جهّزوا الشناتي… جولة على أحلى قرطاسية ومكتبات بالشام! 

موسم المدارس رجع، ومعه رجعت أحلى لفة بالسنة عند الصغار… وأطول لائحة مشتريات عند الأهل! شناتي، مقالم، دفاتر، ألوان، أقلام، قرطاسية وأغراض ما منعرف إنو ناقصتنا إلا لما نفوت عالمكتبة ونشوفها قدامنا. وهالسنة الخيارات بالشام كتيرة، من صالات موسمية ضخمة مخصصة للعودة عالمدرسة، لمهرجانات قرطاسية، ولمكتبات معروفة بتشكيلاتها الكبيرة. فإذا لساتكن ما جهزتوا أغراض المدرسة، جمعنالكن كم مكان ممكن تبدأوا منهن الجولة.

1. صالة ديزني

إذا ولادكن من عشّاق شخصيات ديزني، فصالة ديزني للعودة إلى المدارس ممكن تكون من أحلى محطات التجهيز هالسنة. من الشناتي والمقالم للدفاتر والقرطاسية، التشكيلة كبيرة وملوّنة وفيها خيارات كتيرة بتناسب أذواق الصغار، والأسعار منافسة كمان. والأحلى إنو شخصيات ديزني رح تكون موجودة بالصالة ليتصوّروا معها الولاد، يعني المشوار مو بس تجهيز للمدرسة… فيه شوية فرحة وصور حلوة كمان. يعني الولاد رح يطلعوا من الصالة مبسوطين، ومعهم أغراض المدرسة وصورة حلوة مع شخصياتهم المفضلة.

الموقع: كفرسوسة – دامسكينو مول – الطابق الأول.

2. مهرجان سبينزا

إذا بدكن مكان عامل موسم العودة للمدارس على نطاق كبير، مهرجان سبينزا واحد من أبرز المحطات بهالفترة. المهرجان جامع تشكيلة عملاقة من القرطاسية ومستلزمات المدارس، ومعه عروض متجددة وأسعار مناسبة على أصناف مختلفة، فممكن يكون خيارعملي للعائلات يلي بدها تجهز أغلب الأغراض بمشوار واحد. الميزة هون إنو الخيارات كتيرة، من الأشياء الأساسية يلي موجودة بكل لائحة مدرسة للأغراض يلي بتخلي الولاد يتحمسوا أكتر لأول يوم دوام. وإذا عندكن أكتر من طالب بالبيت… فغالباً رح تحسوا إنكن مو جايين تشتروا قرطاسية، جايين تجهزوا صف كامل بس بأسعار مميزة!

الموقع: دمشق – الزاهرة القديمة – مول ميدان بوليفارد – الطابق الثاني تحت الأرض – جانب مستشفى الهلال الأحمر.

3. مكتبة العش

مكتبة العش داخلة موسم المدارس هالسنة بتشكيلة مختارة بعناية، وخصوصاً للي بيهتموا بالشكل والجودة بنفس الوقت. بتلاقوا فيها موديلات حديثة، ألوان مميزة، وقرطاسية وأغراض مدرسية بتناسب أذواق مختلفة، مع خيارات كتيرة للصغار يلي بالنسبة إلهم شكل الدفتر والمقلمة جزء أساسي جداً من الاستعداد للمدرسة! والحلو إنو المكتبة مركزة على القطع العملية والحلوة بنفس الوقت، مع أسعار منافسة، فبتقدروا تعملوا جولة وتشوفوا أكتر من خيار قبل ما تقرروا.

الموقع: دمشق – الحلبوني – بناء الخولي – الطابق الأرضي.

4. مكتبة الصباغ فاميلي

إذا تجهيز المدرسة بالنسبة إلكن مو بس لائحة أغراض، وبتحبوا تختاروا كل تفصيلة على ذوقكن، مكتبة الصباغ فاميلي من الأماكن يلي ممكن تعجبكن. عندن تشكيلة كبيرة من الدفاتر والأقلام والمقالم والألوان وأدوات الرسم، مع خيارات بتناسب طلاب المدارس والجامعات، وبتجمع بين الاستخدام العملي والتصاميم الحلوة. الجميل بالمكان إنو الخيارات متنوعة، من القطع البسيطة والأساسية للتفاصيل يلي بتعطي لمسة أحلى للشنطة والمكتب، فبتقدروا تجهزوا أغلب احتياجات الدراسة بمكان واحد وإذا بتحبوا القرطاسية عنجد، حضّروا حالكن للفة أطول من المتوقع، لأنو أكيد رح يلفتكن أكتر من غرض ما كان بالحسبان.

الفروع:
دمشق – الحلبوني – نهاية نزلة المكتبات.
دمشق القديمة – سوق المسكية – باب بريد.
دمشق – الحلبوني – بداية نزلة المكتبات.

وبالآخر، تجهيز المدرسة مو بس شراء دفتر وقلم وشنطة… إلو جو خاص وفرحة بتبدأ من لحظة الاختيار. فجهزوا اللائحة، خدوا الولاد معكن، واعملوا جولة بين مكتبات و قرطاسية بالشام … بس حطوا ميزانية للشغلات يلي «مو ضرورية أبداً، بس كتير حلوة» لأنو غالباً هي أول شي رح يروح عالسلة!

المزيد

وايت هيلز بدمشق: المكان يلي صار يجمع كل شي بتحبوه بطلعة وحدة 

م يقدّم فكرة مختلفة شوي ؛ مساحة كبيرة بتجمع الأكل والمشروبات، الفعاليات، التجارب الفنية، والجلسات الحلوة بمكان واحد