أفضل 6 مقاهي في دمشق تستحق التجربة!

إذا إنت من الناس اللي بيحبوا القعدة الحلوة، وريحة القهوة الدمشقية، وبتدور على أماكن رايقة بتفصل فيا عن ضجة المدينة، فهالليستة معمولة إلك. من قلب دمشق القديمة لأحياءها الجديدة، جمعنالك 6 مقاهي، كل وحدة بتحكي حكاية، وكل فنجان فيا بيحملك للحظة بتضل ببالك:

1. مقهى عالبال  

بهالمكان، بتحس حالك ماشي بصفحة من كتاب تراثي. صور فيروز على الحيطان، مع صوتها يلي بيملى الجو بأنغامه الرائعة، والكراسي الخشبية الأنيقة اللي بتعطي دفا لكل الزوايا. تصميمه التراثي عمره فوق الـ ٤٠٠ سنة، لهيك بـ عالبال بتحس حالك ببيت جدودك. القعدة هون بتخليك تحن، تتأمل، ويمكن تكتب سطر شعر لأن كل حجر فيه بيحكي حكاية. 

  العنوان: القيمرية - حارة الشاويش
 للتواصل:  0963115445794

2. كارما كافيه  

إذا بدك قعدة نقية بلا دخان ولا أركيلة بس راحة نفسية! كارما هو المكان المناسب. جو هادي، جلسات مريحة، وفيك تدرس، تشتغل على اللابتوب بكل تركيز، وكل شي محسوب ليخليك مرتاح ومبسوط. عندهم وجبات خفيفة، مشروبات متنوعة و فريش، وحتى ساندويشات نباتية. وكل هاد بجو رايق ما بينسّى.

  العنوان: الروضة – مقابل حديقة المدفع
 للتواصل:  0994913060

3. مانديلا كافيه  

لو حدا سألك عن كافيه فيه فكرة جديدة وقعدة بتشبه الحلم، قله مانديلا! من جلسات المراجيح، لتصميم عصري، لأكلات خفيفة ومشروبات متنوعة وأجواء بتنسيك الدنيا. مناسب للتصوير، للصحبة، أو حتى لقعدة مع حالك.

العنوان: قوس باب شرقي – مقابل كنيسة الأرمن
للتواصل:  0954357742

4. مقهى القشلة 

مقهى معروف بين شباب الشام، شعبي بس راقي، بأجواء دمشقية خالصة ، وكل زبون بيزورها مرّة، بيرجع إلها. تصميمها الدمشقي التراثي، أجواءها، وجباتها الخفيفة، مشروباتها المتنوعة، لكل شي فيها معمول بذوق و بقعدة بتسر القلب والعين.. مناسبة كتير لجلسة هادية صباحية، لقاءات مسائية أو حتى قعدة سمر بين رفقاتك.. 

  العنوان: الشعلان – شارع الأمير عز الدين

5. كافيه غزل  

قعدة بتاخدك لمكان تاني... إطلالة ع جبل قاسيون من قلب القيمرية! الجو، المشروبات، النقاريش، وكل تفصيل بالمكان فيه دفا وجمال الروح الدمشقية، والخدمة كتير لطيفة. إذا بدك ترتاح وتروق، غزل خيارك الأمثل.

  العنوان: القيمرية – تاني دخلة بعد كروسان القيمرية

6. مقهى النوفرة 

رمز من رموز الشام القديمة، وعنوان للحكواتي الدمشقي. النوفرة مو بس مقهى، هي مكان تراثي إلو أكتر من ٥٠٠ سنة، وجمّع على طاولاتو كتّاب، فنانين، وسياح من كل العالم. القهوة على الفحم، والأركيلة، والأجواء الدمشقية الأصيلة ما بتلاقيها بمكان تاني.

 العنوان: القيمرية – جنب الجامع الأموي
 للتواصل :  096311223540

شو ناطر؟

كل مقهى من هدول الـ مقاهي في دمشق بيحمل طابع خاص بيخلي تجربتك فريدة، سواء كنت من عشاق القعدة الدمشقية الأصيلة أو بتدور على مكان تشتغل فيه برواق. جرب تزور واحد منهم، وخلّي فنجانك يكون بوابتك ليوم حلو.

المزيد:

أكبر منتزه و أجمل مدينة ألعاب و إنترنت 5G وين بالشام؟

إذا عم تفكر كيف ممكن تقضي نهارك برا البيت، بعيد عن زحمة المدينة، وبمكان بيلم العيلة والرفقات وبيجمع المتعة مع الراحة؟ منتزه في ومي بالشام هو الجواب يلي بدك ياه!