كافيه مخيف بالقيمرية: مشروبكن من شباك مرعب!

تخيّلوا تطلبوا مشروبكن المفضّل، وفجأة تطلعلكن إيد مخيفة من شباك صغير لتقدّملكن الطلب! مو مشهد من فيلم رعب، إنما تجربة كافيه غريبة ومسلّية بتنتظركن بقلب القيمرية بدمشق القديمة، وتحديداً بمحل «طاقة»، يلي جاب فكرة جديدة ومختلفة لعالم الكافيهات بالشام!

من ترند عالمي لتجربة جديدة بدمشق

الفكرة مستوحاة من ترند وتجارب مشابهة انتشرت بماليزيا وإيطالي. وصلت لأول مرة لسوريا بمحل طاقة، يلي اختار يضيف لمسته الخاصة ويوسّع خيارات المشروبات والحلويات. وبمجرد ما تختاروا طلبكن، بتبدأ المفاجأة مع ظهور إيد الوحش الغامضة من خلف الشباك لتناولكن الكاسة. الأجواء بتجمع بين الغموض والمرح. وهيك بتتحول لحظة بسيطة متل استلام المشروب لموقف طريف، خاصة إذا كنتوا مع رفقاتكن وعم تكتشفوا الفكرة لأول مرة!

شو فيكن تجرّبوا عند طاقة؟

المحل بيقدّم تشكيلة متنوعة من المشروبات، وأشهرها المشروب البنفسجي المصنوع من ميكس بيري والفريز واللبن اليوناني، واللي بيلفت النظر بلونه الجميل ومكوناته المختلفة ونكهته المميزة. وإذا بتحبوا الحلويات، فيكن تجرّبوا الكوكيز كمان، و تختاروا شي حلو يرافق مشروبكن. ولا تنسوا توثّقوا ردّات فعل رفقاتكن بفيديو، خاصة إذا ما بيعرفوا مسبقاً شو ناطرن!

تمشاية بالقيمرية وتجربة غير تقليدية

وجود طاقة بقلب القيمرية بيخلّي زيارتكن فرصة لتستمتعوا بتمشاية بين حاراتها الجميلة وبيوتها الدمشقية العتيقة ومحلاتها التراثية. اتكتشفوا سحر الشام القديمة بكل تفاصيلها.

فإذا كنتوا عم تفتشوا عن مكان جديد تضيفوه لجولتكن بالشام القديمة، مرّوا على طاقة وخبرونا شو رأيكن بالفكرة!

الموقع: القيمرية، جانب ورد الشام، دمشق القديمة.

المزيد في قسم المقاهي.