بالشامي

أمثال شامية مهضومة عن الحماية و الكنة!

بكل بيت شامـي، القصة ما بتكمل بلا الكنة و الحماية، وعالأغلب العلاقة بيناتهم يا بتكون قشطة وعسل، يا إما حرب باردة! وهالشي مو جديد، من أيام جداتنا و الـ أمثال عم توثق هدول المواقف بين الحماية و الكنة، بضحكة، وبغصة أحيانًا، وبحكمة شعبية بتعكس الواقع.

مجموعة من أطرف وأشهر الأمثال الشامية:

مكتوب على باب الجنة: بعمرها حماية ما حبت كنة
الكنة اللي بتنام ليلها وضحاها… العيشة أرحم بلاها
الكنة اللي بتنام لضهرها… خسارة فيها مهرها
الحماية عليها كل فنة، بتجنّن ألف كنة
الكنة أول سنة عروس، تاني سنة جاموس، وتالت سنة حية بسبع روس
الكنة متل الألماس… بس عامليها متل الناس
الكنة خبزها مخبوز، وميتها بالكوز، ولسا ضاربة بوز
الكنة كننيها بتكن، وجننيها بتجن
الحماية لو كانت ولية، إلا ما تعمل بلية
الكنة اللي مالها فرحة… بتعمل بالقلب قرحة
حماتي وجهها متل العدس… إن ضحك وإن عبس
أخدناها درويشة… طلع ع راسها ريشة
الحماية لو بتحب مرت الإبن… كان صار القمح بسعر التبن
هالكنة تمها شبراوي… صار بدو زرار وعراوي

أنا أخدت ما ربيتي، وفكيت ماصريتي… وكان البيت بيتك، وهلأ صار بيتي
ميّة النار ولا حماية بالدار
أنا حملت وإيدي ربّت… وبنت الناس عني تبدّت
الحماية بتقول لبنتي بيلبقلا… وكنّتي الله لا يباركلا
جبنا هالكنة تنكة… وعملناها ملكة
الحماية متل المراية… طول ما لمّعتيها منيحة، وإذا أهملتيها فضيحة
جبناها خادمة… صارت بالبيت حاكمة
حبتني حماتي نيمتني عالتنور، بغضتني حماتي نيمتني عالكانون… هون شحّار وهنيك شحّار
الكنة الأصيلة بتنام عالحصيرة
الكنة متل السجادة… كل فترة بدها نفض
حماتي ختيارة ومهرهرة، وبدها قبر… وحمرتها على تمها، سمكها شبر
كيد الكناين مين قدّو؟ لو وقع على حيط بيهدّو
الكنة مين أعدا عداها؟ حماتها، وسلفتها، وبنت حماها
بحياتها الحماية ما حبت كنة… ولو كانت حورية من الجنة
من لون البيتنجان يا كناين هالزمان… يا قليلات المروة يا طويلات اللسان
يا حماتي لا تقولي عني شرنة… ما إنتِ قبلي كنتِ كنة
دللي حماتك واكسبي ودها… إذا نوت عالشر ما حدا بيردّها

هالأمثال عن الحماية والكنة مو بس نكتة، هي خلاصة سنين من المعايشة اليومية، والابتسامة الحذرة بين الحماوات والكناين!
فإذا كنتي كنة جديدة أو حماية مخضرمة، أكيد في مثل من هالمجموعة بيوصف حالك حرفيًا
يا ترى أي مثل أقرب لواقعك؟

أمثال ما بتسمعها إلا بالشام

بيقولوا أهل أول ما تركوا شي ما متّلو عليه من النصايح والحكم، للوصف والمدح والذم كل موضوع وكل موقف الو متل وبيعبر عنه، هون جمعنالكم أشهر أمثال شامية ومعانيها