33 مصطلح شامي عجز غوغل عن ترجمته 

اللهجة الشامية غنية بالمصطلحات والتعابير يلي بتجمع بين خفة الدم وبلاغة المعنى. وهي المصطلحات ما بتحتاج شرح كبير، لأنها ببساطة بتعبر عن الحال من دون ما تضيع بالكلام. بس اليوم رح نحكي عن 33 مصطلح شامي يلي عجزت محركات البحث عن ترجمتها ، لأنو بصراحة ما بيفهمها إلا ابن الشام!

1. صار واتصور

لما حدا يكون مو معروف كتير او معروف بإنو حالتو على قدها و فجاة تبين عليه مظاهر الغنى و الرفاهية

2. فايق ورايق

لما تكون مرتاح ومبسوط، وما عندك لا شغل ولا هم، بيقولوا عنك ” فايق ورايق”، و احيانا لإنتقاد برادتك و لا مبالاتك بالاوقات الصعبة

3. بشحمو ولحمو

هاي لما تشوف شخص قدامك بعد غياب طويل وما بتصدق إنك شفته! بيقلك اي هاد انا “فلان” بشحمو و لحمو

4. الشاردة والواردة

لما تحكي عن كل شي، حتى التفاصيل الصغيرة، بتوصف الحالة بـ”الشاردة والواردة” يعني ادق التفاصيل

5. كاني ماني

هاي لما تكون عم تتفاوض أو تطلب شي وصاحبك يتردد ويتأخر، بتقله “لا تعمللي كاني ماني”، يعني خلصني او بمعنى لا تلف و تدور .

6. طبخ ونفخ

ما بدها شرح…

7. طبل وزمر

لما يكون في ضجة كبيرة، سواء حفلة أو حتى كلام بلا معنى، بيقولوا “طبل وزمر”، يعني الدنيا قايمة.

8. طنة ورنة

وصف لأي شي فيه مبالغة وضجة، سواء حكي أو أفعال.

9. فلان وعلان

لما تحكي عن ناس بدون تسميتهم، الشامي بيقول “فلان وعلان” او لما حدا مشان يتهرب من اغلاطه بيلزقها بأشخاص تانيين، بيقولو له هلأ لا تقلي فلان و علان…

10. هم وغم

لما تكون الدنيا عليك، وهمومك فوق رأسك، بيقولوا: حياته كلها هم و غم … تذمر من العيشة

11. حين ومين

وصف للحالات اللي بتصير نادرًا أو ما إلها وقت محدد: “ما بشوفو إلا كل حين ومين و عشر سنين “.

12. صد ورد

لما تكون القصة كلها رفض وقبول و مجادلة ، الشامي بيقول “صد ورد”.

13. طاخ وطيخ

وصف لأي شجار أو عراك بصوت عالي

14. خد وعين / خود وعطي

لما يكون في نقاش طويل ومطول، أو لما الموضوع بده مساومة، بيستخدموا هالتعبير.

15. سري مري

لما تكون عم تتردد على نفس المكان بدون سبب واضح للناس او عم ينزعجوا من زيارتك ” سري مري” .

16. قلي لقلك

يعني مشاجرة كلامية لحتى فهمك القصة أو أشرحلك الموضوع.

17. سياح نياح

وصف لمكان واسع جدا متل البيت

18. نط ما حط

يعني من الرعبة او الوجع مثلاً صار ينط ما يحط

19. شروي غروي

مصطلح دمشقي معناه “أي كلام”، أو كلام ماله قيمة او فايدة.

20. خبط لزق

لما تكون الأمور مو مدروسة ومتسرعة، بيقولوا عنها “خبط لزق” بدون تمهيد….

21. قشة لفة

يعني كل شي .

22. حق بق

لما حدا يعزمك على شي و تتظاهر انو ما بدك بيقولوا ” قلبه عم يقول حق بق”

23. قايم قاعد / ضايعة الطاسة

لما يكون في فوضى بالمكان بيقولوا قايم قاعد و ضايعة الطاسة لأنو مافي حدا كبير يوقف الضجة و الفوضى بالمكان.

24. لابيهش ولا بينش

وصف لشخص ماله نافع بشي، أو ماله أي تأثير.

25. خدني جيتك

وصف لجدال طويل بدون نتيجة

26. تيتي تيتي

“تيتي تيتي، متل ما رحتي جيتي”، يعني القصة ما تغير فيها شي!

27. من بيت شقاع لبيت رقاع

وصف لحالة الشخص يلي عم ينتقل من مكان لمكان و ينقل حكي و يعمل مشاكل بسبب زياراته

28. ما بفوت لسانه لحلقه

وصف للشخص اللي ما بيسكت، طول الوقت بيحكي بلا توقف.

29. خنطق منطق

لما يكون شيئين او شخصين متطابقين بالصفات

30. ضراب السخن

وصف للأشياء او جواب موحد بيستخدمو الشخص المعصب وقت تسالو عن شي متل شو رح ناكل اليوم؟ الجواب: ضراب السخن

31. مغوطن

غايب عن الوعي

32. فالج لا تعالج

يعني لا تتعب حالك بالشرح او بفعل معين لإصلاح شخص او علاقة او شيء ما لأنو ما رح تستفيد شي

33. ولي على قامتي

للتحسر على شيء سيء

هي المصطلحات هي جزء من روح الشام وناسها، وبتعكس خفة دمهم وقدرتهم على التعبير ببساطة عن أعقد الأمور. يا ترى شو أكتر مصطلح بيضحكك أو بتحبه؟ و اذا في مصطلحات نسيناها خبرونا!

إذا انبسطت بهالمقال عن أسماء دمشق عبر العصور؟ تأكد تزور قسم #بالشامي على موقعنا لتشوف المزيد!