فندق بيت زعفران بالشام: إقامة راقية بأجمل بيت من بيوت المسلسلات الشامية

بزوايا دمشق القديمة، وبين عراقة الحارات العتيقة، بيفتح “بيت زعفران” بواباته ليستقبلك بروح البيت الدمشقي الأصيل، بتفاصيله الحنونة، وأناقته الهادئة يلي بتخطف القلب قبل النظر. هون، كل حجر بيروي حكاية، وكل زاوية بتتنفّس من عبق الماضي، وبتحس إنك ما دخلت فندق… بل دخلت حكاية شامية حيّة.

بيت عمره قرن ونص… يعني إقامة بترجعك لزمن العراقة

بيت زعفران هو تحفة تراثية مبنيّة سنة 1836، ورمّمته بعناية السيدة السويسرية المغرمة بدمشق “غابرييلا فنغرت” لتعيد لكل حجرة فيه روحها، وتحافظ على خصوصية البيت الدمشقي من قناطر، ونوافير، وساحات داخلية بتفوح منها ريحة الكبّاد والفل والياسمين.

والمميز، إنو هالبيت العتيق حافظ على تفاصيله الأصلية من دون ما يفرّط بالراحة أو الفخامة، فصار مزيج نادر من التاريخ والرقي، بيقدر يحتضن زواره كأنو عم يقول: “أهلاً وسهلاً، الشام بيتك”.

غرف متل القصص… كل وحدة إلها حكايتها

بيت زعفران بيضم 12 غرفة وجناح، كل وحدة منهن إلها طابعها الخاص. بعضها بيطلّ على الباحة الداخلية، والبعض فيه تراس خاص أو سقوف مرسومة يدوياً. المفروشات أنيقة، الألوان دافئة، والأسِرّة مريحة كأنها حضن بدفيك من تعب السفر.

الحمامات كمان صُممت لتكون مكان راحة حقيقي، بتفاصيل مصنوعة بحُب، من الدوش المطري، للرخام أو الحجارة الطبيعية، واللمسات الشرقية يلي بتخلي كل لحظة فيها متعة حسّية.

بتحب الأكل المحلي؟ شوف هالمطاعم!

أكل محلي وعالمي… بلمسات دمشقية

الفطور بهالمكان ما بينتسى… طاولة غنية بالأطباق المحلية من مطابخ الشام الأصيلة، وبترافقها نكهات عالمية لتناسب كل الأذواق.

بتقدر تاكل بمطعم الشرفة على سطح الفندق، بيقدملك أطيب أطباق مع إطلالة عالمدينة القديمة وجبل قاسيون… جو خيالي بكل وقت، أو تنزل على مطعم “المونة” بقبو حجري دافئ، بين الشموع والموسيقى الهادية، بتعيش تجربة أكل بتاخدك لعالم من الذوق الدمشقي المستوحى من “بيت المونة” الغرفة يلي كانوا أهل الشام يخزّنوا فيها أكلهم.
وفيك ببساطة تقعد بـ الليوان تحت ظل الكبّاد وتحتسي شاي الأعشاب الدمشقي بمكان راقٍ وديكور خشبي مٌطعم بالصدف والمغطى بقماش الاغباني المصنوع من خيوط الحرير، بالإضافة لسقف عالي مزخرف ونافورة رخامية بموسيقى مائية هادئة، لتستمتع بكل رشفة مع أجواء استثنائية، رح تخليك تشعر كأنك ضيف عند ناسك، مو نزيل بفندق.

خدمات بتفوق الخيال… بإحساس بيتي

من لحظة دخولك، بتلاقي استقبال دافئ بيقدموا خبراء بالضيافة الشامية، بيهتموا بتفاصيل راحتك من دون ما تطلب. الغرف بنظافتها اليومية، الإنترنت المتوفر، وطاقم العمل يلي بيحكي لغات عدة، كلّن جاهزين ليقدمولك خدمة بمحبة ولطافة دمشقية.

وبيوفرولك نقل من وإلى مطارات دمشق وبيروت وعمان، وخدمات سياحية بتنظملك جولات بالمدينة وما حولها، وكأنو عندك دليل شخصي بيحب يفرجيك كل زوايا الشام. وإذا كنت جاية بشغل أو مناسبات خاصة، فحتى الاجتماعات بيتعاملوا معها بأناقة ما بتخلو من الطابع الشامي الأصيل.

بيت زعفران… هون بتصير دمشق بيتك التاني

هاد المكان مو مجرّد إقامة فاخرة، هو تجربة بتعيشها بكل حواسك. كل تفصيل فيه مصنوع ليحكي، ليدللك، وليخليك تشتاق ترجعله حتى قبل ما تتركه. زور بيت زعفران وخلي روحك تغوص بأجواء بتشبه المسلسلات الشامية الأصيلة… بس هالمرة، البطولة إلك والقصة كلها من صنع لحظاتك الحلوة!

الموقع: باب توما – حارة بولاد – دمشق القديمة

الهاتف الأرضي : 963 11 543 86760 / 1 / 2 / 3