ما في متل دمشق لما بدك تعيش تجربة بتجمع بين التراث العريق والفن الراقي. المدينة يلي ريحتها تاريخ وحكاياتها بتتغلغل بكل حجر فيها. إذا كنت من عشاق الأماكن يلي بتخليك تحس بالعظمة والجمال الفني والتراثي، رح نعرفك على أماكن بالشام بميزها الفن لازم تزورها لتشوف سحر الماضي والحاضر مع بعض.

1. غاليري مصطفى علي 

إذا كنت بتحب النحت والفن يلي بيجمع بين الأصالة والحداثة، غاليري مصطفى علي هو مكانك.
المكان موجود بحي الأمين في بيت دمشقي قديم مليان بروح التراث والجمال. مصطفى علي، النحات السوري المعروف، حول هالمكان لتحفة فنية بتضم أكتر من 35 قطعة فنية، وكل وحدة بتحكي قصة.
فيك تشوف منحوتاته المميزة المصنوعة من الحجر، البرونز، والمعادن يلي بتمزج بين الفنون الأوغاريتية والتدمرية بطريقة مدهشة.

العنوان: حي الأمين، جادة تل الحجارة، دمشق
هاتف: +963115421988

2. المتحف الوطني بدمشق

المتحف الوطني مو مجرد مكان للقطع الأثرية، هو بوابة لعصور مختلفة من تاريخ سوريا.
بتقدر تشوف قطع من مواقع تاريخية مثل أوغاريت، ماري، وإيبلا، بالإضافة لقطع رومانية، بيزنطية، وإسلامية. المدخل وحده عبارة عن إعادة بناء لبوابة قصر الحير الغربي من العصر الأموي.
إذا بدك تعيش التجربة كاملة، خصص كذا ساعة، وخود معك دليل ليشرحلك عن المجموعة المذهلة يلي بتعكس تاريخ سوريا العظيم.

العنوان: بجانب جسر الحرية، دمشق

3. قصر العظم – قلب دمشق القديمة

قصر العظم هو قطعة من الجمال والعمارة الدمشقية القديمة. بناه أسعد باشا العظم بالقرن الثامن عشر، وهو مثال رائع للفن الإسلامي والدمشقي.
القصر مميز بزخارفه، قاعاته، وحدائقه الداخلية. حالياً القصر متحف للتقاليد الشعبية، وبتقدر تشوف فيه مشاهد تمثيلية عن الحياة الشامية القديمة، من الأعراس الدمشقية لأسواق النحاسين ,الزجاج والمقاهي الشعبية.

العنوان: نهاية سوق البزورية، بجانب الجامع الأموي

ليش تزور هالأماكن؟

هالأماكن المليانة من الفن مو مجرد وجهات سياحية بالشام، هي تجربة بتاخدك لعالم مليان بالجمال والإبداع. بتجمع بين التراث، الفن، والروح الشامية الأصيلة. كل زاوية فيها بتحكي قصة، وكل قطعة فنية أو أثرية فيها بيزرع جواتك حب أكبر لهالمدينة الرائعة.

إذا كنت بالشام، لا تفوت الفرصة تزور هالأماكن وتعيش جمالها الفريد.

انبسطت بهالمقال؟ تأكد تزور قسم #وين نروح على موقعنا لتشوف المزيد!