوكولا، الوافل وسلطات الفواكه المحضّرة يومياً، بنكهات بتجمع بين البساطة والتقديم المرتب. خيار حلو لقعدة سريعة، حلو بعد الأكل، أو لما يكون مزاجكم على فواكه وشوكولا و شي منعش.

الموقع: الشعلان – دمشق

8. ومبي

ومبي محطة حلوة لعشاق المخبوزات والحلويات الغربية. كروسان، أصناف مخبوزة وحلويات بتزبط مع فنجان قهوة، أو فيكن تاخدوا تشكيلة معكم للبيت إذا ما بدكم تطولوا بالقعدة.

الموقع: الشعلان – شارع حافظ إبراهيم

9. مطبخ وحلويات داوود

إذا الحلو الشرقي هو نقطة ضعفكم، مطبخ وحلويات داوود من الخيارات الموجودة بقلب الشعلان. مناسب لختام الأكلة بحلو شرقي، أو لتاخد تشكيلة للبيت، مع توفر خدمة التوصيل.

الموقع: الشعلان

10. أمية كلاس

للبوظة والحلو، أمية كلاس من المحطات المعروفة بالشعلان. خيار مناسب للعيلة والرفقات لما يكون عبالكم شي بارد وحلو يكمل الطلعة.

العنوان: حافظ إبراهيم

11. ڤيلا ورد

ڤيلا ورد بيجمع بين المطبخ الدمشقي والأجواء الدافية والمرتبة. القائمة فيها مأكولات شامية وأطباق شرقية متنوعة، والقعدة بتناسب اللمات العائلية، الأصحاب وحتى المناسبات الخاصة.

الموقع: الشعلان – حبوبي تاني – خلف مدرسة دار السلام

باختصار، إذا كنتوا محتارين وين تاكلوا بالشعلان، الخيارات حواليكم أكتر مما بتتوقعوا؛ من الأكل الشامي والبحري للبيتزا والقهوة والحلو. وإنتو، أي مطعم أو كافيه بالشعلان مستحيل تمرّوا من المنطقة من دون ما تزوروه؟

المزيد:

5 مطاعم بتعمل صفيحة شامية ولا أطيب… لازم تجربوها! 

ريحة العجين المحمر بالفرن، وتتبيلة اللحمة الغنية باللبن أو البندورة، ورشة الصنوبر يلي بتكمّل الطعمة…