لازم تزوروا الحديقة البيئية: متحف الجزر الطبيعية بالشام

بمنطقة مليانة بيوت قديمة ورايقة، على الجهة الغربية من قلعة دمشق، بتتربع الحديقة البيئية، البقعة الخضرا يلي بتاخد الزائر من ضجيج المدينة وتلوثها لنقاء الطبيعة وصفاءها. الحديقة عبارة عن مجموعة من النباتات والأزهار يلي بتخطف قلوب المارة بألوانها وجمال تنسيقها. وبتخلق منظر مريح للنظر وملجأ حلو لكل حدا حابب يرتاح بعد مشوار طويل وسط الزحمة بالشام.

قصة أول حديقة بيئية بسوريا

هالمشروع بلش بجهد مجموعة من السيدات المثقفات يلي اجتمعوا تحت مظلة هدف واحد: إعادة الحياة لمكان كان حديقة غنّاء وصار مكب للنفايات. السيدات هدول فكروا يعيدوا المكان ليصير أحلى من قبل، خصوصي لأنو جاي جنب أماكن أثرية ودينية هامة، متل قلعة دمشق، نهر بردى، المسجد الأموي، ومقام السيدة رقية . المشروع اتنفذ بإشراف الجمعية السورية للبيئة، أول جمعية أهلية تهتم بالبيئة بسوريا.

رحلة بحث لتصميم الحديقة

لما بلشوا بالشغل، كان أول تحدي هو معرفة النباتات المناسبة للمنطقة. بسبب قلة المراجع، اعتمدوا على جهود ذاتية وبحث دقيق ليعرفوا أنواع النباتات والأشجار يلي رح يزرعوها، وأخيراً تم افتتاح الحديقة بعام 2005. لضمان استمراريتها، افتتحوا كافتيريا بطابع دمشقي جوا الحديقة، وهي أول مكان بسوريا يمنع التدخين فيه. مدخولها بيساهم بتغطية احتياجات الحديقة من بذور وأسمدة وأدوات زراعية.

جزر النباتات: تنوع فريد بقلب دمشق

الحديقة البيئية بالشام مساحتها حوالي 2500 متر مربع، ومقسمة لجزر صغيرة عددها حوالي 30 جزيرة كل وحدة محاطة بسور. وكل جزيرة فيها نباتات بصفة مشتركة متل:جزيرة نباتات الظل، جزيرة النباتات الصخرية، جزيرة الزينة القديمة، جزيرة الغابات، الجزيرة المائية، وجزيرة الياسمين يلي بيغطي عبقه الحديقة بالكامل. الحديقة بتحوي على 300 نوع من النباتات، تمثل تقريباً 10% من النباتات السورية. بتجمع أهم نباتات البيئة الدمشقية من نباتات البيت الشامي، غوطة دمشق، وحتى نباتات وادي بردى.

خدمات الحديقة البيئية واستمراريتها في ظروف الأزمة

خلال سنوات الأزمة، كان في جهود كبيرة للمحافظة على استمرارية الحديقة، لهيك عملوا بيت بلاستيكي بيوفر البيئة المناسبة لحفظ البذور وإعادة زراعتها بكل موسم. الحديقة بتستقبل الزوار من كل الأعمار ومجانا. من الطلاب الصغار يلي بيجوا يتعرفوا على أشكال النباتات، لطلاب الجامعات يلي بيدرسوا ويستفيدوا من عينات النباتات الموجودة.

الحديقة البيئية بالشام: ملتقى الطبيعة والتعليم

هالحديقة مو بس متنفس للناس، هي كمان مكان تعليمي مهم للطلاب والأكاديميين. بتستضيف ملتقيات شعرية وأمسيات موسيقية وسياح مهتمين بجمال النباتات وهدوء الحديقة, وصارت رمز للبيئة النظيفة والمشاريع المجتمعية بدمشق.

كل زيارة إلى الحديقة البيئية بالشام هي فرصة لاسترجاع جمال الطبيعة بوسط زحمة المدينة. وهي فرصة نعيش لحظات هادية بين النباتات العطرية والطبية، ونتأمل كيف الجمال الأخضر ممكن يكون جزء من حياتنا اليومية. شوف الموقع هون.

لكل يلي بحب الطبيعة، زوروا قسم طبيعة سوريا على الموقع!