أفضل 6 كافيهات للدراسة والقعدة الهادية بدمشق!

أحياناً كل اللي منحتاجه لننجز دراستنا أو شغلنا هو مكان هادي، قعدة مريحة وفنجان قهوة يخلّينا نركّز بعيداً عن ضجّة البيت. والحلو إنّه بدمشق في كافيهات بتوفّر أجواء مناسبة للدراسة والعمل، وبعضها مجهّز بمساحات خاصة للاجتماعات والمشاريع الجماعية. فإذا عم تفتّشوا عن كافيهات للدراسة بدمشق، جمعنالكن 6 أماكن ممكن تلاقوا بينها قعدتكن المفضّلة!

1. ستادي ميت كافيه

إذا عندكن امتحانات أو مشاريع بدها تركيز، فـ ستادي ميت كافيه من الأماكن اللي بتوفّر أجواء مثالية للدراسة والعمل، مع مساحات مريحة وهدوء بيساعدكن تنجزوا مهامكن بعيداً عن المشتتات. وكمان في إنترنت فايبر سريع بيسهّل تحميل المحاضرات والملفات، وتشكيلة متنوعة من المشروبات بترافقكن خلال ساعات الدراسة، ليكون خيار مناسب لطلاب البكالوريا والجامعات.

الموقع: البحصة، دخلة ملك الألعاب، فندق برج آلاء، دمشق.

التواصل: 0962432530

2. غريفون كافيه

للطلاب اللي بيحبّوا يدرسوا أو يشتغلوا مع فنجان قهوة، غريفون كافيه بيجمع بين القعدة المريحة وخدمة إنترنت فايبر، ليكون مناسب للشغل على اللابتوب أو مراجعة الدروس، مع تشكيلة من المشروبات اللي بتكمّل أجواء القعدة.

الموقع: دمشق القديمة، القيمرية، مقابل كرواسون القيمرية.

التواصل: 0940468638

3. كارما كافيه

وللأشخاص اللي بيحبّوا الدراسة و العمل بأجواء هادية بعيداً عن التدخين، كارما كافيه بيقدّم مساحة مريحة للدراسة الفردية أو الجماعية، مع إنترنت وكهرباء ومقاعد مناسبة للقعدات الطويلة، لتقدروا تركزوا على شغلكن براحة.

الموقع: جادة الرواد، مقابل حديقة المدفع، دمشق.

4. مايوركا كافيه

إذا بتفضّلوا الأجواء الدافئة والقعدات الرايقة، فـ مايوركا كافيه من الأماكن اللي ممكن تختاروها للدراسة الخفيفة أو إنجاز شغلكن مع فنجان قهوة، بعيداً عن روتين اليوم وضجّته.

الموقع: الشعلان، موقف نورا، دمشق.

التواصل: 0938933160

5. تشابترز بيزنس كافيه

أما إذا كانت دراستكن أو شغلكن بحاجة لمساحة مجهّزة، فـ تشابترز بيقدّم قاعات هادية للدراسة والعمل، مع إنترنت سريع وغرف اجتماعات مزوّدة بشاشات ذكية، بالإضافة لغرفة مخصصة لطلاب الهندسة والتصميم. وفي كمان اشتراكات للطلاب، ومشروبات وحلويات بترافقكن خلال ساعات الإنجاز.

الموقع: الجسر الأبيض، نزلة الطلياني، أول دخلة يمين، دمشق.

التواصل: 0987002688

6. ألباتشينو كافيه

وللي بيحبّوا يدرسوا أو يشتغلوا بأجواء هادية وأنيقة، ألباتشينو كافيه من الأماكن اللي بتستاهل تتعرّفوا عليها، مع جلسات مريحة وإنترنت فايبر سريع ومجاني، بيساعدكن تنجزوا دراستكن أو شغلكن عاللابتوب بكل راحة. ومع تشكيلة متنوعة من المشروبات والحلويات، يعني فيكن تستمتعوا بقعدة رايقة، سواء كنتوا عم تحضّروا لامتحان أو عندكن اجتماع صغير.

الموقع: أبو رمانة، ساحة المطاعم، دمشق

التواصل: 0945464363

وهلأ خبرونا… وين كافيهكن المفضّل للدراسة والشغل بدمشق؟

المزيد

قبة المعرفة: أول سينما تفاعلية متنقلة بدمشق.. تجربة جديدة ما بتشبه أي سينما

الفترة الأخيرة انطلقت بدمشق مبادرة “قبة المعرفة“، وهي أول سينما تفاعلية متنقلة بتقدم عروضاً بزاوية 360 درجة