4 مطاعم لطلعات الأصدقاء بالعيد بدمشق

العيد مو بس زيارة ولبس جديد… العيد هو لمة رفقات العمر، قعدة طويلة، وضحكة من القلب مع أكل بيعدل المود.. وإذا عم تدور على مطاعم بدمشق تناسب طلعة الأصدقاء بالعيد، لفطور صباحي مرتب أو غدا مشبع بطابع شبابي، هي أربع أماكن مختارة بعناية لحتى تعيشوا تجربة كاملة وتوثقوا يومكن بأحلى صور:

1. مطعم وكافيه أشارد

إذا بدكن فطور شبابي بقعدة مريحة وأجواء حيوية، أشارد بيعرف كيف يستقبل الشلة. من البيتزا المميزة للمعجنات اليومية والأطباق الغربية اللذيذة، المنيو مناسب لفطور خفيف أو غدا متأخر. المكان مقسم بطريقة عملية، في قسم هادئ للجلسات الرايقة، وقسم ترفيهي فيه ألعاب بلايستيشن بيضيف جو مرح على الطلعة. الخدمة سريعة والتنظيم واضح، وهاد الشي بيخليه خيار ممتاز بطلعات العيد يلي فيها عدد كبير وأجواء احتفالية.

الموقع: دمشق، المزرعة، نادي الوحدة الرياضي، فوق ملاعب كرة القدم
رقم التواصل: 0934010707

2. مطعم وكافيه غاردن

مطعم غاردن هو المكان يلي بيجمع بين الأكل والتسلية بنفس الوقت. أطباق شرقية وغربية، بيتزا بنكهات متعددة، سندويشات ومعجنات مناسبة لكل الأوقات، وقعدة واسعة مريحة بتستوعب المجموعات الكبيرة. الشي المميز بهالمكان هو وجود صالات بولينغ وبلياردو، يلي بتحول الغدا أو الفطور لنشاط ممتع مليان ضحك وتحدي. إذا بدكن طلعة عيد مختلفة تجمع بين الأكل والمرح، غاردن خيار متكامل بامتياز.

الفرع الأول: دمشق، المزرعة، نادي الوحدة الرياضي.
الهاتف: 4438482 – 4438484.

الفرع الثاني: دمشق، الميدان، ماسة بلازا مول.
الهاتف: 0950500222.

الفرع الثالث: دمشق، فيكتوريا، لا ميرادا.
الهاتف: 0943411255.

3. مطعم برلنت

إذا عم تدور على فطور صباحي دمشقي أصيل بطابع راقٍ، مطعم برلنت هو العنوان المناسب. تجربة الفطور عنده مو بس أكل، هي جلسة مرتبة بإطلالة جميلة ونكهات غنية بتخليك ترجع تكرر الزيارة بدون تفكير. السفرة الصباحية عامرة بأصناف شامية محضرة بعناية مثل الفتة بالسمنة، الفول بالزيت، الفلافل، المكدوس، اللبنة المدعبلة، الأجبان بأنواعها، الزيتون، المناقيش المشكلة، المربى، الزبدة وصحن الخضار المشكل، إضافة لتحلاية وشاي بيكملوا القعدة على أصولها. المكان مناسب لتجمعات الأصدقاء صباح العيد، خاصة إذا بدكن فطور يشبع ويكون فيه تنوع يرضي كل الأذواق.

الموقع: دمشق، أوتوستراد المزة، جانب وزارة الإعلام
رقم التواصل: 0116662409 – 0116662406

4. مطعم شاورما آرت

شاورما آرت بالمزة عم يقدم مفهوم مختلف للشاورما بطابع عصري وجودة واضحة. شاورما دجاج ولحمة بنكهات غنية وتقديم عصري، إضافة لبيتزا مميزة بتخلي الخيارات أوسع من مجرد سندويشة سريعة. المكان نظيف ومرتب وفيه صالتين أكل، فالقعدة مريحة سواء كنتوا مجموعة شباب أو مع العائلة، وكمان في صالة ألعاب للأطفال. إذا بدكن غدا مشبع بطعم قوي وتجربة مختلفة بهالعيد، شاورما آرت بيستاهل يكون على لائحتكم.

الموقع: دمشق، المزة، دوار الشرقية، نزلة جامع الأكرم، دخلة بارفيه
رقم التواصل: 0953281121 – 0116116226 – 0116116227

عجبكم هالمقال عن مطاعم لطلعات الأصدقاء بالعيد بدمشق؟ شوفوا المزيد بقسم مطاعم على موقعنا!