6 مطاعم دافية في دمشق لقعدة شتوية مميزة

لما يبرد الجو بالشام، بتصير الطلعة بدها مطرح دافي، أكل طيب وقعدة بتحبوا تطوّلوا فيها. من بيت دمشقي قديم لأماكن بتطل عالشام من فوق، جمعنالكن 6  مطاعم دافية بدمشق بتليق بأجواء الشتوية، لغدا مع العيلة أو عشا وقعدة حلوة مع الرفقات.

1. دارمسك

إذا عبالكن أجواء شامية أصيلة، دارمسك بياخدكن لقعدة ببيت دمشقي دافي بقلب الشام القديمة. التفاصيل التراثية وروح المكان بيعطوا القعدة جو شتوي بجنن، وخصوصاً بأيام البرد لما بتكون طلعة الشام القديمة إلها نكهة خاصة.

المكان: دمشق القديمة، مدحت باشا، نزلة الدقاقين، باب الحديد.

2. المشرقية

المشرقية من الأماكن اللي قعدتها ما بتتكرر مع إطلالة ولا أحلى، بتفاصيل دافية ولمسات بتعطي المكان روح خاصة. مناسب لعشا هادي أو قعدة شتوية طويلة.

المكان: المزة، خلف مشفى المواساة.

3. حد الشباك

إذا بتحبوا تشوفوا الشام من فوق، حد الشباك بياخدكن عالطابق الـ11 بإطلالة بانورامية على دمشق. فيكن تبلشوا بفطور شامي، أو تختاروا من الأكلات الشرقية والغربية للغدا والعشا، وبالمسا بتكمل الأجواء على صوت العود.

المكان: الحمرا، فندق بلوتور، الطابق 11.

4. شيلان

شيلان من المطاعم اللي أجواؤها بتليق بالشتوية. القعدة الدافية وواجهة المطعم الزجاجية بيعطوا أيام البرد جو حلو، سواء كانت الطلعة غدا أو عشا مع الرفقات.

المكان: المزة، طريق بيروت الدولي، قبل طلعة الأكرم.

5. فرساي

فرساي بيعطيكن قعدة أنيقة واهتمام واضح بالتفاصيل، من ترتيب الطاولات لطريقة تقديم الأكل. لأجواء دافية وأصناف طيبة و متنوعة بتكمل أجواء السهرة. الشتوية

المكان: أبو رمانة، شارع الكرامة.

6. ياسمينا

أما إذا بدكن قعدة دافية مع إطلالة على دمشق، ياسمينا موجود بالطابق الرابع من فندق أمية، وعنده جلسات داخلية وتراس وبحرة. المنيو فيه وجبات وسندويشات، والمكان مناسب لغدا أو عشا مع منظر حلو للمدينة.

المكان: جادة البرازيل، فندق أمية، الطابق الرابع.

بالنهاية بـ الشتوية ، أوقات كل اللي بدنا ياه هو مطعم دافي بدمشق ، أكلة طيبة ورفقة حلوة تخلي القعدة تطوّل من دون ما نحس بالوقت.

وإنتو، أي مطعم بتحبوا قعدته أكتر بأيام البرد؟

المزيد بقسم وين نروح على موقعنا!