شاورما الصدّيق في دمشق: أول مطعم شاورما بالوطن العربي!

إذا كنت من عشاق الشاورما، فمن المستحيل تحكي عن هالأكلة الشهية بدون ما تذكر “شاورما الصدّيق“، الاسم الأول في عالم الشاورما، والمطعم اللي انطلق من قلب دمشق ليكون رمزاً للمذاق الشامي الأصيل.

حكاية الصدّيق: البداية من دمشق

كل شي بدأ عام 1906 لما الطاهي الدمشقي صدّيق الخباز، بعد رحلة عمله وتعلمه أسرار الشاورما في إسطنبول، قرر يرجع لسوريا ويأسّس أول مطعم شاورما في ساحة المرجة. وهون بدأت الحكاية… مطعمه صار الوجهة الاولى لكل محبي الشاورما، من دمشق، ومن خارجها.

الشاورما اللي كانت تسمى “اللحم المشوي على الفحم”، تحولت بفضل شاورما الصدّيق لمذاق خاص، بنكهة مميزة وتتبيلة مستحيل حد يقاومها. وسرعان ما صار المطعم وجهة لكل اللي بدهن يجربوا الطعم السوري الأصيل.

فرع القنوات: أصالة المكان والتقاليد

لاحقاً، تم افتتاح الفرع الثاني لمطعم الصدّيق في حي القنوات. وهاد الفرع مو مجرد مطعم، بل هو امتداد لتاريخ عريق، لأنه تم إنشاؤه داخل بيت عربي دمشقي أصيل كان بيت الجد الأول لعائلة الصدّيق.

هون بتقدر تذوق الشاورما بنفس النكهة يلي انعرفت فيها قبل أكثر من قرن. بنفس الوصفة، بنفس التتبيلة، وبترافقها المقبلات الشهية متل الكبة المشوية والمتبلات.

سر الشاورما عند الصدّيق

السر مو بس بالطعم، لكن بالاهتمام بكل تفصيل:

• اللحم الطازج: بيتم اختيار لحم الفخذ بعناية، وبيحرص المطعم إنه يكون طازج يومياً، ليحافظوا على الجودة والطعم.
• النظافة والجودة: المطعم دايماً بيهتم بنظافة المكان والعاملين فيه.
• التوابل الأصلية: سر التتبيلة يلي خلّت شاورما الصدّيق تتميز عن غيرها.

شهادات التقدير والمشاركات

مطعم الصدّيق مو بس اسم في عالم الشاورما، هو أيضاً جزء من التراث السوري. ومن تقدير الناس له، تسلّم السيد “محمد الخباز” (من عائلة المؤسس) عدة شهادات تقدير من جهات سياحية ومن المحافظين والجمعية الحرفية للمطاعم والفنادق. وشارك المطعم أيضاً في “مهرجان دمشق الثامن للثقافة والتراث والسياحة” عام 2009.

الشاورما بنكهة التاريخ

سواء كنت زائر جديد أو من أهل البلد، ما في أحلى من إنك تزور مطعم الصدّيق وتعيش تجربة أول مطعم شاورما بالوطن العربي. بين ساحة المرجة وحي القنوات، بتحس إنه كل لقمة من شاورما الصدّيق بتحكي قصة، قصة تاريخ الشاورما بدمشق.

وين لازم تروح؟

📍 الفرع الأول: ساحة المرجة
📍 الفرع الثاني: حي القنوات

إذا كنت من محبي الـ شاورما، لازم تعيش تجربة الطعم الأصيل من مطعم الصدّيق في دمشق و أول اسم بالشاورما!

معقول يعجبك كمان مخبز حنانيا – أقدم مخبز قربان و الوحيد في دمشق