وين نروح
7 كافيهات جديدة بتصاميم فريدة وأجواء رهيبة بالشام
دمشق دائماً عندها جديد… وكل فترة بيطلع مكان بيخطف الأنظار بطريقة تصميمه، قعدته، وروح الضيافة فيه. وإذا كنت بتحب تكتشف أماكن جديدة، أو تغيّر جو بقعدة هادية ومشروب مرتب، فهالـ كافيهات السبعة هنّ أحدث الإضافات على خريطة الأماكن اللطيفة والجديدة بالشام:
1. قهوة 8 ديسمبر
كافيه بيحمل روح اسطنبول لقلب دمشق الجميلة… كل تفصيل فيه معمول بذوق هادي و راقي، من الجلسات المريحة للتقديم المميز. قعدة بتناسب القراءة والشغل والصبحيات الهادية، أو حتى وقت بدك تهرب شوي من زحمة الحياة. الكافيه بيقدملك المشروبات الساخنة والباردة بلمسة اهتمام واتقان واضحة وبمكونات عالية الجودة.
الموقع: الصالحية – شارع الباكستان
2. إكزت كافيه
كافيه بستايل شبابي وبسيط… مثالي للي بيحبوا يشربوا شي ويرتاحوا لياخدوا طاقة تكفيهم لباقي النهار. المشروبات متنوعة، قهوة ولا أطيب وعصائر باردة منعشة بتنعمل بنكهات واضحة وتقديم حلو. المكان عملي ومريح… بيشبه محطة هدوء صغيرة وسط الشام.
الموقع: المزرعة – نادي بردى – جانب ملعب السلة
الهاتف: 0994086524
3. شرقي كافيه
إذا بدك قعدة بتشبه الشام بعبقها وروحها… شرقي كافيه هو العنوان. جلسات خارجية وداخلية، لمسات عربية مع ديكور عصري، ومشروبات بأنواعها من العصائر الباردة للمشروبات الساخنة والحلويات اللذيذة.المكان مناسب لما تكون بدك قعدة لمّة مع الرفقات، فيها راحة ودفا وريحة تاريخ حوالَيك.
الموقع: باب شرقي – دمشق القديمة
4. كوزي كافيه
قعدة دمشقية دافئة بقلب القيمرية… كل زاوية معمولة بإحساس يجمع البساطة والجمال. المكان مناسب للّقاءات ولجلسات التصوير لأنه فعليًا جوهرة صغيرة بين بيوت الشام القديمة. المشروبات الساخنة والباردة، مع كم نوع حلويات بيجنّنو، بيكمّلوا هالقعدة الرايقة يلي بتضل بالبال.
الموقع: القيمرية – جانب مطعم قصر النرجس
الهاتف: 0995013369
5. فايرون كافيه
جو عصري وراقي… ألوان هادية، جلسة مريحة، وشعور إنك بمكان معمول ليعدل مزاجك… المشروبات الساخنة والباردة فيه منوّعة كتير، ومعها أصناف حلو مثل الكريب بتكمل التجربة. المكان بشكل عام بيشبه “استراحة أنيقة” وسط الشعلان.
الموقع: الشعلان – دخلة بوز الجدي
الهاتف: 0113333440 – 0944343999
6. بيلا تشاو كافيه
مكان بتفوت عليه بتحس إنك داخل عالم صغير معمول بذوق إيطالي ودفا دمشقي. الجلسات مريحة، والإضاءة لطيفة، والمشروبات متنوعة من الباردة والساخنة بالإضافة لبيتزا وحلويات لذيذة. المكان مناسب لقعدة طويلة مع الأصحاب أو جلسة سريعة لتعديل المود… والديكور عامل جو حلو للتصوير وأعياد الميلاد.
الموقع: الشعلان – خلف بنك بيبلوس
7. قهوة أبو الزلف
مكان بيركّز على الأصالة بطريقة راقية… ديكور مريح، خدمة لطيفة، وفطور لذيذ للّي بيحب يبدأ يومه بجلسة هادية. المشروبات متنوعة، من الساخنة التقليدية للباردة المنعشة، مع أطباق شرقية مميزة وكلها بتقديم أنيق وطعم بيضل عالبال.
الموقع: المالكي – البوليفارد
الهاتف: 0980557722
إذا حابب تغيّر جو، تدور على مكان جديد، أو تعيش قعدة دمشقية بطابع عصري… هدول السبع كافيهات الـ جديدة بالشام صاروا وجهة أساسية لأغلب محبّي القهوة والقعدات الراقية بالشام، جرب واحد منهم وشاركنا التجربة!
الأكثر قراءة هالشهر
أمثال ما بتسمعها إلا بالشام
١٣ سبتمبر ٢٠٢٤
القاموس الشامي: مفردات ومصطلحات اللهجة شامية
٣٠ يوليو ٢٠٢٤
أفضل مراكز تعلم اللغات في دمشق
٠١ أكتوبر ٢٠٢٤
احتفل بمناسبتك بأرقى وأجمل صالات الافراح ب دمشق
١٨ سبتمبر ٢٠٢٤
أشهر محلات الحلويات بدمشق: طعمة بتخليك ترجع كل مرة!
٢٤ سبتمبر ٢٠٢٤
