6  أنواع من الحلويات الدافية بالشام… جربوها بالشتوية 

الشتوية بالشام إلها طقوسها الخاصة. برد خفيف، مطر عم يدق عالشبابيك، وقعدة ببيت شامي بتفوح منها ريحة الدفا. وبهالأجواء، الحلويات الدافية بتحضر بقوّة، نكهات غنية وطعم بيحمل معه ذكريات قديمة وحكايات عايشة بالذاكرة. خلّونا نعرّفكم على أشهى الحلويات الشامية الشتوية، أطباق بتكمّل مزاج الشتا وبتخلّي القعدة أدفى وأحلى:

1. أكلة الحبوب الشامية

أكلة بسيطة، بس مليانة دفى وحنين. حبوب مطبوخة على مهل، قوامها ناعم وطعمها غني، بتتاكل وهي سخنة وبتحسّسك إنك قاعد ببيت أهلك. أكلة شتوية قديمة، كانت دايمًا حاضرة بالقعدات العائلية، ولسا لليوم إلها مكانتها.

2. القطايف بالقشطة

العشّاق الحقيقيين للحلويات بيعرفوا إنو القطايف بالقشطة (الستاتي) إلها هيبة خاصة بالشتا. مقرمشة من برّا، ناعمة من جوّا، محشية قشطة سخنة غنية، وكل لقمة بتحكي حلا شامي أصيل. بتتاكل وهي دافية، ومعها كاسة شاي أو قهوة، وبتصير اللحظة كاملة. جربوها من عند إبن عباس.

3. الكراوية

مشروب شتوي دافي، ريحته لحالها بترد الروح. نكهته بتتنوّع بين الكراوية الكلاسيك، أو مع إضافات متل جوز الهند، الزبيب، اللوز، والجوز. كاسة كراوية بتدفّي الجسم وبتريح المعدة، وبتكمّل أي قعدة شتوية.

4. السحلب

ريحة الشتوية بهالكاسة. سحلب دافي، قوامه مظبوط، غني بالحليب والنكهة، ومزيّن بجوز الهند أو القرفة. من أول رشفة بتحس بالدفا عم ينتشر، وبتعرف ليش السحلب رمز من رموز الشتا بالشام.

5. الكنافة بالجبنة

بالشام، وأنت ماشي بحاراتها وشوارعها، ما في أطيب من صحن كنافة نابلسية سخن ومقرمش، وجبنة بتشط وتمط وتسيح من أول لقمة وبتخلي نهارك يصير أحلى.

6. المشبّك السوري (مشبّك حلب)

من حلويات الشتا اللي إلها مكانة خاصة. عجينة مقلية، مقرمشة من برّا، ومغمورة بالقطر الساخن، بطعم غني بيشبِع الحنين قبل الجوع. حلا شتوي تقليدي بينتظروا الناس بأيام البرد، وبتتاكل سخنة لتكمّل مزاج الشتا ولمّة القعدات الحلوة.

جرب هـ الحلويات الدافية، لتكون شتويتك إلها طعم، وإلها ذكرى.

تأكد تزور قسم #كول-وشكور على موقعنا لتشوف المزيد!