إذا بتحبوا السوشي، لا تفوتوا هالأماكن بالشام!

السوشي بالشام صار من الخيارات المحبوبة، ومع تنوع المطاعم والأنواع صار في أكتر من مكان بيستاهل التجربة مع العيلة أو الرفقات. تعرّفوا معنا على أبرز هالأماكن.

1. كوميمارو

كوميمارو من الأماكن المميزة لعشاق التجربة اليابانية الأصيلة، وخصوصاً إنو الشيف ياباني الأصل. السوشي عندن جزء من تجربة أوسع فيها أونيغيري وماتشا وأطباق يابانية تانية، فالمكان بيعطيكن فرصة تتعرفوا على المطبخ الياباني عن قرب.

الموقع: نهاية الربوة – داخل مجمع مشوار.

2. أومامي

أومامي بيجمع بين السوشي الكلاسيكي والنكهات الأغنى، مع خيارات مثل سوشي السالمون، التونا، الكراب والروبيان، بالإضافة لـالترياكي والكاتسو. التنوع هون مناسب للي بيحب النكهات البحرية الفريش، وكمان للي بيميل للقرمشة والصوصات الأغنى.

الموقع: شارع شكري القوتلي – قرب فندق فورسيزن.

3. هاشي سوشي هاوس

هاشي مناسب سواء كانت أول تجربة إلكن مع السوشي أو كنتوا من عشاقه من زمان، لأن القائمة فيها خيارات متنوعة بين الأنواع المطبوخة والمقرمشة ونكهات فريش لمحبي السوشي على أصولو. وكمان عندن رامن، فبتقدروا تجمعوا بين السوشي وطبق ياباني ساخن بوجبة وحدة، وبيكون خيار حلو لطلعة مع الرفقات أو عشا خفيف مع العيلة.

الموقع: دمشق القديمة – باب توما – دخلة جادة البكري.

4. كاتانا

كاتانا خيار حلو لعشاق السوشي يلي بيحبوا التنويع، وخصوصاً مع الأوبن سوشي يلي بيجي مع سلطة كراب ومشروب ترحيبي. وعشاق الساشيمي إلهم حصة كمان، فالتجربة بتكون أقرب للنكهات البحرية الواضحة والبسيطة.

الموقع: فندق الشيراتون – سيفن غيتس.

5. تايو

تايو من الأماكن يلي عندها تشكيلة واسعة لعشاق السوشي، من رينبو ومانغو وترياكي وتمبورا لـسوشي الخضار والتونا الحارة. التمبورا مناسب لمحبي القرمشة، التونا الحارة للنكهات الأقوى، والمانغو بيعطي لمسة حلوة وخفيفة.

الموقع: كفرسوسة – شام سيتي سنتر – الطابق الثاني.

6. هانابي سوشي

هانابي من الأسماء المعروفة عند محبي السوشي والمأكولات البحرية بالشام، والتشكيلة عندن مناسبة للي بيحب النكهات البحرية تكون هي الأساس. خيار حلو لعشا هادي أو جمعة رفقات يكون فيها السوشي هو نجم الوجبة.

الموقع: أبو رمانة – مقابل السفارة اليابانية.

7. أوكي سوشي

أوكي سوشي بيجمع بين السوشي والأكل الصيني، وهاد الشي بيخليه مناسب للجمعات يلي فيها أذواق مختلفة. فيكن تختاروا من السوشي وتضيفوا معه أطباق آسيوية ساخنة، فبتطلع الوجبة متنوعة ومناسبة للعيلة أو الرفقات.

الموقع: أبو رمانة – دمشق.

8. نامي

نامي بياخد تجربة السوشي باتجاه عصري ومرتب، ومن التجارب المعروفة عندن أوبن سوشي يوم الثلاثاء، واللي بيعطي فرصة لتجربة أكتر من نوع وتغيير النكهات خلال نفس السهرة.

الموقع:
المزرعة – مجمع هنغار – مقابل نادي بردى.
ساحة القصور – نزلة الغساني.

9. تارتار

تارتار معروف بالنكهات الجريئة، مع أنواع مثل دراغون، رينبو، تيماكي ديناميت، مانغو، روكا مدخنة وسالمون كريمي. التشكيلة بتتنقل بين الكريمي والمدخن والنكهات الأقوى، فبتناسب اللي بحب يجرب شي مختلف كل مرة.

الموقع: الشعلان – ضمن مطعم ميرلان.

10. ياهو سوشي

ياهو سوشي خيار مباشر لعشاق السوشي، مع تشكيلة مناسبة لمحبي النكهات البحرية والأنواع الكلاسيكية. مكان مناسب لغدا سريع أو عشا خفيف مع العيلة أو الرفقات.

الموقع: كفرسوسة – دخلة وزارة الخارجية، جانب مطعم رمان.

زوروا هالأماكن واكتشفوا أطيب نكهات السوشي بجودة عالية بتستاهل التجربة.

المزيد:

5 مطاعم بتعمل صفيحة شامية ولا أطيب… لازم تجربوها! 

ريحة العجين المحمر بالفرن، وتتبيلة اللحمة الغنية باللبن أو البندورة، ورشة الصنوبر يلي بتكمّل الطعمة…