مدونة

12 علامة بتدل إنك الولد المفضل بالبيت

بالبيت الشامي دايماً في ولد أو بنت بيكونوا “مدللين زيادة” مو شرط الأم تعترف بهالشي… بس التصرفات بتفضح الموضوع. إذا لاحظت هالشغلات بحياتك، فغالباً أنت الولد المفضل بالبيت:

:علامات الولد المفضل

1. أمك محاميتك الرسمية بكل القضايا

حتى لو الغلط واضح وضوح الشمس، بتلاقيها عم تلاقي مليون مبرر: أكيد في شي خلاه يعمل هيك”… وبتقلب القصة لحتى تطلعك مظلوم.

2. إذا صار خلاف بينك وبين إخواتك… الحق بيطلع عليهم فوراً.
ما في تحقيق ولا استجواب… الحكم بينزل فوراً:

“إنتو أكيد مستفزينو”.وإنت؟ بتطلع من القصة ضحية بطريقة عجيبة.

3. دايماً مهتمين بأكلك وشو بتحب؟
ممكن تكون قاعد وعم تاكل فعلياً، وبتسمع هالسؤال” إذا مو حاببها بعملك شي تاني” ولما يكون في أكلة طيبة، بتقلك: “هاد الصحن إلك”. أطيب قطعة، أكتر صحن مدعوم، أو حتى شي محدود مافي منو كتير… بينحجز إلك تلقائياً. وإذا حدا قرّب عليه، بيجي التنبيه: “لا هي القطعة إلو”.

4. صوتك مسموع أكتر من غيرك

إذا صار نقاش، رأيك بياخد وزن أكبر وكتير مرات القرار النهائي بيطلع على كيفك.

5. طلباتك VIP وسريعة التنفيذ

“ممكن كاسة مي؟” ما بتلحق تكملها إلا الكاسة بإيدك… وأحياناً قبل ما تطلب أصلاً.

6. بيخافوا عليك أكتر من الباقي
مثلاً إذا تأخرت برا البيت، بتصير الاتصالات ورا بعض: “وينك؟ ليش تأخرت؟ طمّنّي”. بينما غيرك ممكن يتأخر نفس الوقت وما حدا يسأل عنو.

7. إلك استثناءات خاصة

أشياء ممنوعة عالكل… بس إلك مسموحة.

طلعة، قرار، أو حتى تصرف بسيط… إنت عندك “حصانة”.

من مسلسل عيلة 5 نجوم

8. أي شغلة بتعملها… إنجاز تاريخي
جبت خبز أو غرض بسيط؟ بتصير قصة: “شوفوا اديش مسؤول وبيعرف يدبّر حالو”. والمديح قدام الضيوف مضمون.

9. إذا مرضت شوي، البيت كله بيصير بحالة طوارئ.
صداع خفيف أو رشح بسيط؟ فجأة البيت كله بيتحوّل لمستشفى: في أدوية، شوربة، وسؤال كل خمس دقايق: “تحسّنت؟ بدك شي؟ شو عبالك جبلك؟”.

10. على طول عاملين أكلتك المفضلة

وحتى لو باقي البيت مو مشتاق إلها… المهم إنت مبسوط.

11. إذا طلبت خدمة، غالباً بتقول لإخواتك يعملوها عنك(طلباتك أوامر).
“روحوا ساعدوه” أو “اعملولو ياها”. يعني حتى طلباتك عندها واسطة.

12. بيتغزلوا بجمالك وتصرفاتك طول الوقت يعني المديح شغّال 24 ساعة
“يؤبروني هالعيون! تسلملي هالضحكة! شو مهذب!” حتى لو عامل شغلة عادية جداً، بتنمدح كأنها شي استثنائي، وبتحس حالك نجم البيت بدون ما تعمل مجهود

بالنهاية… بكل بيت شامي في ولد “المفضل” أو “المدلل آخر العنقود” حتى لو الأم بتقول:
“أنا بحبكن كلكن نفس الشي”

ياترى طلعت أنت الولد المفضل أو لأ؟!

أمثال ما بتسمعها إلا بالشام

بيقولوا أهل أول ما تركوا شي ما متّلو عليه من النصايح والحكم، للوصف والمدح والذم كل موضوع وكل موقف الو متل وبيعبر عنه، هون جمعنالكم أشهر أمثال شامية ومعانيها