أطيب بغاجة شامية وين بتلاقوها بدمشق! 

البغاجة مو بس أكلة، هي من روح المطبخ الدمشقي وتاريخه العريق، رقائق رفيعة مقرمشة ومحشية بحشوات بتشهي (جبنة، لحمة، بيتزا، قشطة)، وبتنخبز بالفرن لتطلع بلونها الدهبي وشكلها يلي بيغري القلب قبل العين.
إذا كنت من عشاق الـ بغاجة، جمعنالك 4 محلات بدمشق بيقدّموها بطعم بيرجعك لأيام الزمن الطيب:

1. بغاجتي

مكان بيحاكي الشام بكل تفاصيله… من البغاجة السخنة المحشية بالجبنة أو اللحمة أو القشطة، لبغاجة البيتزا يلي بتضيف لمسة عصرية لطبق كلاسيكي. وطبعاً، ما بتكمل القعدة بدون كاسة شاي دمشقي بتحلي الجلسة.

العنوان: كريسمس ماركت – مقابل فندق الداما روز

2. حلويات نبيل نفيسة

خبرة سنين، وطعمة بتضل بالبال… نفيسة بدمشق عم يقدم بغاجة باللحمة، الجبنة أو القشطة، والسر كله بالعجينة والخبز يلي دايمًا بيطلع متقن. هي مو بس حلو، هي لقمة بتنعمل بمحبة وتاريخ.
العنوان: باب الجابية

3. حلويات الكيال

أجواء بسيطة ومحببة، والبغاجة عندن بتضل حكاية… الطراوة، التحميصة، والسعر المقبول بيخلوك ترجع كل مرة.
سواء اخترت اللحمة أو الجبنة، كل وحدة أطيب من التانية، المكان بسيط بس الطعمة لذيذة كتير و بتحكي عن أصالة الشام.
العنوان: ساحة المرجة

4. حلويات الخيال

بغاجة معمولة بحُب من محل بدمشق معروف بحلوياته الشرقية.لحمة، قشطة أو جبنة ، العجينة خفيفة ومحشية بمحبة، والسعر كمان بيخلي التجربة أحلى.
العنوان: ساحة الشهبندر – طريق السبع بحرات

خدلك استراحة، جرّب بغاجة طيبة من هالمحلات، وخلّي أول لقمة تحكي عن الشام… لأنو ما في متل نكهتها ولا في أطيب من أصالتها!

تأكد تزور قسم #كول-وشكور على موقعنا لتشوف المزيد!