كول وشكور
أطيب فطور بدمشق؟ جربوا بهالمطاعم يلي بتحبّبكم بالصباح!
ما في أطيب من فطور شامي على أصولو ليبلّش في الواحد نهاره. لقمة طيبة، قعدة رايقة، وريحة الخبز اللذيذة… هدول التفاصيل الصغيرة يلي بتخلّي صباحك أحلى صباح. لهيك جمعنالك هون 10 مطاعم وكافيهات بقدموا فطور مميز بدمشق، بتنوعها، نكهتها، وجوها، لتختار منها المكان يلي بناسب مزاجك ومشوارك:
1. مطعم بون بون
فطورك لازم يكون مُرتّب… متل ما بتستحق!
بـ بون بون، كل تفصيل معمول بحب. الفطور شامل وأنيق، بيتضمن: فتة بسمنة، فول، بيض، توست، منقوشة، جبنة مشكّلة، لبنة، شنكليش، زيتون، مربيات، زبدة، صحن خضار، وكاسة شاي بتكمل الطاولة. المكان رايق بقعدة ولا أحلى ومناسب للصحبة أو موعد صباحي.
العنوان: تنظيم كفرسوسة – دامسكينو مول – ردهة المطاعم B2
للحجز: 0999830891
2. مطعم سلطان الشام
فطور مدلل من أيدين الشام… والجو بيسحر!
بموقعه بساحة عرنوس، سلطان الشام بيجمع بين الفخامة والدفء. فطور شامي متنوّع، قعدة مرتبة، وخدمة من القلب. مثالي لفطور عيلة، أو قعدة هادية بعيد عن الزحمة.
العنوان: ساحة عرنوس
للحجز: 0964450888 – 0119654
3. مطعم أمولة
لمة، نكهة، وأطباق بتغني عن الوصف
“أمولة” بيقدملك من كل صنف طبق، من العصائر الفريش للفطورات البيتية والحلويات. المكان مثالي للصبايا، العائلات، وكل حدا بيحب يبلّش يومه بلذّة حقيقية.
العنوان: المالكي
للحجز: 011 374 25 27–+963 935 808 487
4. مطعم جولياز
فطور شامي أصيل بـ ١٤ صنف بيرضوا كل الأذواق
فطور جولياز متنوّع: نقانق، حُمص، فلافل، لبنة، بيض، زيتون، معجنات، مربى، شاي، وتحلاية من اختيار الشيف. القعدة بتفتح النفس، والمكان راقي بخدمته وجوّه.
العنوان: تجهيز – جانب وزارة الصناعة – فندق أمية
للحجز: 0940002500
5. ايميسا كافيه
أول بوفيه فطور بمشروع دمر… الطعمة بتحكي لحالها
المكان دافي وبيجمع الهدوء مع لمسة عصرية. البوفيه غني بالأصناف والنكهات يلي بتخلي الصبح لحظة انتعاش حقيقية.
العنوان: مشروع دمر – سوق الشام – المنسوب السادس
للحجز: 0942228333
6. غولدن بيكري
فطور، غدا، أو حتى سناك؟ هون بتلاقي كل شي بطعمة جديدة
بالـمزة، غولدن بيكري عم يقدملك فطور بيشبّه أجواء البيت وبلمسة عصرية. فطور مرتب، مكونات فريش، وجلسة بتخلي صباحك غير.
العنوان: المزة – جانب المصرف الإسلامي
7. بي دور كافيه
لكل صباح حلو… لازم يكون فيه فطور من بي دور
بيقدّم تشكيلة فرنسية ومتوسطية، بجلسة أنيقة وأجواء فيها هدوء وأناقة. القعدة بتفصلك عن كل شي، والأكل بيروّق النفس.
العنوان: أبو رمانة – ساحة المطاعم
للحجز: 0993600700
8. ڤيلادور
ڤيلادور يعني فطور غني وأجواء ولا أحلى!
المنيو بيكفي شخصين أو أربعة، وبيشمل تسقية، مناقيش، فول، بيض، لبنة، زيتون، جبنة، مسبحة، مربى، شاي. المكان فخم ومناسب لجمعة الصحبة.
العنوان: بوليفارد فورسيزن – الطابق الأول
للحجز: 0950005363
9. دار مسك
لمة شامية عأصولها… وفطور ما بينتسى
فطور دار مسك أصيل وغني، من الفتة السورية للمسبحة والبيض وكل طعم بيحكي عن دمشق. المكان بقلب الشام القديمة، وفيه روح بتاخدك لمكان تاني.
العنوان: الشام القديمة – باب الحديد – نزلة الدقاقين
للحجز: 0950544544 – 0115440000
10. جولي
فطور بنكهة الهدوء… وتفاصيل بتحكي أناقة
بـ باب توما، جولي بيقدملك جلسة راقية وفطور مرتب، بأجواء فيها سحر الشام القديمة وضيافة دمشقية أصيلة. القعدة فيها صفا، وكل لقمة محضّرة بإتقان.
العنوان: باب توما – القيمرية – طلعة الشاويش
للحجز: 0932835111 – 0944580371
الفطور مو بس وجبة… هو لحظة راحة، قعدة على مهل، وكاسة شاي بتبدا فيها نهارك. جرب واحد من هالمطاعم بدمشق لألذ فطور، وخلّي صباحك يكون بداية لحكاية حلوة. وإذا جربت، خبرنا بالتعليقات وين كانت أحلى قعدة بدمشق
الأكثر قراءة هالشهر
أمثال ما بتسمعها إلا بالشام
١٣ سبتمبر ٢٠٢٤
القاموس الشامي: مفردات ومصطلحات اللهجة شامية
٣٠ يوليو ٢٠٢٤
أفضل مراكز تعلم اللغات في دمشق
٠١ أكتوبر ٢٠٢٤
احتفل بمناسبتك بأرقى وأجمل صالات الافراح ب دمشق
١٨ سبتمبر ٢٠٢٤
أشهر محلات الحلويات بدمشق: طعمة بتخليك ترجع كل مرة!
٢٤ سبتمبر ٢٠٢٤
