أنواع الشخصيات يلي بتقابلها برمضان!

رمضان شهر الخيرات، بس كمان شهر العادات الغريبة يلي بتظهر عند بعض الناس! بهالشهر الفضيل، بتكتشف وجوه جديدة للشخصيات يلي حواليك، وبتشوف تصرفات ما كنت متخيلها! تعوا نشوف أشهر أنواع الشخصيات يلي بتقابلها برمضان:

1. المتنرفز على طول

هاد الشخص رمضان عنده حالة طوارئ! أول يوم صيام بيحس حاله داخل حرب عالمية ثالثة، والعالم كله متآمر عليه. أي كلمة غلط بتخليه يفقد أعصابه، وإذا سألته “شو بك معصب؟” بيرد: “مو شايفني صايم؟!”، مع إنو كل الناس صايمة وما حدا معصّب غيرو!

2. الحاضر النائم

ما بتشوفه إلا وقت الإفطار! من بعد السحور بينام، بيصحى عالآذان، وبيفطر وبيكمل نوم. حياته كلها صيام عن الأكل وصيام عن الحياة، وفجأة بتكتشف إنك نسيان صوته من قلة الحكي!

3. الزنان صاحب العد التنازلي

من الصبح وهو ماسك الموبايل: “لسا خمس ساعات”، “لسا ساعتين”، “لسا 20 دقيقة”، “إيمت بيأذن؟”.

بيكون قاعد معك بس تركيزو كله عالساعة، وما بتحس إلا فجأة صرّخ: “أذّن! أذّن! جيبولي المي بسرعة!”

4. المتحجّج بالصيام لكل شي

بتطلب منو شي؟ بيردّ: “مو شايفني صايم؟!”، بدك مساعدة؟ “مو قادر، تعبان من الصيام”. بيحسّس الناس إنو الوحيد بهالدنيا يلي صايم، وإنو لازم نحترمو ونتركو بحالو لحدّ ما يجي الفطور!

5. اللي بياكل من كل شي وقت الفطور

يلي بس يشوف السفرة وقت الأذان، بيقرر يذوق كل الأطباق يلي عليها. بيبدأ بالفتوش وبيكمل بالمحاشي والبرك والمتبلات وبينهيها بالمعروك والحلويات، وبعدها بيقعد نص ساعة وبيقول: “ما بعرف ليش شبعت بسرعة!

6. مدمن المسلسلات

ما بيهمّو الأكل ولا السهر، بس بيهمّو إنو يلحق كل المسلسلات الرمضانية. أول يوم رمضان، بيعمل جدول متابعة وبيقسّم وقتو بين دراما، أكشن، كوميديا، وما تنسى المسلسل التركي يلي لازم يلحقو بعد التراويح

7. شيف رمضان

هوي يلي بيقرر يفجر مواهبه بالطبخ برمضان! فجأة بصير شيف عالمي، بيجرب وصفات ما سمعنا فيها ، وأول ما الأكل يخلص، بيقول: “عنجد طيب؟ مو لأني عملتو!”

8. صاحب القعدة الرمضانية

ما عنده شغلة غير إنه يرتب قعدات بعد التراويح. كل يوم عنده عزيمة، وكل يوم عنده “سهرية رمضانية” لازم نحضرها، وإلا بتكون خيانة للصداقة!

9. يلي بيقرر يغير حياتو برمضان

كل سنة نفس القصة، بيبدأ رمضان وبيقرر يبطل عاداتو السيئة، يعمل دايت، يقرأ كتب، يصير شخص منتج، وبعد يومين بيرجع لنسختو الأصلية وبيقلك: “رمضان الجاية إن شاء الله، هالسنة ما لحّقت!”

وأنت، أي شخصية من هدول الشخصيات برمضان؟ أو بتحس حالك عندك شوي من كل وحدة؟!

تحقق من قسم #مدونة للمزيد!