4 كافيهات بلا أراكيل، قعدة رايقة و هوا نظيف 

مو ضروري تكون القعدة مليانة دخان وأركيلة لتكون حلوة… أوقات، كل يلي بدنا ياه هو فنجان قهوة طيبة، طاولة مرتبة، وجو نظيف نقدر نشتغل أو نحكي فيه براحتنا. لهيك، جمعنالك 4 من أهدى وأرتب كافيهات دمشق بلا أراكيل، أماكن بتجمع بين الراحة، النظافة، والأجواء الهادية… وكل واحد فيها إله طابع خاص بيخليك تحب ترجعله:

1. كارما كافيه

إذا بدك تدرس، تشتغل، أو حتى تقرأ جريدة على مهلك، هاد المكان خيارك الأول. الجو هادي، مرتب، فيه إنترنت سريع، وضيافة راقية. والمميز؟ خالي تمامًا من الأركيلة، يعني قعدتك مريحة ورايقة عن جد.

دمشق – مقابل حديقة المدفع، جادة الرواد
0994913060

2.كافيه6:18

مكان بسيط ومرتب، بيخليك تحس براحة من أول لحظة. الديكور ناعم، القهوة طيبة، وفيه أصناف حلويات بتكمل القعدة. المكان خالي تمامًا من الأركيلة، وبيناسب جلسة لحالك أو دراسة مع رفيق.

مدينة التل – مقابل مشفى الحسن

3. ديب إن ديب

مكان مميز لعشاق الشوكولا والقعدة النظيفة. فيه زوايا هادية، خدمة محترمة، ومكان بتاخد فيه استراحة حقيقية مليانة سعادة. المكان خالي تمامًا من الأركيلة، وبتحس فعلاً إنك بجو راقي و مرتب.

الميدان – المزة – كفرسوسة – أبو رمانة – المالكي

4. تشابترز بزنس كافيه

إذا بتشتغل على اللابتوب، عندك اجتماع، أو بدك تركّز بلا تشويش، لازم تزور هالمكان. فيه قعدات فردية، غرف اجتماعات، وبيئة مثالية للإنتاجية. ما في أركيلة، ما في ضجة… بس شغل ووجبات خفيفة وقهوة ممتازة.

الجسر الأبيض – نزلة الطلياني – أول دخلة على اليمين
0987002688

بالنهاية إذا كنت بتدور على كافيهات بلا أراكيل، هالأماكن بتقدملك التجربة يلي بتدور عليها: هواء نضيف، قهوة طيبة، وخدمة محترمة.
جرب واحد منهن، وشاركنا رأيك… وين حابب تكون قهوتك الجاية؟

المزيد:

تشابتر بيزنس كافيه للشغل أو الدراسة: تجربة جديدة بعالم الكافيهات بدمشق!

مو كل كافيه مكان مناسب للشغل، ومو كل مكتب بيقدملك الراحة يلي بتحتاجها.