3 منتزهات جديدة لتعيشوا أحلى أجواء بالصيفية

الصيفية ما بتحلى غير بطلعة حلوة مع العيلة أو الرفقات، قعدة بين أحضان الطبيعة، نسمة هوا، شوية ألعاب للولاد، مع نقاريش وأكلات بتكمل المشوار. وإذا كنتوا عم تدوروا على أماكن جديدة ومناسبة لتعيشوا يوم لطيف بعيد عن زحمة المدينة، جمعنالكم 3 منتزهات جديدة حواين دمشق وريفها، فيكم تزوروهن وتعيشوا أجواء صيفية بتفتح النفس.

1. منتزه السمرة

إذا بتحبوا الطبيعة والهدوء، منتزه السمرة بالزبداني خيار كتير حلو. المكان بأحضان طبيعة الزبداني الخلابة، وبيناسب العائلات يلي بدها تقضي يوم مريح بين الشجر والهوا النضيف وجنب بحرة المي.

في عندن جلسات عائلية، ألعاب للأطفال داخلية وخارجية، ومكان مخصص للشوي، وفي صاجيات، مشروبات وغيرها يعني فيكم تعملوا طلعة كاملة من أول النهار لآخره. وكمان متوفر مصلى للنساء، وهالشي بيخلي المكان مريح أكتر للعائلات.

أيام الدوام: الخميس، الجمعة، السبت
العنوان: الزبداني، ريف دمشق، شارع نبع بردى الرئيسي

للاستعلام: 0983818725

2. منتزه صحنايا

صحنايا بارك من الأماكن المناسبة إذا بدكم طلعة فيها حركة وفرح وألعاب. المكان موجه للعائلات، وفيه أجواء ترفيهية حلوة للأطفال والكبار، خصوصاً إذا بدكم مشوار خفيف وقريب من دمشق.

المنتزه بيقدم ألعاب ممتعة، أجواء آمنة، ومكان مناسب لتقضوا وقت لطيف وتعملوا ذكريات حلوة مع أولادكم. يعني إذا الولاد زهقانين وبدهن تغيير جو، هالمكان ممكن يكون خيار موفق.

أوقات الدوام: مفتوح يومياً من الساعة 10 صباحاً حتى 11 مساءً
العنوان: صحنايا، شارع الكازية، خط السرافيس، بجانب جامع السويد
للاستفسار: 0936330727

3. منتزه الصفصاف

منتزه الصفصاف بدمر هو من الأماكن يلي بتجمع بين القعدة الحلوة والطبيعة القريبة من المدينة. المميز فيه إنو الجلسات على ضفة نهر بردى، وفي كمان جلسات على البحرات، يعني الأجواء بتكون رايقة ومناسبة لطلعة عائلية أو قعدة مع الأصحاب.

المكان فيه ألعاب للأطفال، مكان للشوي، وكراج للسيارات، ومسموح ادخال الاكل ولوازم السيران وهي تفاصيل كتير مهمة بأي طلعة عائلية.

العنوان: دمشق، دمر، بعد كازية الدولة

للاستفسار: 0992202254

سواء كنتوا حابين طلعة على الزبداني بين الطبيعة، أو مشوار ترفيهي للأطفال بصحنايا، أو قعدة رايقة بدمر على ضفة بردى، هالـ منتزهات الثلاثة الـ جديدة بيعطوكم خيارات حلوة للصيفية. جهزوا أغراضكم، لمّوا العيلة، وخلوا هالصيف مليان مشاوير وذكريات حلوة.

المزيد في قسم منتزهات دمشق على موقعنا