بالشامي
غرائب وعجائب لهجتنا الشامية بالأكل والشرب!
يا سلام عالشوام وشو بيحبّوا الأكل! بس مو بس حب… نحنا بدمشق منعطي لكل لقمة اسم، ولكل شربة فعل، ولكل حركة وريحة نكهة! يعني ما بيكفي تقول “أكلت”، لأ يا حبيبي، لازم تقول كيف أكلت، وشو أكلت، وقديش كنت شبعان! يلا نبلّش سوا بهالجولة اللذيذة داخل قاموس غرائب وعجائب لهجتنا الشامية بالأكل والشرب!، يلي بيخلي الفعل يتغيّر حسب نوع الأكل أو توقيتك.
حسب التوقيت:
إذا أكلت شي خفيف قبل الوجبة… منقول:
“عم نئود نئودة!”
وإذا أكلت شي خفيف بعد الوجبة ؟… منقول:
” عم نقرش نقرشة، بس مو جوعان!”
أما الأكل بعد الشبع؟ …منقول:
“عم نأنئ نئنئة، ما قدرت قاوم!”
حسب نوع المشروب:
▪ الشوربة؟ شَفّ
▪ الشاي؟ شَفَط
▪ المي؟ كَرَع
▪ العرقسوس؟ غَبّ
▪ القهوة؟ مَزْمَزة
▪ العصير؟ زَرْنَئة
حسب أنواع الأكل؟ كل نوع إلو فعل لحالو:
أكلة الراس (الذبيحة)؟ “فَصَّصت” الراس تفصيص.
العَضَم؟ “مَلَّصتو” تمليص ما خلّيت فيه شي!
الفول؟ “غَمَّست” بالفول تغميس .
الرز بحليب؟ “لَهَطتو” لهط!
الكوسا؟ “زَمَطت” الكوساية زَمط.
الخيار؟ “قَرَطتو” قرط سريع.
الشوربة؟ بتقول: “شَرِئِت” الشوربة شرء.
العلكة؟ “جَلء”. منقول لا تتجولئ بالعلكة.
المخلل؟ “أرَشِت” كم قطعة أرش!
الخس؟ “هَرَش” ورقة ورقة.
وأما إذا أكلت كبة
بيطلع معك أجمل توصيف:
“اشتغل السَفء والطَرء!”
يعني صوت القرمشة شغّل عندك أجهزة التذوق كلها… صوت وفعل !
وختامًا
لهجتنا الشامية غنية، لذيذة، وبتعيش تفاصيل بالأكل وكأنها رواية!
وهالكمية من الأفعال بتدل اديش نحنا شعب منعشق الأكل، وبنعرف كيف نوصفه، ونستمتع فيه بكل حرف !
خبرونا شو بتعرفوا كلمات شامية غريبة كمان؟
ممكن يعجبكم كمان: ١٢ شغلة بتخلي الشام غير شكل.. ليش كل شي بالشام أحلى؟