لكل عشّاق القراءة… معرض دمشق الدولي للكتاب رجع ينور الشام!

من 6 ولغاية 16 شباط 2026، مدينة المعارض بدمشق رح تستقبل من جديد أكبر فعالية ثقافية بالبلد. معرض دمشق الدولي للكتاب هو الموعد السنوي الثابت يلي بيجمع عشّاق الكتب والناشرين والكتّاب والمبدعين من سوريا والعالم العربي بمكان واحد. فعالية بتعيد لدمشق نبضها الثقافي، وبتفتح بوابات الفكر والتواصل الإنساني على مصراعيها.

شو رح تلاقوا بالمعرض :

كتب من كل الأنواع… ولكل الأذواق

هالسنة المعرض راجع بدورة استثنائية فعلًا، بتضم آلاف الكتب والعناوين المتنوعة من دور نشر محلية وعربية. رح تلاقي كل شي من روايات وأدب، كتب فكرية وثقافية ودينية، علوم وتاريخ، تنمية بشرية، كتب مترجمة، وقصص أطفال وناشئة. كل قسم من أقسام المعرض بيحكي بلغة مختلفة، وبيلبّي شغف نوعي من القرّاء.

فعاليات ثقافية غنية

برنامج المعرض ما بيوقف عند شراء الكتب. فيك تحضر أمسيات شعرية وندوات فكرية، وورشات عمل مفتوحة، وجلسات حوارية، وحفلات توقيع لكتب جديدة من كتّاب سوريين وعرب، التعرف على ضيوف الشرف مثل دولة قطر وزيارة الجناح القطري لتشوفوا الثقافة القطرية عن قرب.

كل لحظة بالمعرض فيها فرصة لقراءة، لقاء، أو نقاش يفتحلك أفق جديدة.

جناح الأطفال… متعة وتعليم

معرض الكتاب مو بس للكبار، لأن الأطفال إلن عالمهم الخاص جواته. بجناح الطفل بتلاقي فعاليات مصممة لتجمع بين المتعة والمعرفة، مثل المسرح التفاعلي، ركن المواهب، مدينة الاكتشافات، المهندس الصغير، ألعاب الذكاء، تحدي القراءة، ركن المبدعين، وسينما الواقع المعزز. المكان مصمم ليكون تجربة لا تُنسى لكل طفل، ولحتى كل العيلة تستمتع مع بعض.

جوائز تكريمية للمبدعين

المعرض هالسنة بيطلق مجموعة مميزة من الجوائز الثقافية، بهدف تكريم الجهود الإبداعية المحلية والعالمية. من أبرزها: جائزة الإبداع للناشر السوري، جائزة الإبداع الدولية لدور النشر العالمية، جوائز نشر كتاب الطفل محليًا ودوليًا، جائزة الإبداع للكاتب السوري، وجائزة الإبداع للشباب، بالإضافة لجائزة شخصية العام الثقافية. الجوائز بتسلّط الضوء على رموز ساهموا بصناعة مشهد ثقافي حي ومؤثّر.

هل أنت كاتب أو فنان؟ هي فرصتك

إذا كنت كاتب، شاعر، رسّام، أو فنان حابب تشارك بإبداعك، المعرض فاتح الباب قدامك لتكون جزء من الفعاليات، بندوة، ورشة، أو توقيع كتابك. وإذا كنت شركة أو مؤسسة ثقافية، فيك تكون راعٍ رسمي وتحصل على ظهور واسع ضمن حدث ضخم متل هاد.

شارك كمتطوّع

معرض دمشق للكتاب بيفتح باب التطوّع لكل شاب أو صبية حابين يكتسبوا خبرة تنظيمية، ويكونوا جزء من فريق ثقافي متعاون. بتشتغل ضمن أجواء راقية، بتوقيت مرن، وبتاخد شهادة تقدير على مشاركتك بهالفعالية الكبيرة.

نقل مجاني للزوار

لتسهيل وصول كل محبّي الكتب، المعرض وفّر باصات نقل مجاني بتنطلق يوميًا من نقاط رئيسية بدمشق مباشرة إلى مدينة المعارض:

1. البرامكة – مقابل وكالة سانا
2. المدينة الجامعية – أوتوستراد المزة
3. ساحة باب توما
4. جسر الحرية

يعني الوصول صار أسهل وأسرع للجميع.

مواعيد الزيارة

المعرض بيفتح أبوابه يوميًا من الساعة 10 صباحًا وحتى 9 مساءً، ويوم الجمعة من الساعة 3 عصرًا حتى 9 مساءً. خود وقتك واستمتع بالأجواء، بين رفوف الكتب وزوايا النقاش والإلهام.

المكان: مدينة المعارض – دمشق
للاستفسار: ‎+963 987 558 264
info@dibfsy.com
تابع الصفحة الرسمية @dibfsyr

لا تفوّت الفرصة، وخلّي شباط يكون شهر القراءة والإلهام!
زوروا معرض دمشق الدولي للكتاب وعيشوا تجربة ثقافية ما بتنتسى.

للمزيد من الأنشطة العائلية تابعوا قسم مع العائلة.