سلطة أمثال دمشقية لأكلات من حياتنا اليومية!

مين قال إنو الأكل بس للمعدة؟! من أول ما بتسمع أمثال شعبية دمشقية، بتكتشف إنو الأكل دخل بكل تفاصيل حياتنا اليومية. ما في أكلة إلا ولبسناها معنى، من الخيار والفقوس للكوسا والبصل، حتى الخبز واللحم، كلهم صاروا جزء من تعابيرنا!

 نون بوست

أمثال شعبية دمشقية وأكلاتها:

1. “عضة كوساية وبوصل لعندك”
يعني شوي وبوصل لعندك او شوي وبخلص الشغلة يلي بإيدي.

2. “طولها متل عرق الفول”
بينقال للبنت الطويلة 

3. “شو القصة خيار وفقوس؟”
اذا في تمييز بين الناس وواسطة

4. “يا داخل بين البصلة وقشرتها ما بينوبك غير ريحتا”
يعني لما تتدخل بموضوع ما إلك في شي، فما رح تلاقي غير الأثر السلبي عليك.

5. “شو ماشي على بيض؟”
لما يكون الشخص بطيء كتيير.

6. “لاقيني ولا طعميني”
يعني استقبلني بمحبة ، وما بدي منك شي مادي لا غدا ولا عشا.

7. “ما هضمته”
لما ما يعجبك شي، بتقول ما هضمته يعني ما حبيتو.

8. “بتاكلني لحم وبترميني عظم”
لما حدا يستغلك، وبالنهاية يتركك.

9. “اللحم الكم والعظم النا”
لما تدلل شخص على حساب شخص تاني، يعني بتعطيه أفضل الشي.

10. “وشو مابيضحك لرغيف السخن؟”
يعني شخص بيضل عابس ونكد وما بيبتسم

11. “العز للرز والبرغل شنق حالو”
هالمثل بيحكي عن التمييزالاجتماعي بالدعم والدلال بين شخصين.

12. “شو بدي أتذكر منك يا سفرجل، كل عضة بغصة” 

منستخدمو للتعبيرعن الذكريات السلبية أو التجارب السابقة السيئة أوالحزينة.

13. ” فولة وانقسمت نصين”

دليل الشبه الكبير بين شخصين.

الشام موبس مكان للأكل الطيب، الشام هي المكان اللي مندخل فيه الأكل بكل مواقفنا، كل أكلة إلها معنى بتكمل هويتنا وحياتنا اليومية.

شو رأيكم؟ في أمثال جديدة بتعرفوها؟ شاركونا في التعليقات، خلونا نكمل سلطة الأمثال الدمشقية مع بعض!

ممكن يعجبكم كمان: ١٢ شغلة بتخلي الشام غير شكل.. ليش كل شي بالشام أحلى؟