3 محلات لتبورد بالصيفية بأفكار مبتكرة في الشام

بالصيف، كلنا مندور على شي ينعش المزاج: مشروب بارد، آيس كريم، سلاش، أو ميلك شيك معمول بطريقة مرتبة. بس الأجمل لما يكون المكان نفسه عنده فكرة مختلفة، وديكور بيشدّك، وأصناف بتخليك تحس إنك جرّبت شي جديد مو بس شي بارد. لهيك جمعنالكن 3 محلات في الشام فيكن تزوروها بالصيفية، كل واحد فيهن إلو ستايله الخاص ونكهته اللي بتميّزه.

1. ليموند هاوس24

إذا بتحبوا نكهة الليمون، 24  ليموند هاوس رح يكون من الأماكن اللي بتلفتكن من أول زيارة . الفكرة كلها مبنية على الليمون: مشروبات باردة، سلاش، آيس كريم، وخيارات منعشة بتناسب حر الشام. الديكور بالأصفر والأخضر بيعطي إحساس صيفي وفريش، وطريقة الطلب من الشبابيك بتخلي التجربة خفيفة وسريعة، خصوصاً إذا كنتوا بدكن شي يبرّدكن بنص المشوار. وعندن كمان أفكار مختلفة متل آيس كريم مانغو سبايسي، للي بيحبوا النكهات الجريئة والغير تقليدية. المكان هادي، رايق، وأسعاره مناسبة، يعني خيار لطيف لوقفة سريعة أو مشوار صيفي خفيف.

الموقع: كفرسوسة، دامسكينو مول، سوق بلازا
الدوام: يومياً من ١٠ الصبح حتى ١٢ منتصف الليل

2. موو شيك

موو شيك من المحلات اللي بتشدّك قبل ما تطلب، لأن ديكوره لحاله قصة. الستايل بالأبيض والأسود، مستوحى من ألوان البقرة، غريب، لطيف، وحلو مناسب كتير للتصوير. هالمكان متخصص بالمشروبات الكريمية والباردة، عندن ميلك شيك وآيس كريم بنكهات بتفتح النفس متل لوتس، أوريو، تيراميسو، وتشيز كيك. يعني إذا بتحبوا النكهات الغنية والحلوة، هون رح تلاقوا شي يرضي مزاجكن. اللطيف بموو شيك إنو التجربة كلها معمولة لتكون ممتعة: كاسة شكلها مرتب، طعمها غني، وجرعة حلا بتعدّل اليوم. وكمان متوفر الطلب عبر موفو للي حابب يوصله الميلك شيك لعنده.

الموقع: دمشق، الشعلان، سوق التنابل، باتجاه ساحة عرنوس، امتداد معجنات الشعلان
واتساب: 0984231036

3. ورد الشام

ورد الشام من الأماكن اللي بتعرف كيف تحوّل المشروبات أو البوظة لتجربة ملوّنة ومنعشة.  الورد، الألوان، والتفاصيل الحلوة بيخلّوا الزيارة لطيفة من أول لحظة، خصوصاً وقت يرشوا الورد على زوارهم لهيك التجربة عندن مو بس طعم، كمان شكل وفرحة وصور حلوة. عندن خيارات صيفية مبتكرة متل يوغرت البطيخ والدراق الصحي، وسلاش باللبن بدون سكر، وهي فكرة مختلفة عن السلاش التقليدي. كمان في سلاش فيتامين سي، آيس كوفي، وبوظة بنكهات منعشة متل البطيخ، الجوز والكراميل، بالإضافة لكاسات حلوة متل براونيز سبيشيال. المكان مناسب للي بدو شي بارد، خفيف، وشكله حلو، أو للي بحب يجرب نكهات جديدة بعيد عن الخيارات المعتادة.

الموقع:

فرع 1: دمشق، القيمرية، حارة ورد الشام جانب بماانو
فرع 2: كفرسوسة، دامسكينو مول، سوق بلازا

إذا بدكن تهربوا من حر الصيف بمشوار خفيف ومنعش، هالاماكن يلي ذكرناها في الشام خيار حلو بالصيفية.

المزيد:

مولات دمشق: تجربة تسوق وترفيه ما بتتفوت

خلينا ناخد جولة سريعة على أهم هالمولات