5  كافيهات جديدة وبأجواء رهيبة بالشام

كل شوي الشام بتفاجئنا بمكان جديد، بس مو كل كافيه بيترك أثر. في أماكن بتفوتها وبتطلع… وفي أماكن أول ما تقعد بتحس إنك لقيت جوك. ديكور مميز، قهوة مزبوطة، أجواء بتشبه مزاجك، وصور بتطلع نار. لهيك جمعنالكن خمس كافيهات جديدة ومميزة لتختاروا من بينهم الأنسب لمودكم:

1. بوهو كافيه

بوهو من الأماكن يلي بتروق بالك من أول ما تفوت. ديكور دافئ بطابع بوهيمي، تفاصيل نباتات وخشب، وقعدة بتخليك تطول بدون ما تحس. مناسب لسهرة رايقة، لقاء مميز، أو حتى جلسة تصوير لأن كل زاوية فيه فيها روح.

مشروع دمر – الأب تاون – دمشق
0943135550

2. كالي كافيه

كالي بيقدم تجربة مختلفة لعشاق القهوة المختصة. المكان هادي وأنيق، التفاصيل مدروسة، والقعدة مريحة سواء جاية تشتغل، تقرأ، أو تاخد بريك مع فنجان قهوة مضبوط. الجو فيه إحساس بسيط وأوروبي بنفس الوقت، ومناسب للي بحبوا الأماكن الراقية.

حرنة – أول طلعة حرنة الشرقية – دمشق
0993530183

3. روزانا كافيه

روزانا من الأماكن الحيوية يلي بتناسب أي وقت باليوم. جلسات داخلية وخارجية، أجواء مليانة حركة، فعاليات وأمسيات، وشاشات عرض بتخلي القعدة مسلية أكتر. المنيو واسع من قهوة ومشروبات باردة لعصائر وحلويات مثل البان كيك والوافل والكريب. مكان مناسب للقعدة مع الأصحاب أو سهرة خفيفة بجو شبابي.

ساحة الشهبندر – مقابل مخبز الشهبندر
0984033111

4. سموذي لاب كافيه

سموذي لاب فكرة شبابية بامتياز. مشروبات سموذي بنكهات قوية ومختلفة، حلويات عصرية، وأجواء مرحة بتكسر الروتين. المكان مناسب لقعدة سريعة أو مشروب منعش بعد يوم طويل، خصوصاً إذا كنت من محبي الطعم القوي والستايل العصري.

أبو رمانة – الجاحظ
0982219235

5. شَمس كافيه

شمس بيعتمد على البساطة والجودة. قهوة مظبوطة، حلويات مرتبة، وأجواء هادية بتخليك تاخد راحتك. المكان مناسب للي بدهم جلسة هدوء بعيد عن الزحمة، سواء لقعدة شخصية أو لقاء خفيف مع صديق.

داريا – جانب مسجد أنس

إذا كنت عم تدور على كافيه جديد بالشام يغيّر جوك، هالخمس أماكن بيعطوك خيارات بين الحيوي والهادئ، العصري والرواق. اختار الجو يلي بناسب مزاجك… وجرب مكان ممكن يصير عنوانك الجديد.

المزيد:

تشابتر بيزنس كافيه للشغل أو الدراسة: تجربة جديدة بعالم الكافيهات بدمشق!

مو كل كافيه مكان مناسب للشغل، ومو كل مكتب بيقدملك الراحة يلي بتحتاجها.