ليش منحب تفتيلة الشعلان؟

تفتيلة الشعلان سواء مشي أو بالسيارة هي عادة قديمة جديدة عند سكان الشام وخاصة الشباب، وبالتحديد يوم الخميس بيكون هالسوق ومحيطه مليان عالم بس ليش؟

الشعلان هو حي جديد نسبياً بالنسبة لمدينة دمشق، نوجد بالعشرينات من القرن الماضي وكان حي راقي منفتح بتسكنه الجاليات الأجنبية وخاصة الفرنسية والايطالية الموجودة بالشام، بالاضافة للعيل الدمشقية المخملية بهداك الوقت وموظفي الحكومة، تميزت مبانيه بجمالها المعماري، واتخذ اسمه بسبب نوري الشعلان أمير قبيلة الروّلة في مطلع العشرينيات من القرن الماضي، يلي اشترى بيت ياسين باشا الهاشمي رئيس وزراء العراق الكائنة في حي الشعلان بدمشق وبنى الشيخ نوري مسجد جنب منزله، وهيك تكنى المسجد والمنطقة كلها بكنيتة “الشعلان”.

مع الوقت تحول الحي من مجرد منطقة سكنية على أطراف دمشق القديمة وتحديداً الصالحية. لحي قائم بذاته ومنطقة سكنية وتجارية مهمة.. اما ليش منحب نتفتل فيه بالوقت الحالي ففي كذا سبب:

1- السوق:

منطقة الشعلان موجودة بنص العاصمة، وقريبة على الأحياء الراقية فيها من جهة أبو رمانة والروضة ومن جهة تانية الحمرا والصالحية وعرنوس، وبالتسعينات تقريباً تطور هالحي ليصير مركز تسوق وصار فيه عدد كبير من محلات التياب والاكسسوار المرتبة وغيرها، مع انو أسعاره كانت غالباً مرتفعة أكتر من غير أسواق إلا أنو بعده مقصد للتسوق لليوم.

2- سوق التنابل

مو بس لتسوق التياب، الشعلان مشهورة “بسوق التنابل” وهو سوق خضرا جاهزة للاستعمال بتلاقي فيها الكوسا المحفورة للحشي والبقدونس المفروم للتبولة وكل أصناف الخضرا المفرزة والفواكة المستوردة يلي بتسهل على ستات البيوت الشغل بالمطبخ.

3- الأكل:

بجانب كل محلات التياب وسوق الخضرا الشعلان فيها عدد من محلات أكل الشارع، هي المحلات صارت محطة ثابتة عند الناس يلي جاي عبالها مشوار مع أكلة خفيفة او عصير طيّب، من أشهر هالمحلات معجنات المحبة يلي عنده أطيب فطيرة جبنة ومحل العصير يلي عالزاوية يلي عنده عصير اسمه “كواج” عبارة عن كوكتيل فريز وحليب مجمد وسناك “هني” وبوظة عسل، وحلويات الورد، ومحلات الشاورما والبرغر وعربايات الدرة. كل هاد بيخلي الشعلان سوق أكل ممتاز.

4- العلاقات الاجتماعية:

ما معقول تمرق بالشعلان بلا ما تسلم على تنين تلاتة من معارفك وتوقف مرتين تلاتة مع حدا من قرايبينك، بسبب السوق والمحلات المنطقة دايماً عم تغلي ودايماً فيها ناس، وبسبب مدرسة الفرنسسكان- دار السلام الموجودة فيها وقربها لكتير مدارس بالمنطقة بيضل طلاب هالمدارس موجودين بالمنطقة وحتى بعد ما يكبروا بيضلوا متعلقين فيها وبيحبوا ينزلوا عليها

5- حديقة السبكي:

حديقة السبكي هي حديقة مشهورة وقديمة بالشعلان، كانت مهجورة ومهملة لفترة بعدين تجددت وتضوت وصار فيها ألعاب أطفال، يلي خلاها متنفس لسكان الشام وولادهن.

باختصار الشعلان منطقة حيوية بالشام وما معقول تطلب شي ما تلاقيه فيها من ناحية ومن ناحية تانية هي منطقة متعلقة بذكرياتنا يلي منحب نرجعلها على طول.