6 مطاعم مناسبة للعيلة بدمشق وفيها مساحة مريحة للأطفال

لما تكون الطلعة عائلية، مو بس الأكل الطيب هو المهم… كمان بدك مكان ترتاح فيه، والأطفال يكون إلهم زاويتهم الخاصة ليلعبوا وينبسطوا بدون ما تضل طول القعدة مشغول فيهم. ولحسن الحظ، بدمشق في أكتر من مطعم جمع بين الأجواء الحلوة، الأكلات الشهية، والمساحات المخصصة للصغار. وهون جمعنالك 6 مطاعم بدمشق مناسبة للعيلة، فيك تقضي فيها وقت حلو وهادي، والولاد كمان ياخدوا نصيبهم من المتعة:

1. مطعم رمان

إذا بتحب الجلسات الراقية يلي فيها لمسة شرقية عصرية، مطعم رمان خيار حلو للطلعات العائلية. المنيو عندهم متنوع بين الأطباق الشامية والغربية، وكل طبق بيتقدم بطريقة مرتبة ونكهات مدروسة. والأهم بالنسبة للأهالي، إنو المطعم فيه صالة ألعاب خاصة للأطفال، ليقدروا يقضوا وقتهم باللعب ضمن مساحة مريحة، وإنت تستمتع بقعدتك وأكلك على رواق.

كفرسوسة – دخلة وزارة الخارجية
2139333 / 0930039210

2. مطعم القرية

إذا بدكم طلعة عائلية وسط الطبيعة وبعيدة عن زحمة المدينة، مطعم القرية بيستقبلكم بمساحات خضرا، ورد، بحرات، نواعير وشلالات مي بتعطي المكان جو هادي ومريح. القعدات موزعة بين أحضان الطبيعة، وفي جلسات بتطل عالنواعير، مع تفاصيل مميزة مثل الطاولات المصممة على شكل سفن. وكمان في مكان مخصص لألعاب الأطفال، لحتى الصغار ينبسطوا والكبار يستمتعوا بالقعدة على رواق.

طريق المطار – الجسر الخامس

0992020513

3. مطعم كروكس – الزعفران

بكروكس – الزعفران، التفاصيل الصغيرة هي يلي بتعطي المكان روحه. الجلسات دافئة، الديكور بسيط ومرتب، والمنيو بياخدك بعالم من الأكلات الشامية المحبوبة، من المشاوي والحمص والفتوش، للكبب والسلطات والنكهات الأصيلة. أما الأطفال، فإلهم عالم لحالن! في غرفة ألعاب مجهزة وآمنة بإشراف مختصّات، وفيها نشاطات متنوعة مثل التلوين والمعجون ومسبح الطابات والمتاهة والألعاب الذكية. يعني الولاد مبسوطين، وإنت فيك تكمل قعدتك براحة.

مشروع دمر – الجزيرة ٩
0995001008

4. مجمع ومطعم قرنفل السياحي

إذا كانت جمعتكم كبيرة وبدكم مكان واسع، قرنفل من الخيارات المناسبة جداً. فيه جلسات داخلية وخارجية فخمة، وتشكيلة من الأكلات الشامية يلي بتفتح النفس، من المشاوي والشرحات للصفيحة وغيرها من الأصناف. المكان مجهز كمان بتراس واسع، وصالة داخلية أنيقة، وكراج خاص، والخدمة فيه مرتبة من أول ما توصل لحد ما تخلص سهرتك. وبالنسبة للصغار، في صالة ألعاب كبيرة بتعطيهم مساحة يتحركوا ويلعبوا فيها، وبتعطي الأهل فرصة يقضوا وقت أهدى وأريح.

مشروع دمر – الشارع الرئيسي
0933299920 / 0933909475

5. مطعم غولدن روز

غولدن روز من الأماكن يلي بتناسب الغدا العائلي، العزايم، وحتى المناسبات والاحتفالات. أجواؤه راقية ودافئة بنفس الوقت، والمنيو واسع وفيه مأكولات شرقية وغربية، فكل واحد بالعيلة غالباً رح يلاقي الطبق يلي على ذوقه. ومع وجود صالة ألعاب مخصصة للأطفال، صارت التجربة أريح للعائلات، لأنو الكبار فيهم يستمتعوا بوقتهم، والصغار عندهم مساحة خاصة للعب والتسلية.

دمشق – المزرعة – نادي الوحدة
011447355 / 0933311134 / 0933209500

6. مطعم نسمة شام

إذا بدكم طلعة عائلية بعيدة شوي عن ضجة المدينة، نسمة شام بيعطيكم جلسة مريحة وسط أجواء فيها روح الطبيعة والهدوء، وبيخلي الزيارة مناسبة للغدا، السهرات، واللمات العائلية الحلوة. المكان بيجمع بين الجلسات الشامية والأجواء الطبيعية المريحة، ومع منيو متنوع من الأطباق الشرقية والغربية، كل شخص بالعيلة بيقدر يلاقي شي على ذوقه. ولحتى تكتمل الطلعة، في صالة ألعاب خاصة للأطفال، ليلعبوا وينبسطوا، وإنتوا تستمتعوا بالأكل والقعدة على رواق.

طريق مطار دمشق الدولي – الجسر الخامس

0989777870

بالنهاية، الطلعة العائلية الحلوة هي يلي الكل بيرجع منها مبسوط: الكبار أكلوا وغيّروا جو، والصغار لعبوا وقضوا وقت ممتع. وهالمطاعم بدمشق عم تحاول تجمع هالتفاصيل كلها بمكان واحد، لتكون اللمة أريح، والأكل أطيب، والذكريات مع العيلة أحلى.

المزيد:

5 مطاعم بتعمل صفيحة شامية ولا أطيب… لازم تجربوها! 

ريحة العجين المحمر بالفرن، وتتبيلة اللحمة الغنية باللبن أو البندورة، ورشة الصنوبر يلي بتكمّل الطعمة…