لمحبين المغامرات بسوريا: تخييم، تسلق، واستكشاف… كلّن بـ”أنا السوري”!

في زوايا مخفية بسوريا ما بتنعرف إلا بالمشي، بالتخييم، وبقعدة تحت السما. جو نضيف، أرض واسعة، وسكون بيحكي أكتر من ألف كلمة. بين الغابات، القمم، والبرية المفتوحة، بتتحوّل المغامرة لتجربة قريبة من الروح، تجربة بتفصلك عن الروتين وبتقرّبك من الحياة بشكل أبسط وأصدق. هون، كل خطوة فيها تحدي، وكل ليلة تحت السما إلها إحساس خاص ما بينتسى. ومن هالفكرة بالذات انطلقت تجربة أنا السوري، لتجمع الـ تخييم، المسير، التسلق، والاستكشاف ضمن رحلات منظّمة بتفتح الطريق لاكتشاف الطبيعة، وبتقدّم سوري بوجهها الحقيقي… البري، الهادئ، الجميل، والمليان حياة.

تعالوا معنا بجولة على أنشطة “أنا السوري” المتنوعة، لنكتشف سوا شو اللي بيخلّيها تجربة مختلفة:

التخييم… عيش ببساطة بقلب الطبيعة

الـ تخييم مع “أنا السوري” تجربة كاملة. نصب الخيم بين الأشجار، سهرة نار، أكل بسيط، استكشاف المكان وحكي بيطوّل. النوم تحت السما، والصحوة على صوت العصافير والشجر، إحساس ما بينعاد. التخييم مو بس رحلة، هو تدريب على الاعتماد على النفس، وعلى التعايش مع الطبيعة باحترام ووعي وحب.

المسير الجبلي… خطوة خطوة نحو المغامرة

المسير الجبلي واحد من أهم نشاطات “أنا السوري”. مسارات طويلة ومتنوعة، بين غابات، تلال، وقمم عالية. في مسيرات خفيفة للمبتدئين، ومسيرات صعبة للي بيحبوا التحدي. كل خطوة فيها تعب حلو، وكل وصول للقمة فيه فرحة ما بتنوصف.

الاستكشاف والدخول للبرية

الجمعية معروفة بدخولها لمناطق نائية كانت لفترة طويلة غير معروفة أو غير موثّقة. استكشاف غابات الفرلق، كسب، ميسلون، بلودان،غابة الغزلان وغيرها، بيصير ضمن تنظيم دقيق، مع توثيق بصري وبيئي، لتكون الرحلة مغامرة وفائدة بنفس الوقت.

التسلق، الانزال الجبلي، والتدريب

للي بيحبوا المغامرة التقنية، في تدريبات على الانزال الجبلي، التسلق، واستخدام الحبال، بإشراف كوادر مدرّبة. النشاطات بتعطي إحساس قوة وثقة، وبتعلّم مهارات مفيدة لأي شخص بيحب المغامرة.

مسيرات الثلج الجبلية

من أكتر النشاطات الشتوية تميّزاً مسيرات الثلج. المشي على الثلج، وتجربة الطبيعة بوجهها القاسي والجميل بنفس الوقت. نشاطات صعبة، بس ممتعة لعشّاق التحدي الحقيقي.

مسير البحيرة الغامضة… مغامرة برمائية لعشّاق التحدي

من بين النشاطات اللي بتميّز أنا السوري، بيجي مسير البحيرة الغامضة البرمائي كتجربة مختلفة لعشّاق المغامرة الحقيقية. المسار بياخدك ضمن جبال وبحيرات، وبيجمع بين المشي، عبور المياه، والتعامل مع تضاريس طبيعية متنوّعة. التجربة موجّهة للي عندهم جاهزية وحب للتحدي، بدرجة صعوبة من متوسطة إلى عالية، وبتقدّم إحساس مغامرة كامل، بعيد عن المسارات التقليدية، وسط طبيعة قاسية وغامضة بتخلّي كل خطوة محسوبة وكل لحظة مليانة حماس.

شو لازم تجهّز؟

المغامرة الحلوة بدها تجهيز ذكي. مو كل شي طيب بينفع للتخييم. الأكل لازم يكون خفيف، مغذّي، وسهل الحمل. مكسرات، تمر، فواكه مجففة،مارشميلو، معلبات خفيفة، وجبات سريعة التحضير. ابتعد عن الأكل التقيل أو اللي بدو تبريد.
ولا تنسى اللبس المناسب، الحذاء المريح، المي، الإسعافات الأولية، وأدويتك الشخصية. الجاهزية هي أساس المتعة.

تجربة بتجمعك مع مغامرين متلك

أكتر من 5000 متطوّع شاركوا مع “أنا السوري” لليوم. الرحلات بتخلق صداقات، قصص، وذكريات. بتتعلّم، بتضحك، وبتتشارك التعب والفرح مع ناس عندهم نفس الشغف.

وثّق لحظاتك… وشارك جمال الطبيعة السورية

كل رحلة مع أنا السوري هي فرصة لتوثّق شي حقيقي. صورة لشروق الشمس بين الشجر، فيديو لمسير طويل على الجبل ، أو لقطة بسيطة للبحروالسما. التوثيق مو بس ذكرى شخصية، هو مشاركة لجمال الطبيعة السورية بعيون ناس عم تعيشها عن قرب. بهالطريقة، كل مشارك بيصير جزء من قصة أكبر، قصة بتفرجي العالم وجه سوريا الطبيعي، الغني، والمليان تفاصيل بتستاهل تنشاف وتنحكى.

أنا السوري مو بس جمعية، هي مساحة لكل شخص بحب المغامرة، الطبيعة، واكتشاف بلده بطريقة حقيقية. ليهك إذا بدك تطلع من الروتين، تعيش التخييم صح، وتجرّب المسير والتسلق والاستكشاف ضمن تنظيم وآمان، فلاتتردد لأنها تجربة بتستاهل واحجز مكانك اليوم!

مقر الجمعية: دمشق – ساحة الميسات – بعد الفرن السياحي – مقابل مطعم الجوكر
دمشق: 0112752900 / 0992884884
باقي المحافظات: 0992884880

المزيد في قسم المغامرات على موقعنا!