4 مطاعم جديدة بالشام لتجربة راقية جداً و أجواء استثنائية! 

بالشام، في مطاعم بتقدّم أكل طيب، وفي مطاعم جديدة بتقدّم تجربة وإحساس، تجربة بتبدأ من الباب، من الإضاءة، من الألوان، من الإحساس اللي بياخدك بعيد عن كل شي. بهالمطاعم الأربعة، الفخامة مو شعار، هي تفاصيل، مزاج، وذوق عالي بكل زاوية. تعالوا معنا لنعرفكم على هالمطاعم أكتر:

1. مطعم بيتزاريا

بيتزاريا تجربة إيطالية بكل معنى الكلمة، من الأجواء للأطباق. الديكور باللون الأحمر الفخم بيعطي المكان إحساس شغف وأناقة، مع لمسة راقية بتريح العين وبتخطف القلب بنفس الوقت. القعدة مرتبة وناعمة، والأجواء مثالي لعشا راقي أو سهرة مميزة. الأطباق الإيطالية مقدّمة بأطيب شكل، نكهاتها غنية وتقديمها أنيق، ومع العروض الإيطالية اللي بترافق التجربة، بتحس حالك عايش بروما بجو متكامل مو مجرد زيارة مطعم.
الموقع: فندق الشيراتون – دمشق
للحجز: 0112110001 – 0112110002 – 0991566601

2. مطعم آشكم

آشكم هو لمسة تركية دافئة بقلب الشام، ومكان بيحكي عن الحب الحقيقي من خلال التفاصيل. الديكور رائع، أنيق، وبيعكس ذوق راقي بدون تكلّف، بيخلق جو حميمي بيخليك تحب القعدة تطوّل. الأطباق ولا أشهى، معمولة بشغف واضح، وتقديمها أنيق بيكمّل الإحساس العام. تجربة بتجمع بين الفخامة والدفا، وبتناسب اللي بيحب الرقي المحسوس مو المعروض بس.
الموقع: بوليفارد فندق الفورسيزن – دمشق
للحجز: 0930444333 – 0113323333

3. مطعم دل سول

دل سول مساحة رايقة وأنيقة، عنوان للهدوء والفخامة الناعمة. الديكور قائم على تدرجات الأزرق الراقي، مع رسومات فنية على الجدران ضافت لمسة ذوق عالية وخلّت المكان يحكي فن وأناقة. الأجواء فيه مريحة وساحرة، مثالية للجلسات الهادية وللسهرات المميزة. الأطباق بتقدّم تنوّع غني بين الغربي والشرقي، وكلها بنكهات متقنة ولا أروع، لتكون التجربة متوازنة بين الطعم، الجو، والإحساس.
الموقع: بوليفارد فندق الفورسيزن – دمشق
للحجز: 0988777788

4. مطعم بيجو بيسترو

بيجو بيسترو تجربة من الخيال بكل تفاصيلها. أجواء فرنسية أنيقة، سهرات يومية بتضيف روح وحياة للمكان، وديكور باللون الأحمر الفخم بيعطي هيبة ورقي واضح. الأطباق غربية بلمسات شرقية مميزة وملفتة، والحلويات هون إلها حضور خاص ومذاق بيكمل التجربة. وأكتر شي بيميز المكان العروض الفنية ولوحة مرسومة بالشوكولا بتكسرها لتستمتع بالأجواء الساحرة، وتحوّل الزيارة لتجربة فريدة وغير متوقعة.
الموقع: ساحة المحافظة – ضمن اوتيل الفردوس – دمشق
للحجز: 0930405060

هالـ 4 مطاعم جديدة بالشام ما بتشبه بعض، و كل واحد منها بيقدّم فخامة حقيقية بطريقته. ديكور راقي، أطباق مدروسة، وأجواء بتخليك تحس إنك بمكان معمول على ذوقك. فإذا عم تدور على مطاعم فخمة بدمشق وتجارب تليق بمزاجك العالي، هالعناوين هنّي خيارك الصح.

المزيد في قسم وين نروح على موقعنا!