5 مطاعم بستايل باب الحارة جربوهم لتعيشوا أحلى الأجواء

إذا كنت من الناس يلي بتشتاق لأجواء الشام القديمة، وبتحنّ لقعدة ببيت شامي مليان دفى وتراث وعراقة، فهالمطاعم رح تكون وجهتك المثالية. مطاعم ما اكتفت تقدم أكل طيب، بل رسمت مشهد متكامل من أيام الزمن الجميل، بزخارفها الدمشقية، وأثاثها الخشبي، وأجواءها يلي بتشبه بيوت باب الحارة وخصوصًا بيت أبو عصام. هي الأماكن الخمسة بترجعك لذكريات وأجواء شامية قديمة، وبنفس الوقت بتقدم تنوّع غني بالأطباق الشرقية والغربية، ومشروبات ما بيختلف ع طعمتها اتنين:

1. مطعم أورينتال

المكان أشبه ببوابة بتفتح على حارة شامية، بكل تفاصيلها الأصيلة. من أول ما تفوت، بتحس كأنك دخلت على بيت من بيوت الشام العتيقة، ببحرته، بزخارفه، قناطره، وأجواءه الدافئة. المطعم بيقدم تشكيلة واسعة من الأطباق الشرقية الشامية، جنبًا إلى أطباق غربية بتتقدّم بذوق عالي، وكل هاد ضمن تقديم أنيق وخدمة راقية.
المشروبات الباردة والساخنة عندهم بتكمل التجربة، وبتخلي القعدة ما تنمل.

الموقع: باب شرقي – حارة الزيتون
رقم الهاتف: 0115410250 – 0944020202 – 0932818381

2. مطعم بيت ستي

متل اسمه تمامًا، المطعم بيحملك لعالم جدودنا، بروح الماضي وأصالة التفاصيل. الأثاث المعتق، الزخارف الدمشقية، والإضاءة الخفيفة بيصنعوا جو ما بتلاقيه غير هون. القائمة فيها أطباق شامية تقليدية معمولة بطابع بيتي، إضافة لمجموعة مختارة من المأكولات الغربية، والمشروبات يلي بتخلي الجلسة رايقة ومرتبة.
بيت ستي كمان معروف بسهراته الطربية الحلوة، يلي فيها الغنى والأصالة.

الموقع: دمشق القديمة
رقم الهاتف: 2259800 – 0936810810

3. مطعم بيت جبري

بيت جبري من أقدم البيوت الدمشقية و أجملها، رح يحملك على خطى الذكريات، بمكان حافظ على روح دمشق بكل تفاصيله. من الزخارف، للنوافذ الخشبية، للهدوء الشامي الراقي، المكان بيخليك تغرق بجماله. القائمة بتضم أطباق شامية شهية، إضافة لأطباق غربية متنوعة، ومشروبات ساخنة وباردة بتكمل القعدة. وإذا بتحب السهرات الطربية، لا تفوّت الفرصة… طرب، دفء، وضحكة من القلب. مناسب لكل المناسبات، سواء جاية مع العيلة، الأصحاب، أو حتى لحالك.

الموقع: باب توما – خلف قصر العظم – بالقرب من مكتب عنبر
رقم الهاتف: 0115443200 – 0956936961

شوفوا هون أفضل أماكن بتقدم معجنات بتشهي بالشام!

4. مطعم بيت عربي

بيت عربي بيستقبلك بنفس الحنية يلي بتكون موجودة ببيوت الحارة الدمشقية… من الزخارف الشامية، للستايل البسيط والراقي، للضيافة الدمشقية يلي بتحس بجمالها من أول نظرة. قائمة الأكل بتضم أطباق شامية مطبوخة بمحبة، إضافة لأصناف غربية وخفيفة بتناسب كل الأذواق. مشروباتهم، من عصائر طبيعية لشاي بنكهة الشام، بتخلي الجلسة متكاملة.

الموقع: باب توما – القيمرية – حارة الشاويش
رقم الهاتف: 0945422500

5. مطعم موناليزا

موناليزا هو من الأماكن يلي بتخليك تحس إنك مسافر على عالم تاني… من أول خطوة بتفوت فيها عالمكان، التفاصيل الصغيرة، الهدوء، والرقي بياخدوك لعالم فيه كتير ذوق وتاريخ، يعني بيت دمشقي بستايل عصري.
المطعم بيقدملك تجربة فطور ما بتنتسى، وإذا إجيت عالغدا أو العشا، رح تلاقي عندن تنوّع بالأطباق بين المطبخ الشرقي والغربي، وكل طبق بيتحضّر بإتقان. أما التحلاية والمشروبات، فهون فعلاً موناليزا دايمًا غير شكل.

الموقع: باب توما – دخلة العازرية – مقابل مدرسة المنصور
رقم الهاتف: 0955449907 – 9296

انبسطت بهالمقال؟ تأكد تزور قسم #وين نروح على موقعنا لتشوف المزيد!