مدونة
آيات عاجي
This article is also available in English. Switch Language

صندوق العجايب : ذكريات من الزمن الجميل 

كان يا ما كان، بزمانات الشام، كانوا الولاد يستنوا بفارغ الصبر قدوم “صندوق الدنيا”. هداك صندوق العجايب الخشبي يلي كان بيحمل معو العجايب والقصص الحلوة. كانوا يسموه كمان “صندوق الفرجة” أو “صندوق العجايب” ، وكان متل نافذة لعالم مليان خيال ومغامرات. 

كان عبارة عن صندوق خشب كبير، بيحمله صاحبو، يلي كانوا يسموه “المخايل”، على ضهرو و يفتل فيه من حارة لحارة. كان ينادي ” تعا تفرج يا سلام على عجايب الزمان ” . وبس يتجمعوا الولاد حواليه، ينصب الصندوق على حامل خشب، ويبلش العرض. كان المخايل يلف الصور المصنوعة بإيدين الفنانين، صورة ورا صورة، لتمرق الصور من فتحات صغيرة مزودة بعدسات مكبرة. الولاد كانوا يتطلعوا من خلالها ويشوفوا قصص عن الأبطال والزمنات القديمة. 

Credits: Hala Qasqas

الصور كانت تحكي عن أبطال متل عنترة بن شداد وسيف بن ذي يزن، أو تعرض مناظر طبيعية ومدن بعيدة يلي الولاد ما كان عندن فرصة يشوفوها بالواقع. ومع كل صورة، كان المخايل يسرد حكاية مشوقة، ويغير نبرة صوته ليميز بين الشخصيات ويخلي كل مشهد كأنه حقيقي.


وكان المخايل معروف بسرده المهضوم.


يلي يجذب فيها انتباه الولاد ويضحكهم بنفس الوقت. مثلاً، لما يحكي عن الزير سالم، كان يقول: “اتفرج على الزير، هاد أبو كرش كبير، يشرب من الخمر برميل، وما بيسكر وما بيميل.” ولما يحكي عن الجليلة، كان يقول: “انظرلي عالجليلة أم عيون كحيلة، شعرها 12 جديلة.” أما لما يوصل عند قصة عبلة وعنتر، كان يقول: “اتفرج على عبلة، ريتا عضامها ما تبلى، من الشام لجيب البدلة، ومن بيروت لجيب الكردان، ومن حمص العدية، ومن سوق الحميدية، ومنها لفصّل فستان، كرمال عبلة يا جدعان، وعنتر بهواها مال.”

Credits: سوريا الماضي والحاضر

رغم بساطة الصندوق، إلا أنه كان يفتح قدام الولاد أبواب الخيال، ياخدهم برحلة لعوالم ما شافوها من قبل ، ويخليهم يحسوا بمتعة الاكتشاف والتعلم. كانت هالعروض متل السينما البدائية للولاد، يقعدوا بترقب وانبهار قدام هالصور يلي تحرك بعقولهم كتير من الأسئلة والخيالات.

وين ممكن نشوف “صندوق الدنيا” اليوم؟

مع مرور الزمن، صار “صندوق الدنيا” نادر تشوفه بالشوارع أو الحارات مثل أيام زمان، بس إذا حابب تشوفه، فيك تزور بعض المتاحف التراثية بدمشق وقصر العظم أو تحضره بمهرجانات ثقافية تراثية بتنظمها وزارة الثقافة بالتعاون مع بعض الجمعيات الأهلية.

انبسطت بهالمقال عن صندوق العجايب بدمشق؟ تأكد تزور قسم #مدونة على موقعنا لتشوف المزيد!