وين نروح
أهم المهرجانات و المعارض في دمشق اللي بتستاهل تزوروها هالصيف!
دمشق هالصيف مليانة بـ المهرجانات و المعارض المتنوعة، من الأنشطة العائلية والترفيهية، للأمسيات الشعرية ومعارض الكتب والصناعة والتجارة. جمّعنالكم أبرز الفعاليات المعلنة حتى تختاروا منها اللي بناسبكم.
1. مهرجان صيف سوريا
مهرجان عائلي وترفيهي بيجمع الفن والثقافة والأنشطة المخصصة للأطفال واليافعين، ضمن أجواء مليانة عروض مسرحية، ألعاب، أشغال يدوية وفعاليات متنوعة. ومن أبرز الفعاليات الموجودة بالمهرجان فعالية التاجر الصغير، اللي بتعطي الأطفال واليافعين فرصة يحولوا أفكارهم ومواهبهم لمشاريع صغيرة، ويعيشوا تجربة تجارية بطريقة ممتعة وتفاعلية.
المكان: مدينة الفيحاء الرياضية في دمشق
التفاصيل والمواعيد الكاملة بعد ماتحددت بتلاقوها عبر الصفحة الرسمية أول ما يعلنوا عنها.
2. مهرجان ربيع دمشق يبدأ من هنا
مهرجان بيجمع التسوق والترفيه ولمة العيلة والأجواء الدمشقية بمكان واحد. فيكم تتمشوا بين المساحات التجارية والمنتجات المختلفة، و تقضوا وقت حلو مع العيلة والرفقات ضمن حديقة الأمويين.
المكان: حديقة الأمويين في دمشق
للتعرف على المواعيد والتفاصيل تابعوا صفحتهم لتكونوا أول الحاضرين.
3. مهرجان دمشق الدولي للشعر العربي
فعالية ثقافية جديدة بتستعد دمشق لاستضافتها خلال شهر آب 2026، وبتجمع محبي الشعر والأدب العربي من سوريا ومختلف البلدان. المهرجان بدورته الأولى وبرعاية وزارة الثقافة السورية، ومن المتوقع إنه يتضمن أمسيات شعرية ولقاءات ثقافية ومساحات بتجمع الشعراء والأدباء والجمهور المهتم بالكلمة العربية.
الموعد: خلال شهر آب 2026
لمتابعة آخر التفاصيل والإعلانات: تابع الصفحة الرسمية
4. معرض دمشق الدولي
بيرجع معرض دمشق الدولي بدورته الثالثة والستين، ليجمع الشركات والفعاليات الاقتصادية والثقافية والتجارية من سوريا ومختلف دول العالم. المعرض مو بس فرصة لأصحاب الأعمال والشركات، وإنما كمان وجهة مناسبة للزوار اللي بيحبوا يتعرفوا على المنتجات الجديدة، الأجنحة الدولية والفعاليات المرافقة.
المكان: مدينة المعارض في دمشق
الموعد: من 26 آب وحتى 4 أيلول 2026
5. معرض الكتاب في أبو رمانة
لكل مين بيحب القراءة وشراء الكتب، في معرض كتب متنوع بالمركز الثقافي العربي بأبو رمانة، وبيضم كتب بمواضيع واهتمامات مختلفة ومناسبة لمختلف الأعمار.
المكان: المركز الثقافي العربي في أبو رمانة
المعرض مستمر لغاية 25 تموز 2026
6. معرض إديو سوريا إكسبو
إذا كنت عم تفكر تكمل دراستك برا سوريا، فمعرض إديو سوريا إكسبو 2026 بيعطيك فرصة تلتقي بشكل مباشر مع ممثلين عن جامعات من تركيا وقبرص الشمالية ودول تانية، وتتعرف على الاختصاصات، شروط القبول، المنح الدراسية والسكن الجامعي وإجراءات السفر. المعرض عامل جولة بعدة محافظات سورية، وبيوصل إلى دمشق بتاريخ 25 تموز في فندق الشام. وكل شخص بيسجل مسبقاً وبيحضر المعرض، بيدخل بالسحب على مجموعة من الجوائز، من بينها منح دراسية مجانية بالكامل، وهواتف آيفون وأجهزة لابتوب. للمشاركة، لازم التسجيل عبر الرابط الموجود بصفحات ستدي مور، وبعدها الحضور إلى المعرض بالموعد المحدد.
المكان: فندق الشام في دمشق
الموعد: 25 تموز 2026
للتسجيل والتفاصيل: Study More Tartous – Study more
واضح إنو صيف دمشق هالسنة مليان مواعيد حلوة وتجارب متنوعة، وكل فعالية إلها جوها الخاص وناسها. اختاروا اللي بناسبكم، اتفقوا مع رفقاتكم أو العيلة، وخلو هالصيف مليان طلعات وذكريات حلوة بالشام. ولا تنسوا تتابعوا الصفحات الرسمية قبل الزيارة، حتى تتأكدوا من آخر المواعيد وأي تحديثات جديدة.
الأكثر قراءة هالشهر
أمثال ما بتسمعها إلا بالشام
١٣ سبتمبر ٢٠٢٤
القاموس الشامي: مفردات ومصطلحات اللهجة شامية
٣٠ يوليو ٢٠٢٤
أفضل مراكز تعلم اللغات في دمشق
٠١ أكتوبر ٢٠٢٤
احتفل بمناسبتك بأرقى وأجمل صالات الافراح ب دمشق
١٨ سبتمبر ٢٠٢٤
أشهر محلات الحلويات بدمشق: طعمة بتخليك ترجع كل مرة!
٢٤ سبتمبر ٢٠٢٤
