وين نروح
5 أماكن لمحبين الرسم و الفنون التفاعلية بالشام
إذا كنت بتحب الرسم، الأشغال اليدوية، أو أي نشاط بيطلع الطاقة الحلوة يلي جواتك، فدمشق صارت مليانة أماكن بتقدّم تجارب فنية ممتعة ومختلفة. من الرسم على الفخار والكانفاس، لورشات التزيين والطباعة والأنشطة الجماعية، فيك تقضي وقت لطيف، تجرب شي جديد، وتطلع بقطعة فنية من صنع إيدك وذكرى حلوة مع أصحابك. ولهيك جمعنالك أبرز الأماكن بالشام يلي بتخليك تعيش تجربة الرسم و الفنون بطريقة حلوة ومميزة.
1. رِواق
رِواق مساحة فنية بدمشق بتجمع بين الإبداع اليدوي والورشات التفاعلية. بتناسب كل حدا حابب يجرب الرسم أو يصنع قطعة فنية بإيده ضمن جو لطيف وهادي. المكان فكرته إنك تعيش تجربة مختلفة وتطلع بذكرى حلوة، حتى لو ما عندك خبرة سابقة بالفن.
العنوان: باب توما، مقابل قهوة عالمفرق
2. إيرور كافيه
إيرور كافيه مو بس مكان للقعدة والمشروبات، هو كمان مساحة فيها أنشطة فنية وترفيهية مثل الفخار، الرسم، ورشات الخزف والسيراميك، بالإضافة لألعاب البلياردو والجاكارو والشدة. المكان مناسب للي بدهن قعدة مليانة فن و فيها حركة وتجارب مختلفة مع الرفقات، خصوصاً مع الفعاليات الفنية يلي بتتنظم بالتعاون مع فنانين وورشات محلية متل توما أتيليه، ليقدّم تجارب متنوعة بالأعمال اليدوية والإبداعية المميزة.
العنوان: باب شرقي، العازرية، بناء موناليزا، الطابق الأول
3. ميراكي
ميراكي بتقدم ورشات فنية متجددة بشكل مستمر، من تزيين المرايا والرسم على الحقائب القماشية، لتزيين الكيك والقبعات وغيرها من النشاطات الإبداعية. كل ورشة بتعطي المشاركين فرصة يعيشوا تجربة مختلفة ويصنعوا شي مميز بإيدهن ضمن أجواء مرحة ومليانة طاقة إيجابية.
العنوان: مشوار، مشروع دمر والربوة، طريق الربوة، جانب مأكولات الشام
4. بينغوين فاميلي
بينغوين فاميلي مجتمع فني بيجمع محبي الرسم والورشات التفاعلية بأجواء دافية وبسيطة. نشاطاتهم متنوعة بين الرسم على الكانفاس، الحقائب القماشية، الأواني الزجاجية والفازات الفنية، وكل ورشة بتكون بتجربة مختلفة وبمكان جديد ضمن دمشق.
العنوان: يتم الإعلان عن موقع كل ورشة مسبقاً عبر الصفحة
5. كنكون
كنكون مساحة فنية مختلفة بتجمع بين الرسم والقهوة والماتشا ضمن أجواء هادئة ومريحة. فيك تختار الرسم على الفخار أو الدباديب أو أو الفازات أو حتى اللوحات الفنية، وما في أي ضرورة تكون عندك خبرة مسبقة بالرسم. المكان مصمم ليكون مساحة للاسترخاء والإبداع بعيداً عن ضغوط الحياة اليومية.
العنوان: تنظيم كفرسوسة، دمشق
بالنهاية إذا بدكن تفصلوا شوي عن ضغط اليوم وتجربوا شي جديد، هالأماكن بالشام بتعطيكن فرصة تعيشوا الفن بطريقة بسيطة وممتعة إذا بتحبوا الرسم الفنون. اختاروا النشاط يلي بيشبهكن، وروحوا اصنعوا ذكرى حلوة بإيديكن.
الأكثر قراءة هالشهر
أمثال ما بتسمعها إلا بالشام
١٣ سبتمبر ٢٠٢٤
القاموس الشامي: مفردات ومصطلحات اللهجة شامية
٣٠ يوليو ٢٠٢٤
أفضل مراكز تعلم اللغات في دمشق
٠١ أكتوبر ٢٠٢٤
احتفل بمناسبتك بأرقى وأجمل صالات الافراح ب دمشق
١٨ سبتمبر ٢٠٢٤
أشهر محلات الحلويات بدمشق: طعمة بتخليك ترجع كل مرة!
٢٤ سبتمبر ٢٠٢٤
