بالشامي
Aisha Aji
This article is also available in English. Switch Language

الأرقام واستخداماتها العجيبة بالشام

الأرقام بالشام مومجرد اعداد، هي وسيلة للتعبير عن المبالغة، التقدير، أو حتى التوبيخ، وكل رقم عنا إلو قصة وطريقة استخدام بتعبر عن تفاصيل حياتنا اليومية بعفويتها وجمالها. تعالوا نتعرف على الأرقام وكيف الشوام بيستخدموها بمعانيها الفريدة.

الشام

(٢): أطول “ساعتين” بالعالم

الرقم ٢ بلهجتنا الشامية هو رمز للمبالغة بالوقت، خصوصاً لما نحكي عن “الساعتين”. وهدول الساعتين غالباً بيكونوا ٥ دقايق بالحقيقة:

صرلي ساعتين ناطرك: يعني انتظرتك شي ٧ دقايق.

هلكت صارلي ساعتين واقف عرجليي: غالباً وقفت ٣ دقايق.

صرلو ساعتين عم يحكي بنفس القصة: الحقيقة؟ ما بتتجاوز ٥ دقايق.

(٧): الحيرة والنوم العميق

الرقم ٧ بالشام مرتبط بشيئين مميزين: التعب والنوم:

دخت ال٧ دوخات: لما ندور على غرض أو شخص وما نلاقيه بسهولة ، يعني لفّيت كل الشام وما استسلمت.

ب”سابع” نومة: لما يكون حدا نايم نوم عميق وصعب يصحى.

(١٠): علامة الجودة والكمال

١٠ هو الرقم يلي بيعبر عن المثالية بالشام، وكل شي بيكون “١٠ على ١٠” بيكون تمام:

الشغل ١٠ على ١٠: يعني العمل ممتاز وما عليه حكي.

فتح عيونك ١٠ على ١٠: يعني انتبه وركز منيح وما تفوّت شي.

(٦٠): الرقم المعبر عن الغضب

٦٠ بلهجتنا الشامية بيستخدم للتوبيخ والتهديد أو وصف الشي السيئ. ودايماً بيكون مرتبط بشي سلبي:

روح ب”٦٠” داهية: تعبير عن الغضب الشديد.

ابن “٦٠” كلب: استخدام حصري لهالرقم بالشتائم.

قلتلك ٦٠ مرة: وفعلياً غالباً قلتها مرتين بس ,بتستخدم بالنصيحة يلي ما التزم فيها الشخص وندم .

(١٠٠): رمز التقدير والاحترام

الرقم ١٠٠ هو اللي بيحمل معاني التقدير والتحية الكبيرة:

١٠٠ أهلا وسهلا: تعبير عن أجمل ترحيب وبتسمعها كل ما تزور حدا بالشام.

١٠٠السلامة: أمنيات بالصحة والسلامة.

“١٠٠ وردة على هالطلة”، هيي تعبير عن الغلاوة.

(١٠٠٠): الفرح الكبير

الرقم ١٠٠٠ هو اللي بيدل على الفرح والاحتفال الكبير:

١٠٠٠ مبروك: أكبر تهنئة بتطلع من القلب.

١٠٠٠ الحمد لله عالسلامة: تعبير عن الفرح بسلامة الشخص.

الأرقام وحكاياتها الشامية

الأرقام بالشام مو مجرد حسابات، هي طريقة بتعبر عن ثقافتنا وعفويتنا اليومية. كل رقم إلو معناه وطريقته الخاصة بالتعبير، سواء كان للتقدير، المبالغة، أو حتى الغضب. هي جزء من هويتنا الدمشقية المليانة جمال وحياة.

إذا انبسطت بهالمقال، تأكد تزور قسم #بالشامي على موقعنا لتشوف المزيد!