كلمات شامية قديمة إذا عرفتها فأنت شامي أصلي!

في كلمات شامية قديمة، أول ما تسمعها… بتعرف فوراً إنها طالعة من حواري الشام، من البيوت الطيبة، ومن الناس اللي بتحكي بعفوية وباللهجة الشامية الأصلية. مو كلها لسه دارجة بالحكي اليومي، بس أكيد سمعتها من التيتة، من الجيران، أو من مسلسلات البيئة الشامية! كلمات ما بتنقال صدفة، وكل وحدة فيها نغمة، موقف، وتعبير دقيق ما بتلاقيلو بديل.

إذا فهمت معناها بدون شرح، أو استعملتها بيوم من الأيام، فإنت شامي أصلي عنجد… جاهز تشوف كم وحدة بتعرف؟

مصدر الصورة: Safaraq

مْعكا
يعني خلط شي مع بعضو منيح… متل لما تعجن العجينة بإيدك وبتدعكها دعك.

لطعو
يعني خلّى حدا ناطر كتير بدون ما يرد عليه… “لطعني ساعة وما إجا!”

اتدحوش
يعني انحشر وعم يحاول يقرب أو يتقرب من حدا وهو غير مرغوب فيه.

بلّط
يعني ضل قاعد بمكان و طول بالقعدة كتير… ومو ناوي يغادر!

التبش
يعني انشغل بشي فجأة، وضاع بين الأفكار وما عاد عرف شو بدو يعمل.

انطوش
يعني من كتر الأصوات والضجة، راسو صار يلف وما عاد فهم شي.

طلع من عيونو عامص
يعني شي فرحو كتير بس صار شي ثاني عكّر عليه كل الفرح.

زحل عئلو
يعني اندهش أو فرح لدرجة إنو حس حالو طار عقله من الفرحة.

بلكي / بركي / بركدن
يعني احتمال، يمكن، شو رأيك؟ كلها بنفس المعنى.

طأطئت زلعيمو
تعبير عن العطش الشديد.

مدهرنة
بنت صغيرة، بس بتتصرف متل الكبار… لبس ومشية وحكي.

مسرسب
يعني مهووس بالنظافة والترتيب… ما بيرتاح إلا وكل شي بمكانه.

كحته
شخص بخيل كتير

مدربس
وصف لحدا قصير وسمين.

تكة
يعني لحظة صغيرة، دقيقة وبرجعلك.

مخستك
تعبير عن التعب أو المرض الشديد…

مرستأ
مرتب وأنيق، كل شي بمكانه وبيفتح النفس.

على ملا وشو
يعني طلع بسرعة كبيرة، مستعجل مو شايف قدامو.

عم يوج وَج
يعني نضيف وعم يلمع… متل البلور.

خوش بوش
يعني العلاقة قديمة وبتعرف هالشخص منيح، بعد عشرة طويلة..

شأفة
جزء صغير من شي… متل قطعة من خبز أو كيك أو قماش.

مأنبز
شايف حالو، مغرور، وحاسس إنو هو شي كتير كبير!

فتل راسو
يعني داخ أو دوّخوه، ما عاد عرف وين هو.

انطمز
يعني نزعج من شي وما عبّر، بس مبين عليه.

تكمكر
يعني لف حالو بالحرام، تقوقع من البرد.

مسح فيه الأرض
يعني بهدل حدا بالكلام أو التصرف…

لعالو قلبو
يعني حكى كتير لدرجة تعبنا من كتر الحكي.

ملبصن لبصنة
وصف للأكل يلي قوامه مو ظابط… سميك ومعجّن ومو طيب.

فصعون
وصف بيدل عن ولد صغير.

بارم وشو
يعني مكشر ومو طايق حدا… باين عليه الزعل.

طاقه فيوزاتو
يعني فقد السيطرة، وتصرف بطريقة غريبة ما بتناسب عمره.

نكت الخمير والفطير
يعني قال كل شي كان مخبيه… طلع كل الأسرار.

بق البحصة
يعني حكى شي كان ساكت عليه من زمان… وارتاح.

آل يعني
تقال للسخرية، كأنو عم يستخف بشي أو حدا.

هيك! مراء عصبي
تستخدم لإنهاء الحوار.

عيّ
يعني قيل وقال، حكي الناس الفاضي.

شيه!
تعبير عن الاستغراب من تصرف أو حكي حدا.

ما بزلّ عليك
يعني متأكد من حكيي، بس ما رح أحلف بصريح العبارة.

نخر بدنو
يعني سمعو حكي مزعج أو لاحق حدا بطلباته لدرجة طفّشو منه.

إذا ضحكت، تذكرت، أو فهمت بدون شرح… فـ مبروك إنت شامي أصلي.

 إذا انبسطت بهالمقال عن كلمات شامية قديمة ، تأكد تزور قسم #بالشامي على موقعنا لتشوف المزيد!