بتتذكروا؟
6 محلات بدمشق رح يرجّعوكم لأحلى ذكريات الطفولة
في محلات بالشام ما كانت مجرد أماكن ناكل منها، كانت جزء من طفولتنا وذكرياتنا. من أيام الطلعات مع الأهل، لوقفات المدرسة، ولسهرات الصيف مع الأصحاب. والأجمل إنو كتير من هالمحلات لسا فاتحة أبوابها، ومحافظة على نفس الطعمة يلي خلتها تكبر وتستمر مع أجيال كتير. وإذا بدك تعيش نكهة زمان، هي مجموعة من أقدم محلات الأكل بدمشق يلي لليوم إلها مكانة خاصة بقلب كل شامي لأن بترجعلك ذكريات الطفولة.
1. سيروب
مين بيتذكر ريحة السجق والروستو أول ما يفوت على الصالحية؟ سيروب مو مجرد محل سندويشات، هو جزء من ذاكرة الشام. من سنة 1958 وهو بيقدم السجق، البسطرما، والروستو بنفس الخلطة الأرمنية يلي اشتهر فيها. وكل حدا جرب سندويشة من عنده بيعرف ليش لليوم الناس بتوقف بالدور كرمالها.
العنوان: دمشق – الصالحية – حي الشهداء.
الدوام: يومياً من الساعة 8 صباحاً حتى 11 ليلاً.
للتواصل: 963113312549
2. عصير أبو شاكر
من الصعب تمشي بالصالحية وما تتذكر أبو شاكر. محل رافق طفولة أجيال كاملة من سنة 1953 ولهلأ، وكانت كاسة الأظان أو الإمبراطور من عنده بالنسبة إلنا فرحة صغيرة بعد أي مشوار. فواكه فريش، قشطة، عسل، ومكسرات… خلطة بسيطة، بس صنعت ذكريات حلوة ما بتنتسى. ولهيك، أبو شاكر بقي لليوم واحد من الأماكن يلي كل شامي بيرجعله وهو مشتاق لطعمة زمان.
العنوان: دمشق – الصالحية – مقابل مجلس الشعب.
للتواصل: 0112323358
3. حلويات البيك
كم مرة مرقنا من قدام البيك وما قدرنا نكمل الطريق بدون ما ناخد قطعة حلو؟ ريحة الكنافة النابلسية ، والبقلاوة، والحلويات العربية كانت كفيلة تخليك تغير رأيك حتى لو ما كنت جوعان. البيك من المحلات يلي حافظت على اسمها ومكانتها، ولسا لليوم بتجمع العيلة على نفس الطعمة.
الفروع:
باب سريجة باتجاه باب الجابية.
الشعلان – السوق التجاري.
للتواصل: 0112221360 – 0113352507
4. مطعم أبو الجدي
من أشهر وأقدم مطاعم الفطور الشعبي بدمشق، ولسنين طويلة وهو بيستقبل زبائنه بأطباق الفول، الحمص، المسبحة، الفتات، الفلافل، والبيض بأنواعه. جلساته الشعبية وأجواؤه البسيطة بتخليك تحس إن الزمن رجع شوي لورا، وبتذكرك بأيام كان فطور الجمعة مع العيلة، أو قعدة الصبح مع رفقاتك، من أجمل اللحظات. ولهيك، لليوم أبو الجدي بيضل واحد من المحلات يلي محافظ على روح الفطور الدمشقي الأصيل.
العنوان: دمشق – شارع الثورة – سوق ساروجة – مقابل العطر الشامي.
5. كشك الروضة
في كتير شغلات بتذكرنا بالطفولة، ومن بينها الوقفة عند كشك الروضة. من الفول النابت والذرة والجانرك، للكستنا، البليلة، والبطاطا المشوية، وسلطات الفواكه حسب الموسم. كشك بسيط، لكنه محفور بذاكرة كل حدا مرّ من ساحة الروضة ولليوم بالنسبة إلنا محطة ما بتتفوت بكل طلعة.
العنوان: دمشق – ساحة الروضة.
للتواصل:
0988664647
6. بوظة دامر
إذا انذكرت البوظة بالشام، مستحيل ما ينذكر اسم دامر. من أقدم محلات الآيس كريم بدمشق، تأسس سنة 1939، ولسا اسمه مرتبط بذكريات الصيف والطلعات العائلية. كتير من الشوام بيعتبروا إن زيارة الشام ما بتكمل بدون وقفة عند دامر وتذوق البوظة يلي حافظت على طعمتها عبر السنين.
العنوان: دمشق – الشعلان.
للتواصل: 0113316061
طعمة زمان… بتضل إلها حكاية
يمكن تغيرت شوارع دمشق، وتبدلت محلات كثيرة، لكن في أماكن بقيت شاهدة على ذكريات أجيال كاملة. هي المحلات مو بس بتقدم أكل طيب، هي بتحكي قصة مدينة، وبتحمل معها تفاصيل طفولة ما بتننسى. وإذا كنت من أهل الشام، أو حتى زائر إلها، لا تضيع فرصة ترجع تعيش هالذكريات من جديد مع نكهة حافظت على أصالتها لليوم.
الأكثر قراءة هالشهر
أمثال ما بتسمعها إلا بالشام
١٣ سبتمبر ٢٠٢٤
القاموس الشامي: مفردات ومصطلحات اللهجة شامية
٣٠ يوليو ٢٠٢٤
أفضل مراكز تعلم اللغات في دمشق
٠١ أكتوبر ٢٠٢٤
احتفل بمناسبتك بأرقى وأجمل صالات الافراح ب دمشق
١٨ سبتمبر ٢٠٢٤
أشهر محلات الحلويات بدمشق: طعمة بتخليك ترجع كل مرة!
٢٤ سبتمبر ٢٠٢٤
