حمام السلسلة: جلسة مساج تراثية بلمسة عصرية لتعيشوا أحلى تجربة بالشام!

إذا كنت من محبي الأجواء الدمشقية القديمة وبدك تجربة حقيقية تجمع بين التراث والراحة، “حمام السلسلة” هو المكان الأنسب إلك! من أقدم الحمامات في دمشق، واللي عمره أكتر من 925 سنة، تأسس عام 1100م، وبيعتبر واحد من أبرز معالم دمشق القديمة. ويلي مازالت عاملة لوقتنا الحالي.

سبب تسمية “حمام السلسلة”:

الاسم جاية من قصة تاريخية، لما السلطان العادل أمر يحط سلاسل حديدية على طريق الجامع الأموي، حتى يمنع الأمراء من الوصول لبواب الجامع على خيولهم. السلاسل كانت موجودة قدام الحمام، ومن هون اجا اسم “حمام السلسلة”.

ديكور تراثي يعبق برائحة التاريخ

الديكور في “حمام السلسلة” بيحمل طابع دمشق القديمة من الحجر العتيق وأقواسها الجميلة، لكل زاوية بتحكي قصة من قصص الماضي. الأرضيات من الرخام الدمشقي المزخرف، والأعمدة القديمة اللي بتضيف لمسة فخامة على المكان.. للنوافذ الخشبية والزجاجية الملونة يلي بتسمح بمرور ضو الشمس، و بتزيد من الهدوء والراحة النفسية. المكان كله يعبق بالأجواء الشرقية، البخور والعطور بكل مكان والبحرة بتعطي أجواء وروح دمشقية تراثية حلوة.

الجو بهالحمام مليان بالروح الدمشقية الأصيلة، لكن مع لمسة عصرية بتخلي التجربة مميزة.

التجربة: من البخار للتكييس والمساج

التجربة بتبلش من تبديل الملابس وبعدها بتلبس المنشفة والقبقاب وبتنتقل للمرحلة الأولى اللي هي البخار. بتدخل غرفة البخار لمدة 10 دقايق لتفتح مسامات الجسم وبتستعد للمرحلة التانية. بعدها بتنتقل لمرحلة “التكييس” اللي هي عبارة عن تنظيف الجسم باستخدام الليفة والصابونة والشامبو طبعاً في شخص مختص بهالمرحلة واسمو المكييس. بعدين، بيجي دور المساج للاسترخاء والتخلص من التوتر. وبالآخر بتغيير المناشف، وبتشرب استكانة شاي إكرك عجم أو زهورات اللي بترد الروح و بتكمللك التجربة الحلوة.

أوقات الدوام :بيستقبلكم حمام السلسلة يومياً من الساعة 10 صباحاً حتى 3 صباحاً وفيه أوقات مخصصة للنساء بحجز مسبق حصراً. و أوقات مخصصة للرجال.

تكلفة الحمام : 60 ألف ليرة سورية

وإذا حابب تكمل التجربة ، اطلب وجبة مجدرة مع سلطة و لبن ومخلل من مطبخ الحمام، بسعر 40 ألف ليرة للوجبة.

الموقع والعنوان:

العنوان: خلف قلعة دمشق – الكلاسة – جانب الباب الشمالي للجامع الأموي.
للاستفسار والحجز: 0998900270 / 0942220279

تجربة حمام السلسلة: مزيج بين التراث والراحة

بتستنى لحظات راحة واستجمام بلمسة عصرية؟ جربوا “حمام السلسلة” وعيشوا أجواء دمشقية رائعة.

زوروا كمان فندق الشام التراثي على موديل باب الحارة.