مدونة
مسلسلات سورية مقتبسة من روايات عربية و عالمية
لما بيجتمع الإبداع الأدبي مع الدراما السورية، بتطلع أعمال بتحفر بالذاكرة. كتير من المخرجين والكتّاب لجأوا للروايات المعروفة عربيا ًوعالمياً ليقتبسوا منها قصص لـ مسلسلات سورية حققت شهرة كبيرة، واللي بدورها ساهمت كمان بنشر الأدب لمجتمع أوسع .ووصلت لقلوب المشاهدين وحملت قصص ما بتنتسى.
يلا نبلّش بأهم مسلسلات سورية مقتبسة من روايات:
1. الندم
مأخوذ عن رواية “عتبة الألم” للكاتب الفلسطيني حسن سامي يوسف.
أخرج المسلسل الليث حجو، وانعرض سنة 2016.
بيحكي قصة “عروة”، الكاتب يلي بيراجع حياته من سنة 2003 لسنة 2016، وبينحط قدام خيارات صعبة وقصص بتعكس التغيرات الاجتماعية والسياسية بالبلد.
الندم نال جائزة أفضل مسلسل سوري وقتها، وشارته كمان فازت بجائزة أحلى شارة.
2. نهاية رجل شجاع
مقتبس عن رواية بنفس الاسم للكاتب السوري الكبير حنا مينا.
كتب السيناريو حسن م. يوسف وأخرجو نجدة أنزور سنة 1994.
بيدور حول “مفيد الوحش”، الشاب القبضاي يلي بيقاوم الاستعمار الفرنسي وبيتحول لرمز وطني بقريته. مسلسل عمل نقلة نوعية.
3. بسمة الحزن
مأخوذ عن رواية “دمشق يا بسمة الحزن” للأديبة السورية ألفة الإدلبي.
سيناريو رفيق الصبّان وإخراج لطفي لطفي سنة 1992.
بيدور عن “صبرية”، بنت دمشقية بتعيش فترة الاستعمار الفرنسي، وبينحكى عن حياتها وحبها لـ”عادل” ضمن قيود مجتمعها المحافظ.
4. الأرواح المهاجرة
مقتبس عن رواية “بيت الأرواح” للكاتبة إيزابيل الليندي.
سيناريو قمر الزمان علوش وإخراج شوقي الماجري سنة 2002.
بتمشي القصة مع عيلة بتخسر كل شي بسبب تبذير الأب، وبنشوف كيف الأجيال بتحاول ترجع تبني حياتها من الصفر.
5. حسيبة
مقتبس عن رواية بنفس الاسم للأديب السوري خيري الذهبي.
إخراج عزمي مصطفى سنة 2006.
بيحكي عن “حسيبة”، البنت يلي بتواجه الاحتلال الفرنسي، من طفولتها لحتى صارت رمز للكفاح والنضال الوطني.
6. أسعد الوراق
مقتبس عن رواية “الله والفقر” للكاتب السوري صدقي إسماعيل.
أخرجتو رشا شربتجي سنة 2010.
بيروي قصة “أسعد”، الشاب البسيط يلي عاش ظلم كبير بحياته، لحتى تمرد وصار مناضل ضد الاحتلال الفرنسي.
7. المصابيح الزرق
مقتبس عن رواية “المصابيح الزرق” للكاتب السوري حنا مينا.
سيناريو محمود عبد الكريم وإخراج فهد ميري سنة 2012.
بيتطرق لفترة 1939-1945 وقت كان الشعب السوري بيقاوم الاستعمار الفرنسي، وبينحكى عن ناس عاشوا وسط التوترات الاجتماعية والسياسية.
8. العراب – نادي الشرق
مقتبس عن رواية “العراب” للكاتب الأمريكي ماريو بوزو.
كتب السيناريو رافي وهبي وأخرجو حاتم علي سنة 2015.
بيحكي عن عيلة كبيرة بتشتغل بالتجارة والسياسة، وبتتعرض لصراعات داخلية ومؤامرات بتكشف وجوه تانية للعيلة.
9. عندما تشيخ الذئاب
مقتبس عن رواية بنفس الاسم للكاتب الأردني جمال ناجي.
سيناريو حازم سليمان وإخراج عامر فهد سنة 2019.
بيدور بالـتسعينات، وبيرصد كيف الصراعات الاجتماعية والسياسية والاقتصادية أثرت على الناس، وكيف تغيرت المبادئ عند الكتير منهم.
وهيك منشوف انو الدراما السورية لما اتكأت عالأدب، قدرت تطلع أعمال خالدة بالذاكرة العربية. مسلسلات نقلتنا لعوالم غنية بالشخصيات والحكايات يلي بعدها بتترك أثر بكل يلي تابعها.
انبسطت بهالمقال عن مسلسلات سورية مقتبسة من روايات؟ تأكد تزور قسم #مسلسلات و أفلام سورية على موقعنا لتشوف المزيد!