وين نروح
مطعم ألف ليلة وليلة: حكاية من الخيال بدمشق
كان يا مكان بقديم الزمان، بقلب دمشق، في مطعم هربان من القصص و الحكايات، مطعم “ألف ليلة و ليلة” هو أكتر من مجرد مكان للأكل؛ هو تجربة ساحرة بتنقلك لعالم تاني، عالم ألف ليلة و ليلة بحد ذاته. تصميم المطعم بيشبه قصر علاء الدين و المصباح السحري و من لحظة دخولك، بتحس كأنك بطل قصّة خيالية من عصر السندباد .. المكان فيه 5 مطاعم شتوية و 3 مطاعم صيفية وصالتين استقبال. المطعم يبعد عن مطار دمشق الدولي 10 دقائق بس و هالشي بخليه مكان لجذب السيّاح…
خلينا نتعرف عالأقسام الموجودة بالمطعم:
١. قسم بحيرة السندباد
بوسط المطعم، بحيرة السندباد بتخطف الأنظار. ضيافة ولا أحلى، وديكورات مستوحاة من قصص السندباد البحري، بتعيشك جوّ من السكينة والراحة مع صوت البحرة و الشلالات.
٢. قسم سفينة نوح
واحد من أكتر الأقسام روعة، بتشوف منها المطعم من فوق بتراس صيفي منعش بياخد العقل، يعني منظر بانورامي بيعطيك إحساس رائع.
٣. قسم الياسمين
قسم الياسمين بتميز بأكبر شلال بالمكان و بحيرة ولا أجمل. يعني اسم على مسمى، بكل زاوية بيفوح عبير الياسمين، وهوا منعش بضيف على المكان راحة للنفس لا توصف.
٤. برج بيزا المائل
تصميم رائع لمجسم برج بيزا المائل الايطالي بيعيشك اجواء رحلة السندباد بأوروبا.
٥. مسرح الأعراس و الأفراح
لو كنت عم تخطط لعزيمة مرتبة او لليلة العمر، المطعم بيقدم مسرح مميز للأعراس والافراح، مع أجواء رومانسية بتخلي كل لحظة تتوثق بذاكرة الحاضرين. فخامة المكان و تفاصيل الديكور بتخلي كل مناسبة حلم بيتحقق.
٦. المطبخ الأكبر بدمشق
مطبخ مطعم “ألف ليلة و ليلة” بيُعتبر أكبر مطبخ بالشام، وبيقدم تشكيلة غنية من المأكولات الشرقية والغربية، غير المقبلات و السلطات بأنواعها، يلي بترضي كل الأذواق.
٧. جمال الطبيعة و زينة المكان
شجر الموز، الورود، والشلالات المنتشرة على طول المطعم بيزيدوا سحر المكان، ونسمة هوا دمشقية بتنعش القلب، بتخليك تنسى هموم الحياة و تعيش اللحظة بكل تفاصيلها.
٨. ختام التجربة: صورة بلبس السلاطين
وما بتكتمل زيارتك إلا بختام حلو، بتقدر تستأجر لبس السلاطين و تاخد صورة تذكارية ، لتترك بصمة بهالمكان الفخم و ذكرى حلوة ما بتنساها.