بالشامي
١٢ شغلة بتخلي الشام غير شكل.. ليش كل شي بالشام أحلى؟
الشام مو بس مدينة، هي حالة، شعور، وذكريات بتجمع الماضي والحاضر بكل حب. لما تمشي بشوارعها أو تقعد مع أهلها، بتحس إنك منهم و فيهم، بتحس بالألفة والحنية اللي نادراً ما بتلاقيها بغير مكان. بناء على ذلك، بالشام كل شي إلو طعم وروح، طيب ليش كل شي بالشام أحلى يا ترى؟
١. كاسة الشاي بالشام أحلى
لأنو بتنشرب الأهل والأحباب، و بترافقها فضفضة و حكايات و ذكريات. الشاي بالشام ما بينشرب بسرعة لأنو رفيق السردات الطويلة ورفيق فطور العيلة.
٢. الزحمة أحلى بالشام
لأنها مو مجرد زحمة سيارات، هي زحمة ناس إلها قصص.بتحس إنو كل واحد بيمر جنبك إلو حكاية، بيسلم عليك لو ما بيعرفك و بيقلك “الله معك” أو “يسعدلي هالوجه”. هون الزحمة ما بتزعجك و بتشوف الابتسامة على كل الوجوه.
٣. الشتي بالشام أحلى
لأنو ريحة الارض بعد المطر غير… وكأنو المطر مابيلبق غير للشام.
٤. فنجان القهوة بالشام أحلى
لأنو بيتقدم ضيافة و بينشرب على رواء مع الناس اللي بتحبهم و كيف اذا كان مع اطلالة بتنعنش القلب…
٥. يوم الوقفة بالشام أحلى
ريحة الحلو بتفوح من البيوت و اللمة الحلوة و معمول و عجئة هاليوم مو بس معجونة بالفستق و بالحب و الفرحة كمان.
٦. عربايات الأكلات الطيبة أحلى بالشام
خاصة عرباية الفتوش او المارشميلو و بياع الذرة والعوجا و الفول النابت و لطافة عمو البياع و كرمو و ابتسامتو المخبية وراها تعب سنين…
٧. العيد بالشام أحلى
بفرحة الأطفال النابعة من القلب و العيديات و الحلويات و الاجواء الحلوة و خاصة مشوار الارض السعيدة…
٨. التمشاية بالشام أحلى
خاصة بحارات الشام القديمة و الازقة و احلى شعور لما تضيع بين الحارات الضيقة المليانة دخاليج و حنية و دفا…. بتعرفوا اسم هالحارة؟
٩. التلج بالشام أحلى ليش يا حزركن؟
لأنو نادراً ما ينزل التلج عنا لهيك بيكون يوم تاريخي و الكل بينزل يلعب بالتلجات كبار وصغار، و كل حي بيعمل اكبر رجل تلج .الدفا بيجي من الفرح اللي بعيون الناس، مهما كان البرد قارص. في النهاية، التلج هون هو وقت للفرح، وللضحكة اللي ما بتنتهي.
١٠. صوت الأذان بالشام غير
المساجد القديمة بصوتها الحنون بتطمن القلب وبتعطي للمدينة هدوء وسكينة. و صوت الاذان الجماعي من الجامع الأموي بيرد الروح.
١١. حتى زقزقة العصافير وصوت الطبيعة بالشام أحلى
الصبح بالشام بيبدأ بصوت العصافير وكأنو الطبيعة عم تغني لذكرياتنا الحلوة.
١٢. وأكيد ريحة الخبز كمان أحلى
وخاصة الخبز المشروح مع حبة البركة يلي ما بتدوقوه إلا بالشام.
و شوفي احلى من الحكي الشامي و لطافة الشوام؟
على سبيل المثال، أهل الشام دايماً جاهزين للمساعدة بابتسامة، ولو سألت حدا عن شي، ممكن يترك شغلو بس ليدلك. الشامي بيحب يضيفك ويملا قلبك محبة قبل ما يملا فنجانك قهوة. حتى لو كنت غريب، بتحس إنك جزء من العيلة لما يقلك الشامي البيت بيتك و المحل محلك.
الشوام مو بس اساتذة بالتسويق و كمان اساتذة بالغزل و بالشام ما بيكفي إنك تقول “شكراً” و بس، دايماً الرد بيكون “الله يسلمك” أو “الله يعوض عليك”، وكل جملة فيها دعوة بالخير والبركة.