أفضل وأحدث محلات الحلويات الشرقية والغربية بالشام ما لازم تفوتكم

لما تشتهوا شي حلو، بتبلش الحيرة: كنافة ولا تيراميسو؟ تشيزكيك ولا بان كيك غرقان بالشوكولا؟ ومع كل المحلات الجديدة اللي عم تفتح بالشام، صارت الخيارات أكتر، وكل محل عنده أصناف ونكهات بتفتح النفس وبتستاهل التجربة. لهيك جمعنالكم 5 من محلات الحلويات الشرقية والغربية بالشام، وكل واحد منها عنده صنف مميز ممكن يصير طلبكم المفضل من أول مرة.

1. حلويات زيتونة العالمية

حلويات زيتونة جابت معها على دمشق مفهوم جديد للحلويات، وعم تقدّم تشكيلة واسعة من الحلويات الشرقية المحلّاة بالعسل الطبيعي، مثل الهريسة والكنافة والمشكل العربي والراحة التركية بحشوات غنية. وعشاق الحلويات الغربية إلهم نصيب كمان، من كيكة العسل والسان سباستيان للكيكات المصممة للمناسبات وتشكيلات الشوكولا والضيافة. وفيكم تكملوا التجربة بفنجان قهوة أو واحد من المشروبات الساخنة والباردة الموجودة عندهم.

العنوان: أوتستراد المزة، بعد البنك الإسلامي

للتواصل: 0983537777

2. تيراميسو ويز إن

إذا التيراميسو هو نقطة ضعفكم، فتيراميسو ويز إن رح يعطيكم أكتر من سبب للتجربة. عندهم التيراميسو الإيطالي الكلاسيكي، بالإضافة لنكهات مختلفة مثل الليمون والباشن فروت، بقوام كريمي وطعمة خفيفة بتخليكم تكملوا القطعة من دون ما تحسوا وتطلبوا غيرها. وفيكم تطلبوا التيراميسو كتحلاية فردية أو كيك كامل بأحجام متنوعة للمناسبات واللمات.

العنوان: دامسكينو مول، الطابق B2

للتواصل: 0933553383 – 0113337776

الطلب متاح عبر: Bee Order – Movo – Yalla Go – Yalla Mart – Grub Door – Buradayim – توصيلة – ياسمين

3. سويت شوب

سويت شوب من الأماكن اللي بترضي كل الأذواق، لأنو المنيو عندهم بيجمع بين الحلويات الشرقية والغربية. فيكم تختاروا من الأصناف العربية التقليدية، أو تجرّبوا الكرواسون بنكهات مختلفة، الإكلير، الكيكات والحلويات الغنية بالشوكولا والكريمة. خيارات مناسبة لتحلاية سريعة، ضيافة مرتبة، أو طلب حلو يوصل لعندكم عالبيت.

العنوان: دمشق – الشعلان – بجانب موقف نورة

للتواصل: 0932444777 – 0113344101

الطلب متاح عبر: Bee Order – Movo – Yalla Go

4. شوكو هاوس

شوكو هاوس من الأماكن اللي بتدخلوا عليها وإنتوا مفكرين تطلبوا صنف واحد، وبتطلعوا محتارين بين نص المنيو. عندهم خيارات غنية بالشوكولا، من أرمادا النوتيلا وسلطة الفواكه بالشوكولا، لرول الشوكولا وطبقات البراونيز والبان كيك مع الفواكه والكريمة. وفيكم تجربوا كمان كيندر سوبريم أو البان كيك بعجينة البستاشيو، مع نكهات جديدة بتنضاف باستمرار، وفيكن تختموا الطلب بواحد من أصناف الموهيتو أو المشروبات الباردة اللي بتناسب التحلاية.

العنوان: أشرفية صحنايا، مقابل البنك العربي، بجانب شركة الميثاق

للتواصل: 0983306758

5. أوغاريت ديزرتس

أوغاريت ديزرتس عبارة عن مطبخ سحابي متخصص بالحلويات العصرية والمشروبات، ومن الأصناف اللي اشتهر فيها الكان كيك، التشيزكيك، التيراميسو واللاتيهات الباردة. فيكم تجربوا تشيزكيك التوت، المانغو، فيريرو روشيه أو الأوريو، وتكملوا الطلب مع تيراميسو لاتيه أو كوكي لاتيه. خيار مناسب لما تكونوا بالبيت ومشتهيين تحلاية مرتبة توصل جاهزة لعندكم.

العنوان: دمشق(مطبخ سحابي)

الطلب متاح عبر Bee Order – Movo أو إنستغرام

بالنهاية طلبكم حلو شرقي أو غربي، أكيد رح تلاقوا بهالقائمة محل جديد يصير وجهتكم المفضلة وقت التحلاية.

المزيد

4 مطاعم مأكولات بحرية لازم تجربوها هالصيفية بدمشق

إذا في أكلة مرتبطة بالصيف أكتر من غيرها، فهي أكيد المأكولات البحرية.