مطعم سوري دخل موسوعة غينيس!

يا ترى سمعتوا عن مطعم “بوابة دمشق”؟ هاد مطعم سوري دخل موسوعة غينيس كأكبر مطعم بالعالم سنة 2008! بيقع هالمطعم الضخم بضواحي دمشق وبيغطي مساحة 54 ألف متر مربع. وبيقدر يستقبل 6014 زبون بنفس الوقت، يعني تخيلوا اديش حجمو مهول. 

قصة إنجاز كبير

مطعم “بوابة دمشق” مو بس أكبر مطعم، هو كمان واحد من أروع الأمكنة بدمشق يلي بيجمع بين النكهات العالمية والتراث الدمشقي. المطعم بيتبع لعائلة السمان، وصاحب الفكرة هو شاكر السمان، يلي قرر يحول هالمطعم لمكان ما بيتكرر بالعالم.

المطعم اتأسس عام 2002، واستطاع يحصل على لقب أكبر مطعم بالعالم بفضل تصميمه الرائع وتنوع أطباقه. المطبخ تبع المطعم لحالو بيشبه مصنع صغير، ومساحتو حوالي 2500 متر مربع. وفيه أكتر من 1800 موظف بيساهموا بتقديم الخدمات على أعلى مستوى، والطهاة المدربين قادرين يجهزوا 25-30 وجبة بالدقيقة، متل الحمص وأكلات شعبية تانية.لهيك الزوار دايمًا راضين عن التجربة.

تنوع بالأقسام والأجواء

المطعم مقسّم لأقسام متنوعة، كل قسم عندو طابعه الخاص. في عنا “مطعم زنوبيا” يلي بيختص بالأكل الشرقي، وفيه لوحات جدارية وأعمدة بتشبه آثار تدمر، لهيك بتحس حالك قاعد بقلعة شرقية قديمة. كمان في قسم مميز بالأكل الصيني والهندي ، الخليجي والايطالي ، والزخارف والتفاصيل بهالأقسام بتعكس تقاليد وثقافات هالمطابخ.

متعة بصرية وروحية

غير الأكل اللذيذ، بوابة دمشق بيتميز بتصميم ساحر مع نوافير مائية وشلالات بتحيط بالمكان، وكمان في زهور وأشجار متنوعة بتعطي جو من الراحة والجمال. الساحة الخارجية لحالها لوحة فنية بكل معنى الكلمة، والزوار بيستمتعوا بجولة بين الأزهار والمجسمات التراثية.

بكل بساطة، مطعم “بوابة دمشق” هو أكتر من مجرد مكان للأكل. هو وجهة سياحية، علامة مميزة لسوريا، ورمز لتاريخ وتراث البلد ، سواء كنت سائح أو مقيم بدمشق زيارة لهالمكان حتكون تجربة ما رح تنساها.

ممكن كمان يعجبكم: جولة بالشام لأروع وأفخم محلات الشوكولا