هضامة الزلغوطة الشامية بالأعراس الدمشقية ..تعرفوا عليها! 

بالشام، ما في شي بيملى الجو فرح أكتر من صوت الزلغوطة الشامية، أو متل ما منسميها نحنا: الزلاغيط. هالصوت النسائي العالي يلي بيعبر عن الفرح و بيوصلو من قلب الحضور لقلب اصحاب الحفل. وبيفتح باب البهجة بكل المناسبات، وخاصة بالأعراس.

الزلغوطة مو بس صرخة فرح، هي فن لحالو، إلها كلمات وتواقيع خاصة، وكل بيت شامي بيحفظ منها جمل بتشبهه.

من أول “أوها” لآخر “لي لي لي لي ليش”، بتبلش الحكاية، وبتكمل النسوان الشاميات رقص وغني وزغاريد من القلب، كأنو الفرحة طالعة من كل زاوية بالبيت.

تعو نغوص سوا بهالتراث الحي ونعيش لحظات من أجواء الفرح الشامي المميز:

هي كمشة زلاغيط شامية:

• أوها ببيتنا رمانة، أوها حامضة ولفّانة، أوها حلفنا ما نقطعا، أوها ليدخل عريسنا بالسلامة، لي لي لي لي ليش
• أوها ديارنا كبيرة، أوها ودرج الحمّام فيها، أوها وأم العريس فرحانة، أوها إن شاء الله ربي يهنيها، لي لي لي لي ليش
• 
  أوها عاللعلعي اللعلعي، أوها يا صبايا تجمعي، أوها يا ليل طول طول، أوها ويا شمس لا تطلعي، لي لي لي لي ليش
• 
  أوها حصنتك بياسين، أوها ويا زهر البساتين، أوها يا مصحف صغير، أوها على روس السلاطين، لي لي لي لي ليش
• أوها شو هالنهار اللايق، أوها وفرحتلنا الخلايق، أوها وطقت قلوب الأعادي، أوها ولمن حقت الحقايق، لي لي لي لي ليش
• 
  أوها يا ما قعدوا جنبي، أوها ويا ما حرقوا قلبي، أوها وقالوا فلان ما بيتجوز، أوها تجوز ونصرني ربي ، لي لي لي لي ليش
• 
  أوها يا صحن رز بحليب، أوها وكل ما برد بيطيب، أوها نحنا أهلية، أوها وما في حدا غريب، لي لي لي لي ليش
• 
  أوها العريس يا واحد، أوها وعروستو يا اتنين، أوها يا خرزة زرقا، أوها ترد عنهن العين، لي لي لي لي ليش
• 
  أوها يا عريس لا تعبس، أوها افريد البقجة والبس، أوها شواربك عروق ريحان، أوها وسوالفها عروق النرجس، لي لي لي لي ليش
• 
  آويها ويا صحن نجاص آويها ومكلل بالألماس آويها ويلي بياخذ بنت فلان آويها بيمشي مرفوع الراس لي لي لي لي ليش
• أوها وطبخنا مجدّرة، أوها ومجلّلة بالكزبرة، أوها وعروستنا حلوة، أوها وما بدها غندرة، لي لي لي لي ليش
• 
  أوها ويا صحن تين، أوها ومجلل بالياسمين، أوها وعروستنا زغيرة، أوها وما طبقت العشرين، لي لي لي لي ليش
• 
  أوها وامشي دقّة دقّة، أوها يا صنوبر منقة، أوها كل الفرحات بطالة، أوها إلا فرحتنا من حقّة، لي لي لي لي ليش
• 
  أوها صلّوا عالنبي، أوها وزيدوا صلاتو، أوها ويلي ما بيصلي عليه، أوها تطق مرارتو، لي لي لي لي ليش

الزلغوطة الشامية من المسلسلات السورية:

من غير زلغوطة الشام، ما بيكمل مشهد عرس بأي مسلسل شامي! من “باب الحارة” لـ”حمّام شامي”، الزلاغيط كانت حاضرة وبقوة، وخلّت المشاهد يعيش الفرح على أصوله.

مسلسل باب الحارة

مسلسل حمّام شامي

مسلسل ليالي الصالحية

الزلغوطة الشامية مو بس كلمات، هي نغمة بتعيش جوّا القلب، فيها حنيّة الشام وفرحتها، ودفا المحبة بين الناس. لما بتكون العيلة مجتمعة، والنسوان عم تزغرد من كل قلبها، بتحس إنو الدنيا بعدها بخير، والفرح مو ناقصو شي.
الله يديم الأفراح بكل بيت سوري، وتبقى الزغاريد عامرة بكل حارات الشام.

عجبكن المقال ؟ممكن يعجبكم كمان: ١٢ شغلة بتخلي الشام غير شكل.. ليش كل شي بالشام أحلى؟